‘Mana cai pachamandachu anun’

“Cai pacha runauna paigunara chijninauca, paiguna mana cai pachamanda ashcaraigu” (JUAN 17:14).

¿Imara Jesús rimana munaca? Jesús paihua timpui cai pachamanda mana ashcara ricuchingaj runauna politicai macanaunais mana satirica. “Ñuca mandana pacha mana cai pachamandachu, Cai pachamanda ajpi, ñucara sirvijcuna macananaunmami, ñuca judiugunama ama intrigai tucungaj, Astaun ñuca mandana pacha mana caimandachu” (Juan 18:36). Shinallara paita catijcunara mandaca Bibliai chijnishca rimanaunara ruranaunara mana rurangaj (Mateo 20:25-27).

Jesusta punda catijcuna ¿imara ruranuca? Religionmanda quillcaj runa Jonathan Dymond ricuchica Jesusta punda catijcuna “guerrama mana rishcamanda pingaira pasana, carcelma rina o huañunas ajpi guerrama mana rinuca”. Ima turmindus ahuantangaj munanuca cai mundui mana satiringahua. Shuj runauna cuinta manali ruraigunara mana rurasha Biblia mandashcara pactachinuca. Chiraigu paigunara ninuca: “Casna rajcunahua mana intindihuajchu imarasha canguna mana paigunahua pariju catinguichi yapajta irusta rangaj, chimanda cangunara caminaun” (1 Pedro 4:4). Cai quillcaj Will Durant intindichica “Jesusta catijcuna Diosta llaquishcamanda casuj runauna ashcamanda cai mundui runauna manali rurashcaras ricuchinuca”.

Cuna punzhaunai ¿piguna paiguna ejemplora catinun? Politicaibi, guerraibi mana satirinamanda New Catholic Encyclopedia nin “Yaya Diosllara sirvishcamanda guerrama mana rini rimashca mana valin nica”. Reformierte Presse nishca periódico ricuchica cai organización de derechos humanos African Rights ima nishcara: Ruanda llactai 1994 huatai tucui iglesiaguna ashca runaunara huanchinuca chi randi “Jehovahuaj testigoguna caita mana ruranuca”.

Judiogunara shuj runaunaras atun huanchinamanda shu profesor llaquirisha rimaca “mana maicans muntun organización cai runaunara llaquichishcamanda, manalira rurashcamanda llullashcaunamandas difindinuca”. Mas yachangahua Museo Conmemorativo del Holocausto de Estados Unidos nishcama rica, chi huasha quillcaca: “Cuna sirtura yachani”. Cai profesor intindica Jehovahuaj testigoguna llaquichishca ashas paiguna quirishcaunara casusha catinuca.

Tacarina uchaunai mana urmanamanda ¿piguna Jesusta punda catijcuna ejemplora catinun? U.S. Catholic. nishca quillca nin: “Manara casarashcallaira shu carihua shu huarmihua puñunamanda tacarinamanda Iglesiai yachachishcaunara ñacas tucui católico maltauna mana casunun”. Huasha cai quillcai shu diácono nin: “Ñuca yachachishca runaunamanda, chaupi parti yali, manara casarashcallaira paigunapura ña llutarisha causanun”. Shinajpi The New Encyclopædia Britannica nin Jehovahuaj testigoguna “ashcara ursarinun Biblia mandashcaunara paiguna causaibi pactachisha catingaj”.