Jehová shu valishca Dios ricsingaj

¿ÑUCANCHI causaibi shu valishcara pirdishca cuinta an? Diosmanda ansalla yachasha, shina angachari. ¿Imarasha? Imasna tupanushca huaranga runauna, Bibliamanda Diosta ricsingaj valiringaj ñucanchi causaibi uctalla huiñaigama rurangaj.

Jehová, Bibliara quillcaj ricsinuchu munan. Salmista quillcaca: “Runauna yachanuchu camba shuti Jehová ajta, canllami tucui allpamanda astaun Atun Dios angui”. Dios yachan paita ricsina ñucanchij ali ashcara. “Ñuca, Jehová, cambaj Dios ani, canllara ali causachu Yachachij, canda ali ñambi purichu Yachachij ani”. ¿Imasnara valirinchi atun Dios Jehovara ricsishcamanda? (Salmo 83:​18; Isaías 48:​17).

Caran punzha llaquiunara apangaj Jehová yanapaihua valirinchi, shu shinzhi chapanara charisha shamuj punzhauna ganaslla sintirishun. Shinallara Jehovara ricsina yanapan shuj tunu iyaira charingaj tucui runauna mas valishca tapurishcaunamanda. ¿Ima tapuigunamanda rimanchi?

¿Imangaj causanchi?

Tecnología mirarisha, runauna chara cai tapuigunara rurasha catirianun: ¿Imarasha caibi anchi? ¿Maima riunchi? ¿Imangaj causaunchi? Ali cutipashcaunara mana tupasha, yangamanda causanchi iyarinun. ¿Runauna caimanda riparanun? Alemania llactai 1990 huataunai runaunara tapunuca, cai tapushca runaunamanda chaupiuna iyarinuca yangamanda causaunchi nisha. Maicambi shina iyarinun can causaushca partii.

Imangaj causanchi mana yachasha, ñucanchi quiquin metagunara mana churana ushanchi. Chiraigu ashca runauna ashcara tarbanun, ashca cullqui charina mascasha catinun, shinajpi yangamanda causaushca cuinta sintirinun. Imangaj causanchi mana yachashcamanda ashca runauna yapajta turbarinun, ña mana causasha catina munanun. Cai periódico International Herald Tribune riman shinami shu malta sumaj huarmi pasauca, “pai ashca cullquira charica, tucui pai munashcara charina ushaca”. Shinajpi ashca cullquira charishas, sapalla sintirisha yangamanda causashcara iyarica, chiraigumanda ashca ambiunara upisha paillara huañuca. Maicambi can cai tunu runaunamanda uyashcangui sapalla sintirisha irus huañunara charinuca.

¿Can uyashcanguichu runauna rimanun ciencia yachachina tucui intindichina ushan causaimanda? Cai Alemania llactamanda quillca Die Woche riman: “Ciencia yachachina sirtu ajpis, ansa yachachin religionmanda, imasna causanamanda. Evolución yachachina ansa valishca ricurin, shinallara física cuántica pai tucui yachachishcaunahua ashca yachachin shinajpi ali cushi causangahua mana yanapan”. Cientificoguna intindinuca imasna ashca tunu causaiguna tianun, yachachinuca imasna ashca cosasguna tarbanun causai catingaj. Shinajpi, cientificoguna mana intindichina ushanun imarasha rurashca acanchi, causai maima riushcara. Ñucanchi ciencia yachachishcaunallai quirisha, imarasha causanchi nisha chara tapurisha catishun. Chiraigu cai Süddeutsche Zeitung riman “ñucanchira mas intindingaj ministinchi”.

¿Manzhu ñucanchira Ruraj mas ali intindichina ushan caimanda? Pai runaunara cai Allpai churarca, chiraigu yachana an imarasha caibi tiaunchi. Biblia intindichin Jehová Dios runaunara rurarca cai Allpai causanuchu Allparas cuiranuchu. Runauna Dios cuinta ali dirichu ruranara, yachanara, llaquinara ricuchina anuca. Chiraigu imarasha Jehová Dios ñucanchira rurarca intindichinmi imangaj caibi tiaunchi (Génesis 1:​26-28).

