TEMA | DIOSMANDA CARUYACHIJ LLULLAUNA
Quinsa llulla: Yaya Dios ucu pachai turmindachin
RUNAUNA CASNA NINUN:
Catecismo de la Iglesia Católica nishca libroi nin: “Atun uchara rurajcuna huañushcai paiguna almaga ucu pachama rin, chibi ‘huiñai ninahua’ turmindachishca anun”. Shinallara huaquin religiongunara pushajcuna ninun, ucu pachai tiajcuna Diosmanda yapa caruyachishca asha turmindarinun nisha.
BIBLIA NINMI:
“Uchara raj alma paillara huañungami” (Ezequiel 18:4). Huañushcauna “imaras mana yachanunzhu” (Eclesiastés 9:5). Shinajpi Biblia ricuchishca cuinta almaga huañunmi, ricungaj, uyangaj, sintingajpas ña mana ushanzhu, chiraigu shu “huiñai ninahua” mana rupachishca ana ushan shinallara mana turmindarina ushan Diosmanda caruyashca asha.
Biblia quillcashca shimiunai, “ucu pacha” nishca shimi nisha nin, “pambariushca parti” (tumba) ashcara. Shu ejemplo, Job shu shinzhi nanachij ungüira pasaushcai Diosta mañaca: “Pambariushca partii ñucara huacachinguima” nisha (Job 14:13, TNM). La Sagrada Biblia, de Guillermo Jünemann, shuj Blibliagunais cai partii casna pasachinushca, “ucu pachai” nisha. Shinajpi iyarishun, Job mana munaca Diosmanda caruyashca asha ucui pachai huiñai turmindaringaj, maspas pai munacami pambashca partii samangaj.
¿IMARASHA VALISHCA AN YACHANGAJ?
Yaya Dios runaunara ucu pachai turmindachishcara quirishaga paita llaquingaj mana ushanchima. México llactamanda Rocío nin: “Ichillamanda ucu pacha tiashcara yachachihuanuca, Yaya Diosta ashcara manzhacani, mana quirina ushacani pai ñucanchira llaquina ushashcara. Iyacani Yaya Dios ñucanchira piñaj, yapa libachij ashcara”.
Diosmanda Biblia yachachishcara, huañushca huasha ima tucushcaras Rocío yachasha paihua iyana tunura turcaca. Pai iyarin: “Caita yachasha lugar sinticani. Ñuca ahuamanda shu llashajta quichushca cuinta sintiricani. Riparacani Yaya Dios munan ñucanchi cushi causanuchu. Pai ñucanchira llaquin ñucas paita llaquina ushani. Cuna paita ricuni huahuaunara llaquij shunguhua cuiraj Yaya cuinta” (Isaías 41:13).
Ashca runauna religionda catinun ucu pachama ringaj manzhai charishcamanda, shinajpi Yaya Dios mana munanzhu paita manzhashcamanda sirvinuchu. Jesús nica: “Camba quiquin Señor Diosta llaquinami angui” (Marcos 12:29, 30). Yaya Dios ali, llaquij ashcara yachasha mana manzhaira charishun shamuj punzhaibi pai taripanara. Jobpa amigo Elihú cuinta cushihua rimana ushanchi: “¡Sirtu Diosga manali ruranamanda, Tucui Ushaj manali dirichu ruranamanda carui tiachu!” (Job 34:10).
