“Canguna parijumanda llaquinanaupi”

“Mushuj mandashca shimira cangunara rimauni: Parijumanda llaquinaunguichi. Ñuca cangunara llaquishcasna, shinallara parijumanda llaquinaunguichi. Caimanda tucui runauna canguna ñuca yachachishca runauna ajcunara ricsinaungami, canguna parijumanda llaquinanaupi” (JUAN 13:34, 35).

¿Imara Jesús rimana munaca? Jesús paita catijcunara rimaca parijumanda llaquinuna ashcara pai llaquishca cuinta. Shinajpi Jesús ¿imasnara paigunara llaquica? Runauna shuj llactaunara runaunaras chijninuca, huarmiunaras llaquichinuca chi randi Jesús tucui runaunara llaquica (Juan 4:7-10). Jesús ashcara ursarica paihua timpura utilizasha shujcunara yanapangaj (Marcos 6:30-34). Shinajpi pai atun mas llaquina aca paihua causaira cusha. Pai nica: “Ñuca burigura ali cuiraj ani. Ali cuiraj paihua causaira cun buriguuna randimanda” (Juan 10:11).

Jesusta punda catijcuna ¿imara ruranuca? Punda sigloi Jesusta catijcuna, huauqui pani parijumanda ninuj aca (Filemón 1, 2). Congregación ucui maican shamujcunara ali shamushca nisha cushihua saluraj anuca. Paiguna quirinuca mana chican chicanzhu judiogunahua griegogunahua ashcara, paiguna chi Señorllara charishcamanda (Romanos 10:11, 12). Pentecostés istai huata 33pi, ista tucurinai Jerusalenmanda Jesusta catijcuna “paiguna allpaunara, paiguna charishcaunaras catusha, caranma cunauca, caran runa ministishca tupura”. ¿Imangaj? Maican bautisarijcuna chi llactai saquirisha apostolguna yachachishcaunara uyasha catingaj (Hechos 2:41-45). ¿Imarasha paiguna caita ruranuca? Ñacas doscientos huatauna apostolguna huañushca huasha Tertuliano quillcaca shuj runauna Jesusta catijcunamanda rimashcaunara: “Ricui [...] imasna paiguna parijumanda llaquinushcara [...] imasna paiguna caran shujmanda huañuna munashcaras”.

Cuna punzhaunai ¿piguna paiguna ejemplora catinun? Historia de la decadencia y ruina del Imperio romano libro nin, ashca huatauna Jesusta catijcuna anchi nijcunara “shujcuna llaquichinujpis paigunapurallara ashca llaquichinaunara charinuca”. Cunalla Estados Unidos llactai shu ricsichinara charishcai intindichica ñacas tucui religionda charijcuna cristianas nijcunas runaunara chijnijcuna anuca. Caran llactamanda runauna chi religionllara charijcuna paigunapura huaquimbi mana apanunun, chiraigu yanapangaj iyaira munairas mana charinun ministishca timpuunai.

2004 huatai, (Estados Unidos) Florida llactai shinzhi huaira tamiauna tiaca ishqui quillaunai. Timpu pasashca huasha, presidente del comité de operaciones de emergencia Floridamanda yachana munaca imasnara utilizarianuca paiguna cushcara. Riparaca maican organizaciombas mana Jehovahuaj testigoguna cuinta ali puruntushca ashcara, chiraigu tucui ministishcai yanapangaj munaca. 1997 huata ñaupajpi shu muntun Jehovahuaj testigoguna República Democrática del Congo llactama rinuca, micunara churanara ambiunaras cungahua paiguna huauquiunara maican ministijcunaras. Europa llactamanda Jehovahuaj testigoguna ministishcaunara cuyasha shu millonma cullqui pactaca.