¿Can imara rurana ushangui?

Cai tunu tapuigunara charisha imarasha caibi tiaunchi, maima riunchi, imangaj causanchi, Biblia casna camachin Jehová Diosta alira ricsina anchi. Astaumbas, Jesús rimaca: “Caimi huiñai causai, canda sapalla sirtu Dios ajta ricsinauchu, shinallara can cachamushca Jesucristoras”. Astaumbas cai tunu ali ricuchinara charingaj llaquina cuinta shinallara cai meta churangui Dios mandana timpui causangahua. Shinami shu ali causaira shamuj punzhaunamanda shu sumaj chapanara charingaraungui. Can tapuigunara ña cutipashcara charingaraungui (Juan 17:​3; Eclesiastés 12:​13).

Cai tapuigunara cutipashcara tupasha ¿imasnara yanapan? Hans nishca runa ricuchin imasnara yanapan. * Ashca huatamanda huashai Diosmanda ansa yachasha, Dios mandashcaunara mana catica. Pai drogaguna, huarmiuna, mana alira rurana, motoguna paihua causai anuca. Pai nin: “Ñuca causai yangamanda aca, mana cushi acani”. 25 huatauna charisha, Hans Yaya Diosta ricsingaj ajllaca Bibliara leasha. Jehovahua amigo tucusha, imarasha caibi tiaushcara intindisha, paihua causai turcarica, Jehovahua testigo cuinta bautisarica. Pai ña chunga huatauna intiru timpui Jehová Diosta sirviun. Cuna pai nin: “Jehová Diosta sirvina mas ali causai an. Mana mas valishca tian. Jehová Diosta ricsishcamanda ali gustu cushi causai charini”.

Imangaj causanchi nisha tapurinun shinallara shuj tapuigunara ruranun. Cai mundui turmindusguna mas mirariujpi, mas runauna manzharisha shuj valishca tapuira rurarianun.

¿Imarasha shina pasana aca?

Shu runa shu turmindus charisha, tapurina ushan: ¿imarasha shina pasana aca? Cai tapuira cutipashcara charisha yanapangami cai llaquirishcara ahuantangaj. Shinajpi shu cutipanara mana charisha, cai runa yapa turmindarisha llaquirina ushan. Ricui cai ejemplo Bruni nishca mama.

“Ashca huatauna ñuca ushushi Susanne huañuca. Ñuca Diospi quiricani, shu sacerdotema ricani cushiyanara mascangaj. Pai rimahuaca Dios ahua pachama apashca shu ángel cuinta causangaj. Ñuca ushushi huañushca ñuca causaira turcachica, shinallara Yaya Diosta chijningaj rurachica”. Bruni ashca huatauna nanai llaquirinas charica. Pai cuintan, “shu Jehovahua testigo Bibliara ricuchica Yaya Diosta mana chijnina ashcara. Jehová ñuca ushushira ahua pachama mana pushaca, mana shu ángel rurarca. Paihua ungüi aca uchayuj ashcamanda. Ñuca ushushi huañushcamanda puñun, causarinara Jehovamanda chapasha. Shinallara yachacani pai runaunara rurashcara huiñai causangaj shu gustu paraíso Allpai, chita ñalla ruranga. Imasna Jehová ashcara intindingaj callarishcai, mas mayanllayashca tucucani paima, mana yapa nanai sinticani” (Salmo 37:​29; Hechos 24:​15; Romanos 5:​12).

Huaranga runauna caran tunu turmindusgunara ahuantanun: quiquin turmindusgunara, guerraguna, yarcai, shinzhi llaquiunas. Bruni cushi sintirica Biblia yachashcai Jehová turmindusgunamanda mana culpa charishcara, pai mana ima huras runauna turmindusguna charichu munaca, ñalla turmindusgunahua tucuchinga. Llaquiuna yaparisha riujpis chi ricuchin “puchucai timpuunai” cai mana ali mundui causaushcara. Cai atun turcachina ñalla pactamunga ali causangaj (2 Timoteo 3:​1-5; Mateo 24:​7, 8).

