Pagaricani, iñacani shu pugri barrioi Roma llacta canzhai. Ñuca causai yapa shinzhi aca. Mana ricsicani ñuca mamara shinallara ñuca yayahua manali apanuj acani. Yachacani manali barrioi causasha.

10 huatamanda shuhuangaj callaricani, 12 huatai huasimanda ricani. Caran cuti ñuca yaya oficina policiamanda llucchingaj rij aca. Tucui huras runaunahua piñanuj, macanuj acani. 14 huata charishcai huasimanda ricani mana tigrangaj. Callegunai causaj acani drogasgunara utilizasha. Tuta pactashca shu autura pascasha chibi puñucani punzhayanagama shinajpi shu yacu pilara mascacani maillaringaj.

Ali shuhuaj tucucani. Imaras ruraj acani: callegunai bolsogunara quichunamanda, huasiunai tutauna shuhuanagama. Manali runauna cuinta ricsishca tucucani chiraigu cumbirahuanuca macanuj muntunmanda tucungaj. Chiraigu bancogunai shuhuangaj callaricani. Ñuca macanuna macanuj muntunmanda respetashca tucucani. Maican partimas illapa illaj mana ricani, astaun uma saunai illapahua puñuj acani. Macanauna, drogaguna, shuhuana, tacarina, manali shimiunas ñuca causai tucunuca. Tucui huras policiaguna mascanuj anuca, ishcashca ashca cuti acani. Ashca huatauna callei carcelbi pasacani.

Ashca cuti carcelmanda llucshishcai shu ñuca tiagunara visitangaj ricani. Ñuca mana yachacani shinajpi pai, ishqui ñuca primoguna Jehovahuaj testigoguna anuca. Paiguna cumbirahuanuca paiguna tandarinaunama, chasquicani ricunamandalla. Tandarina huasima pactashcai, rimacani cuna pungu mayambi tiangaj pi icushca llucshishca ricungaj. Illapahua tiacani.

Chi tandarina ñuca causaira turcachica. Iyaricani: “¡Shuj mundui tiashca cuinta!”. Tucui partiunai runauna asishca cushi anuca. Cuna punzhagama Jehovahuaj testigoguna cushi ashcara ricushca ñuca iyaibi charini. ¡Cai shuj tunu aca ñuca ricsishcamanda!

Jehovahuaj testigogunahua Bibliara estudiangaj callaricani. Ñuca estudiana catiushcai, riparacani ñuca causaira tucuibi turcachina ashcara. Caticani Proverbios 13:20 rimashca shimira: “Sabiru runaunahua purij runa sabirumi tucunga, shinajpi mana casujcunahua purij runa manali tucungami”. Intindicani macanuj muntunhua tucuchinara. Mana ruranalla aca. Shinajpi Jehová yanapaihua rurarcani.

Shinallara ñuca aichara pichacani. Ashca ursaihua tabaco chupanara, droga utilizanaras saquicani. Suni accharas piticani, rinrii aretegunara, manali shimiuna utilizanaras saquicani. Chi huraspi ñuca rurashcaunara alichina ushashcara sinticani.

Mana ima huras gustahuaca leanara, estudianara, shinasha Bibliara estudiana yapa shinzhi aca. Shinajpi ansa ansa Jehovara llaquingaj callaricani. Cungaimanda, ñuca iyai turcaringaj callarica, ñuca iyai turbachica. Caran huras ñucallara manali sintiricani shinallara iyacani Jehová mana ima huras ñuca manali rashcaunara perdonangachu. Chi huraspi shu cuintashca leacani, Jehová Rey David runara imasna perdonashcamanda, atun uchauna rurashcaras, chiguna cushiyachihuanuca (2 Samuel 11:1–12:13).

Yapa shinzhi aca paiguna huasii runaunara yachachingaj (Mateo 28:19, 20). ¡Manzhai charicani ñaupa maican huajlichishca runaunara tupangaj! Shinajpi ansa ansa manzhaira saquicani, callaricani runaunahua rimangaj ñucanchi sumaj Yaya Diosmanda, pai ñucanchira perdonan.

Jehovara ricsina causaira quishpichihuaca. Ashca ñaupa amigogunamanda maicanguna huañushca cárcel anun. Randi, ñuca cushi ani shu sumaj causaira shamuj punzhai charisha. Yachashcani mansu, casuj angaj shinallara mana milli piñarinaras charingaj, chita rurashcamanda ñuca rayai tiajcunahua ali apanuni. Yapa cushi ani casarasha shu sumaj huarmi Carmen shuti. Pariju ñucanchi vecinogunara Bibliara ali ricsingaj yanapanchi.

¡Mana pacha!, cungarishcani, cuna shu ali tarbanara rurani. Maican hurasguna bancogunai tarbasha catini, shinajpi cuna mana shuhuangaj an, randi pichangaj.