“Cai Dios mandana pacha evangelio ali shimi intiru mundui camachishca anga”
“Cai Dios mandana pacha evangelio ali shimi intiru mundui camachishca anga”
“Cai Dios mandana pacha evangelio ali shimi intiru mundui camachishca anga, tucui llactaunara ricuchingaj. Chihuasha tucurina huras pactamunga” (MATEO 24:14).
¿Imara Jesús rimana munaca? Lucas evangelio libro rimashca cuinta, “Jesús puriuca tucui llactaunama, tucui ichilla llactaunamas, Dios mandana pacha evangelio ali shimira rimasha” (Lucas 8:1). Jesús nica: “Dios mandana pacha ali shimira paigunara rimangaj. Chihuaj cachamushca acani” (Lucas 4:43). Jesús paita catijcunara Diospa Reinomanda ali shimiunara mayanlla llactaunai yachachingaj cachaca, shinajpi huasha paigunara nica: “Ñucamanda rimajcuna anguichi [...] cai pacha puchucai pundagama” (Hechos 1:8; Lucas 10:1).
Jesusta punda catijcuna ¿imara ruranuca? Jesusta catijcuna Jesús mandashcasna rurangaj callarinuca. Hechos 5:42 nin: “Tucui punzhauna templo huasii tucui huasiunais Jesucristo shutira rimanara camachinaras mana saquinaucachu”. Congregaciombi tucui ajcuna Diospa shimira yachachina anuca mana shu muntunlla. August Neander quillcaj nica “Jesusta catijcunamanda manalira rimaj Celso nishca runa, pai burlasha rimaca illmahua tarbajcuna, zapatusta rurajcuna, churana carahua tarbajcunas mana yapajta yachajcunas mana estudiajcunas Diospa Shimira yachachijcuna ashcara”. Les premiers siècles de L’Église (Los primeros siglos de la Iglesia) nishca librora quillcaj Jean Bernardi nica Jesusta catijcuna “tucui partiunai tucui runaunara yachachina ashcara. Ñambiunai, llactaunais, plazas nishcaunai, huasiunais, runaunara paigunara uyajpi mana uyajpis. [...] Cai pacha puchucai pundagama” yachachina ashcara.
Cuna punzhaunai ¿piguna paiguna ejemplora catinun? “Cuna punzhaunai runauna Diosta sirvinara mana munanun Iglesia Diospa Shimimanda mana yachachishcamanda mana rimashcamandas”, casnami quirin sacerdote David Watson nishca. ¿Por qué se van los católicos? nishca libroi José Luis Pérez Guadalupe quillcaca Jehovahuaj testigoguna “huasi huasii Bibliamanda yachachinun”, randi evangélicos, adventistas shuj religionguna caita mana ruranun.
Instituto Catón nishca rimashcai Jonathan Turley nica: “Ñacas tucuiguna Jehovahuaj testigogunamanda uyasha iyarinun cai runauna paiguna huasiunama pactanun yachachingaj mana munashca timpuunai. Huasi huasii Bibliamanda yachachinun mana paiguna quirishcaunamanda shujcunara ricsichingajlla, maspas paiguna Diospi quirishcamanda yachachinun” (Cato Supreme Court Review, 2001-2002).
[Recuadro]
¿Ña yachanguichu piguna Jesusta sirtu catijcuna ashcara?
Pasaj temagunai ña yachashcanchi imasna Biblia rimashca cuinta yachana ushanchi piguna Jesusta sirtu catijcuna ashcara. ¿Yachanguichu piguna ashcara? Huaranga huaranga religionmanda muntunguna Jesusta catijcuna anchi nishca rimanun. Shinajpi iyari Jesús paita catijcunara casna camachishcara: “Mana tucui ñucara: ‘Señor, señor,’ nij runa ahua pacha mandanai icungachu, astaun ñuca ahua pachai tiaj Yaya munaira rajcunalla” (Mateo 7:21). Chiraigu Diospa Reino apamungarauj bendiciongunara charingaj, Diospa munaira pactachijcunara (Jesusta sirtu catijcunara) ricsina anchi, chi muntunmanda parti tucungaj. Cai Reinomanda ¿imasna ñucanchira yanapangaraushcara mas yachana munanguichu? (Lucas 4:43.) Cai quillcara canda cujcunara: Jehovahuaj testigogunara rimangaj canda animanchi.