Ñuca pagarishcai ñuca yayauna allpara charinuca España Galicia llactai. Pusaj huahuaunamanda ñuca chuscu puistui pagaricani, cushi aillu acanchi. Chi timpui aillu ucumanda shujllas shu seminarioma shu convento nishcama rina anuca. Ñucanchi aillu ucumanda quinsa ricanchi.

13 huatara charishcai convento Madrid llactama ricani chibi ñuca ñaña ña tiaca. Chibi llaquinara mana ricuchinuca. Amigaguna illaca; ruranalla, Diosta mañanalla, charishcallahua causanalla aca. Tutamanda iglesiama iyaringaj rij acanchi shinajpis ñuca imais mana iyarij acani. Chi huasha iglesiamanda canciongunara cantaj acanchi shinallara misama rij acanchi. Tucui latín shimii aca chiraigu mana intindicani, sinticani Yaya Dios ñucamanda carui carui ashca cuinta. Ñuca punzhauna chunlla anuca. Ñuca ñañahua tuparishcai rimanalla acanchi: “Ave María purísima” nisha. Micushca huasha treinta minutohualla charicanchi cuintaringahua. ¡Cai shuj tunu aca huasii cushi causanamanda! Sapalla sintirisha tucui timpui huacangaj callaricani.

Mana ima huras Diospa mayanlla sintishas 17 huatara charishcai monja tucucani. Caita ruracani shujcuna munajpilla, chi huasha tapuricani sirtu pacha Dios ñuca caita rurangaj munashcanga. Monjaguna rimanuca tucui casna tunu iyaira charijcuna ucu pachama rinunga nisha. Shinajpis ñuca chibi iyarisha caticani. Ñuca yachacani Jesús runaunahua angaj munaj ashcara chiraigu paihua timpura utilizaca runaunara yanapangaj, yachachingaj (Mateo 4:23-25). 20 huataunara charishcai monja tucusha catingaj ña mana munacani. Madre superiora rimashca ñucara yapa manzhachihuaca, pai rimaca monja tucusha catingaj ña mana iyaira charisha uctalla ringaj nihuaca chiraigu conventomanda ricani. Iyarini pai manzhaira charishcanga ñuca shujcunara iyaira turcachisha nisha.

Ñuca yayauna huasima rishcaibi paiguna intindihuanuca chiraigu chibi tarbana illajpi Alemania llactama ricani, chibi ñuca turi causaca. Ñuca turi Españamanda comunista muntunmanda aca. Paiguna tarbajcunamanda, huarmiuna dirichumanda difindij anuca chiraigu paigunahua ali sintiricani. Ñuca comunista huarmi tucucani chiraigu cai muntunmanda aj carihua casaracani. Comunista quillcaunara cuj acani shinallara marchagunama risha valichij cuinta sinticani.

Shinajpi timpu pasashcai llaqui sintiringaj callaricani. Comunista runauna paiguna yachachishcara mana pactachinuca. 1971 huatai casna sintirisha caticani, ñucanchi muntunmanda maltauna consulado español huasira Fráncfort llactai rupachinuca, paiguna caita ruranuca Españamanda gobierno manali rurashcaraigu. Paiguna rurashca ñucara mana gustahuaca.

Punda huahua pagarishcai, ñuca carira nicani cai muntun tandarinama rinara saquingarauni nisha. Ñuca sapalla sintiricani, mana pis ñucanchi amigogunamanda ñucara, ñuca huahuaras pasiasha ricungaj mana shamunuca. Ñuca tapuricani ¿imarasha causanchi? ¿Sirtu pachachu ali anga cai mundura alichingaj?

1976 huatai, España llactamanda shu Jehovahuaj testigoguna ñuca huasima shamunuca chibi Bibliamanda publicaciongunara ñucara cuhuanuca. Paiguna tigrashcai, ashca tapuigunara ruracani imarasha turmindarinchi, imarasha manali ruraiguna tiashcamanda. Ñuca manzharicani Bibliahua tucui tapuira cutipanujpi. Uctalla Bibliamanda estudiangaj callaricani.

Pundaibi yachangajlla munacani shinajpi ñuca carihua Jehovahuaj testigogunahua tandarinama ringaj callarishcaibi turcai tiangaj callarica. Chi timpuibi ishqui huahuaunara charicanchi. Jehovahuaj testigoguna ñucanchira tandarinama pushaj anuca chibi ñucanchi huahuaunara cuirangaj yanapaj anuca. Paigunara ashcara llaquingaj pactacani.

Shinajpis tucuira chara mana quiricani. España llactama ñuca aillura pasiangaj rishcaibi, ñuca tío sacerdote, Bibliara estudiangaj saquihuachu nica shinajpis chimanda Jehovahuaj testigoguna ñucara yanapanuca. Alemania llactamanda Jehovahuaj testigoguna rurashca cuintas paiguna Bibliahua ñuca tapushcara cutipanuca. España llactaibi ashcaibi ajllacani Bibliamanda estudiasha catingaj Alemania llactama tigrashcai. Ñuca Bibliamanda estudiasha caticani ñuca cari mana rurajpis. 1978 huataibi ñuca bautisaricani Jehovahuaj testigo cuinta.

Bibliamanda sirtu shimiunara yachana ñucara yanapahuashca cushi causaira charingaj. 1 Pedro 3:​1-4 huarmiunara camachin paiguna cariunara uyangaj shungumanda respetangaj, shungüi ali, cushi llaquij anuchu, “caimi ashca valin Diospa ñaupajpi”. Cai camachishca shuj Bibliamanda yachachishcauna yanapahuashca ali huarmi, ali mama angaj.

Quinsa chunga pichca huatauna pasanushca ñuca Jehovahuaj testigo tucushcamanda. Jehová Diosta tucui partimanda turi ñañaunahua Diosta adurasha cushi sintirini shinallara pichcamanda chuscu huahuauna ñuca ejemplora catinushca Diosta sirvingaj.