PUNTO 10
¿Imasnara yachashun ali religión ashcara?
1. ¿Masna ali religionguna tian?
“Cuiraichi llullasha shamujcunamanda.” (MATEO 7:15)
Jesús paita catijcunara yachachicami, shujlla ali religión tian nisha. Cai religionllami huiñai huiñai causana ñambira yachachin. Shinajpis, Jesús nishca shina, “ansallami icunaun” chi ñambira (Mateo 7:14). Biblia mandashcasna adurajpillami, Dios ali ricun. Yaya Dios munashca cuinta adurajcuna chi tunullara quirinun, chi tunullara yachachinun. Leapai Juan 4:23, 24; 14:6; Efesios 4:4, 5.
¿Yaya Dios tucui religiongunara chasquinchu? nishca video ricui.
2. Shimi pajllamandalla quirij mani nisha purijcunamanda Jesusga ¿imara nica?
‘“Diosta ricsinchimi” nishas, paiguna rashcaunahua: “illanmi Dios” ninaun.’ (TITO 1:16)
Jesús ña rimacami, llullasha purijcuna ñuca yachachishcara turcanungami nisha. Chi llullajcuna, paigunara catijcunas, ali cierto quirijcuna manchi ninun. Shina ninujpis paiguna rashcaunara ricusha yachanchimi, manali religión ashcara. Leapai Mateo 7:15-23.
3. Ali religiombi tiajcuna ¿imara pactachina anun?
Ricushun Diosta ali adurajcuna imara pactachina anun:
-
Bibliara Diospa Shimi nisha respetanun. Runauna rimashcara uyana randi, Biblia mandashcara tucui shunguhua pactachingahua munanun (Mateo 15:7-9). Shinallara, Yaya Diosmanda yachachishca cuinta pactachisha causanun. Leapai Juan 17:17; 2 Timoteo 3:16, 17.
-
Yaya Diospa shutira ahuayachinun. Jesusga Jehová shutira runaunama ricsichica. Shina rasha, Diospa shutira ahuayachica. Shinallara, Jehová imasna ajta runaunama yachachica. Astaumbas Jehová Diosta mañanara yachachiushca huras Jesús nica, Diospa shuti ahuayachishca achu nisha (Mateo 6:9). Chita pactachingahua ¿pigunara camba llactai Diospa shutira ricsichisha purinun? Leapai Juan 17:26; Romanos 10:13, 14.
-
Diospa Reinomanda yachachinun. Jesús cai Allpai ashcai, Diospa Reinomanda yachachica pai huañuna punzhagama. Shina rasha ricuchica, Diospa Reinollami runaunama ali causaira cuyanga nisha (Lucas 4:43; 8:1; 23:42, 43). Shinallara nica, paita catijcuna Diospa gobiernomanda yachachinunga nisha. Chiraigu, ishquipura camba huasima shamusha, Diospa Reinomanda rimajpi tapuringui, ¿maican religionmandara an? nisha. Leapai Mateo 24:14.
-
Cai pachamanda manali causaira mana catinunzhu. Jesusta catijcuna politicai, parogunais mana masarinunzhu (Juan 17:16; 18:36). Shinallara, mundu manali, irusta rasha causanamandas caruyanunmi. Leapai Santiago 4:4.
-
Diosta ali adurajcunapura cierto pacha llaquinunun. Diospa Shimira yachashcamanda caran tunu runaunaras respetanunmi. Panda religiongunaga guerragunara bendicianunmi, randi ali religionga guerragunai mana satirinzhu (Miqueas 4:1-3). Ali religionda catijcuna, runaunara yanapangahua lugarda llucchinun, paiguna quiquin cullquiras gastanun. Shina rasha tucui runaunara yanapanun. Leapai Juan 13:34, 35; 1 Juan 4:20.
4. ¿Ali religión ashcara riparana ushanguichu?
¿Maican religionda tucui Bibliai tiashcaunara yachachin? Shinallara ¿maican religionda Diospa shutira ahuayachin? ¿Maican religionda turmindusgunara Diospa Reinolla tucuchingaraun nin? ¿Maican religiombi tiajcuna paigunapura cierto pacha llaquinusha causanun, shinallara mana guerragunai satirinun? Canga ¿imara cutipanguima? Leapai 1 Juan 3:10-12.
