Ali ejemplora cuj yayauna paiguna rimashca cuinta causanun. Shu yaya mana rimana ushan tucui huras mana llullasha rimachu paihua huahuara, maspas paihua huahua uyashca yayara rimauta huasii ashallara pungüi cayanujpi ama rimaichu nisha.

“Ashca runauna ninun: ‘Rurai ñuca nishcara mana ñuca rurashcara’, chi mana ruraihuajchu an huahuaunahua. Putus yacura chungashca cuinta huahuaunas yachanun tucui ñucanchi rimashcara rurashcaras. Shujta yachachijpi shujta rurajpi riparanunga chi huasha rimanunga” (David).

BIBLIAMANDA IYAI: “Can, ‘Ama shuhuaichu,’ nisha rimaushallara, ¿can shuhuangui? (Romanos 2:21).

Yayauna mas yanapana ushanun paihua churiunara, mas escuelai cumpañajcunamanda yali, maltauna ashcais. Cai ricuchinmi canguna yayauna mas ali dirichuna ushanguichi canguna churiunara ali ñambii puringaj, shinajpis canguna ejemplohua ricuchina anguichi.

“Patsaj cuti rimana ushanchi chillarara mana sirtura sintirina ushanchi ñucanchi churiunamanda uyanun mana uyanun nisha, shinajpi ñucanchi rimashcara mana rurajpi, ñahui carai rimanunga. Ñucanchi tucui rurashcaunara ricunun, huaquimbi mana ricushca cuintallara” (Nicole).

BIBLIAMANDA IYAI: “Ahuamanda yachana [...] mana ishqui shimiyuj” (Santiago 3:17).

Tapuri: “¿Imasnara tratasha ñuca huarmira, ñuca cariras huahuaunaras? ¿Ima tunu programagunara ricuni? ¿Ima sami amigogunara charini? ¿Shujcunai iyarinichu?”. Iyari ¿munanguichu shu timpuunai camba huahuaunas can cuinta anuchu?

“Ñuca cari, ñucas mana mañanchi ñucanchi churiunara respetangaj shu iyaigunaras ñucanchi mana respetashcara” (Christine).

Perdonahuai nisha mañangui. Churiuna ña yachanun yayauna pandarishcara. Chiraigu can camba huarmira, carira perdonahuai nisha mañajpi camba churiunas yachachingui ali valishca leccionda, mana llullasha mansu shungura ricuchingaj.

“Ñucanchi pandarishcai perdonda mañana anchi, manajpi ñucanchi churiuna mana yachanunga imasna ruranara” (Robin).