Imasna Diosta ricsina

Hans shinallara Bruni, Diosmanda mana yapa yachanuca. Quirinuca, shinajpi paimanda mana yapa yachanuca. Jehovamanda timpura yachangaj llucshishcai, paiguna ursarishcauna bendiciashca anuca. Ali cutipaigunara mas valishca tapuigunamanda tupanuca, shungüi ganaslla sintirinuca shamuj punzhaunai sirtu chapanaras. Huaranga Jehová Diosta sirvijcuna cai tunu cuintashcaunara pasanushca.

Jehovara ricsingaj, ñaupa punda Bibliara ali intindina anchi, cai libro paimanda riman, ñucanchimanda imara mañashcaras. Punda sigloi huaquin runauna caita ruranuca. Estudiaj médico Lucas cuintan, Bereamanda (Grecia) judío congregación “[Pablomanda Silasmandas] ali shunguhua shimira uyanauca. Caran punzha Quillcashcaunara ricunauca, ‘¿Cai shimiuna alichu manzhu ali? nisha’” (Hechos 17:​10, 11).

Shinallara, punda siglomanda Jesusta catijcuna congregaciongunai tandarinuca (Hechos 2:​41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Cuna punzhaunai shinallara pasaun. Jehovahua testigoguna tandarina anun runaunara yanapangaj Jehovama mayanllayanuchu, cushihua sirvingaj. Causaushca lugar Jehovahua testigogunahua tandarina mas yanapan. Imasna runauna caran cuti paiguna aduraj Dios cuinta ricurinun, Jehovahua testigoguna ushashca tupui ricuchinun ali runauna Dios cuinta. Paigunahua tandarina yanapan Jehovara ali ricsingaj (Hebreos 10:24, 25).

¿Shinzhichu an shu runallara ricsingaj? Sirtu, ursarina anchi. ¿Manzhu shinallara tucun ñucanchi causaibi charingaj munashca cosasgunahua? Iyari imasna ali pujllajcuna ashcara ursarinun paiguna puruntushcai. Shu ejemplo, Franciamanda Jean-Claude Killy, curi medalla esquí pujllanai ganaca, pai riman huaquin llactaunahua pujllasha ganangaj ima ministishcara: “Chunga huatauna ñaupalla callarina an, ashca huatauna puruntungaj shinallara ashca huatauna chillai iyasha tucui punzhaunai [...]. Tarbana angui camba iyaihua, aichahua 365 punzhauna huatai”. ¡Tucui chi timpu, ursa, shu pujllanaj chunga minutulla duran! Iyarishun Jehovara ricsina mas valishca an mas ashcara yanapanga.

Mas amigoguna tucuna

¿Pita paihua causaibi mas valishca pishichu munan? Mana pis. Chiraigumanda, camba causaibi mana imas ruranara yachasha, imarasha ashca llaquiuna tian yachangaj munasha, Jehovara ricsingaj ursari, Bibliamanda Dios. Paimanda yachana camba causaira turcachingaj, ali angaj huiñaigama.

¿Shu punzha Jehovamanda yachanara saquishunzhu? Ashca huatauna sirvisha catijcuna chara manzharinun yachaushcamanda, paimanda yachasha catirianun. Yachasha riushcai, mas cushi sintirishun, Rurajma mas mayanllasha. Iyarishun apóstol Pablo cuinta, pai quillcashcai: “¡Ima ashca valij tupurai Diospa iyai, paihua yachanas! ¡Mana tupuihuajchu paihua taripanauna, mana ricuihuajchu paihua ñambiuna! ¿Señorba iyaira pihuas yachacachu? ¿Pihuas paita camachijchu aca?” (Romanos 11:​33, 34).

[Nota]

[Rimashcauna]

Runauna chara cai tapuigunara rurasha catirianun: ¿Imarasha caibi anchi? ¿Maima riunchi? ¿Imangaj causaunchi?

[Rimashcauna]

“Imasna Jehová ashcara intindingaj callarishcai, mas mayanllayashca tucucani paima”

[Rimashcauna]

“Jehová Diosta sirvina mas ali causai an. Mana mas valishca tian. Jehová Diosta ricsishcamanda ali gustu cushi causai charini”