“Canguna ñuca shimiunara pactachisha causausha”
“Canguna ñuca shimiunara pactachisha causausha”
“Canguna ñuca shimiunara pactachisha causausha, sirtu pacha ñuca yachachishca runauna tucunguichimi. Sirtu shimira yachanguichimi. Cai sirtu shimi cangunara lugaryachingami” (JUAN 8:31, 32).
¿Imara Jesús rimana munaca? “Ñuca shimiunara” rimasha Jesús intindichica pai yachachishcamanda. Shinajpis intindichica pai yachachishcauna shu ali apumanda shamujta rimaca: “Ñucara cachamuj Yaya, paimi mandahuaca imara rimanaras” (Juan 12:49). Shu mañaira ruraushcai Jesús ahua pachai tiaj Yayara nica: “Can rimashca shimi sirtumi”. Chiraigu yachachiushcai, caran cuti iyachica Dios pasaj timpui paita sirvijcunara rimashcara (Juan 17:17; Mateo 4:4, 7, 10). Shinajpi ¿imasnara Jesusta sirtu catijcuna Jesús shimii catinun? Ñucanchi chasquina anchi Diospa Shimi Biblia sirtu shimi ashcara, caillara rimanga imara quirinara imara ruranaras.
Jesusta punda catijcuna ¿imara ruranuca? Apóstol Pablo tucui Jesusta catijcunamanda pai mas Bibliamanda cartagunara quillcaca, Jesús cuinta respetura ricuchica Diospa Shimimanda. Pai nica: “Tucui Dios Quillcashca Diosmanda rimashcami” (2 Timoteo 3:16). Shinallara congregación ucui yachachij cariunara rimashca aca “sirtu shimira huacachij achu imasna ñaupa yachachishcasna” (Tito 1:7, 9). Shinallara Jesusta catijcunara rimashca aca “ricuichi ama pihuas cangunara umachichu yachana shimiunahua, yanga umachina shimiunahuas, runa yachaimanda, mundu iyarina tunui, mana Cristo rimashcasna” (Colosenses 2:8).
Cuna punzhaunai ¿piguna paiguna ejemplora catinun? Constitución dogmática sobre la divina revelación 1965 huatai Vaticano chasquica shinallara Catecismo de la Iglesia Católica nishcai quillcashca aca, “Iglesia Bibliamandalla quirishcaunara mana llucchin. Cai rimana munan, respetana chasquina anchi runauna causashcara Biblia nishcaras”. Maclean’s quillcaibi Canadá Toronto shu ministra religiosa nishca nica: “¿Imarashara ishqui huaranga huatauna huashama rimashca shimira casuna anchi? Ñucanchis ali iyaigunara charinchi shinajpis mana tucui huras Jesús yachachishca iyaigunahua Bibliahua pariju rin”.
La Nueva Enciclopedia Católica Jehovahuaj testigogunamanda riman: “Paiguna iyanun paiguna quirinauna rurashcaunas Bibliamandalla shamuna ashcara”. Cunalla Canadá llactai shu runa shu Jehovahuaj testigora rimaushcai arcaca, rimaca: “Yachanimi canguna piguna ashcara”. Huarmi Bibliara charishcara ricuchisha nica: “Can maquii charishca libro shu señal an canguna pi ashcara yachangaj”.