Tucui tunu runaunara ahua pachai causaj, Atun Yaya Dios cumbiranmi, oracionda rurasha paihua amigo tucungahua (1 Juan 5:14). Shina cumbirashas mana tucui mañashcaunara uyanzhu. Diospa Shimi ricuchinmi, shu cari pai huarmira mana cuirajpi, Yaya Dios pai mañashcara mana uyangachu (1 Pedro 3:7). Israelita runauna cutin cutin manaliunara rurajpi, paiguna mañashcaunara Yaya Dios mana uyangaj munacachu. Shinajpis maicambas uchamanda llaquirisha aripintirijpiga, Yaya Dios paita uyangami. Leapai Isaías 1:​15; Rashcauna (Hechos) 3:19.

¿Tucui mañashcaunara Yaya Dios uyanzhu? nishca video ricui.

Yaya Diosta mañashaga paitami aduranchi. Chiraigu Jehovallara mañana anchi (Mateo 4:​10; 6:9). Astaumbas uchayuj ashcamanda Jesuspa shutii Diosta mañana anchi. ¿Imarasha? Pai ñucanchi uchamanda huañushcaraigu (Juan 14:6). Jehová Dios mana munanzhu paita mañasha chillarara chillarara resanuchu. Pai munanmi ñucanchi shungüi charishcaunara paita cuintasha tucui shunguhua mañanuchu. Leapai Mateo 6:7; Filipenses 4:​6, 7.

Shungu ucui iyarishalla mañajpis, ñucanchira Ruraj Yaya Dios uyanmi (1 Samuel 1:​12, 13). Shinallara tucui huraspi paita mañachun cumbiran. Chiraigu, tutamanda atariusha, puñungaraushas, micungaraushas, shinallara turmindus pasaushas, Jehová Diosta mañana ushanchi. Leapai Mateo 15:​36; 1 Pedro 5:7.

Ñucanchi mayambi causajcuna Yaya Diosta mana casungahua munanunzhu. Shinallara Yaya Dios cai Allpara paraíso rurangaraushcara mana quirinunzhu. Chiraigu Diospa amigo tucungahua shinzhimi an (2 Timoteo 3:​1, 4; 2 Pedro 3:​3, 13). Chimanda Yaya Diosta adurajcunahua amigo tucushaga, paigunahua parijumanda yanapanusha Yaya Diosta cushi sirvisha catishunmi. Leapai Hebreos 10:24, 25.

Yaya Diosta llaquijcunahua tandarisha Diospa amigo tucushun. Jehovahuaj testigoguna tandarinai ricuna ushangui, Yaya Diosta ali quirisha, cushihua sirvijcunara. Chita ricusha cambas Yaya Diosta cushihua sirvina ushangui. Leapai Romanos 1:​12.

Jehová Diosmanda Bibliai yachachishcara ali taripasha yuyarina angui. Shinallara pai rurashcaunara, camachishcaunara, ali causana tiangaraushcaras yuyaringui. Shina rashami, Diosta mañasha riparanchi Yaya Dios ashca ushaira charishcaras, sumaj sabiru ashcaras. Shinallara llaquij Dios ashcaras yachangui. Leapai 1 Timoteo 4:15, 16.

Diospa amigo tucungahua shinzhi fera charina, quirinas angui. Fera charinaga can tarpushca yura cuintami an, cuiranara ministin ali iñangaj. ¿Imasnara ñucanchi fera cuiranchi? Yaya Diosmanda Bibliai yachachishcara ali taripasha yuyarishami, ñucanchi fera caran punzha ali iñachu cuirana anchi. Leapai Mateo 4:4; Hebreos 11:​1, 6.

Jehová Dios llaquinmi paita llaquij runaunara. Chiraigu paiguna huiñai causana iyaira charisha catinuchu, shinzhi feras charisha catinuchu Dios yanapanmi (Salmo 91:​1, 2, 7-​10). Jehová Dios riparachinmi uchamanda anzhurisha ama yangamanda ungüira charingahua. Astaumbas yachachinmi imasna mas cushi, ali causangahua. Leapai Salmo 73:27, 28; Santiago 4:​4, 8.