Ichilla ashcai Leipzig mayambi causacani, ñaupa República Democrática Alemana partii, Polonia mayanlla shinallara República Checa mayanlla. 6 huatara charishcai ñuca yaya tarbanamanda Brasil llactama causangaj ricanchi, chi huasha Ecuador llactama.

14 huatara charishcai ñuca yayauna Alemania llactama cachanuca shu internado nishcai causangaj. Cuna yayaunamanda carui acani chiraigu ñucallara cuirarina acani. Ñucallara tucuira ruraj acani shinajpi mana iyaricani ñuca rurashcaunahua shujcunara llaquichina ashcara.

Ñuca 17 huatara charishcai ñuca yayauna Alemania llactama tigranuca. Pundaibi paigunahua causacani shinajpi ñuca sapalla causashcai cuna ñuca yayauna rimashcara casungaj shinzhi aca, 18 huatara charishcai huasimanda ricani.

Caran cuti ñuca causaimanda yapa llaqui acani, chiraigu ñuca causaibi cushira mascacani. Ashca muntungunara shuj organizaciongunaras mascacani shinallara iyaricani cai allpara mas ricsingaj manara runauna llaquichishcallaira.

Shu motora randicani, Alemania llactamanda África llactagama ricani. Chi huasha Europa partima tigrana acani moto huajlishcamanda. Motora alichishca huasha Portugal llactama shu playama ricani. Chibi iyaricani, motora saquisha intiru mundura barcui pasiasha ringahua munacani.

Shu malta muntun runaunama llutaricani paiguna Atlántico lamar yacura chimbangaj purunturianuca. Paigunahua aca Laurie, pai ñuca huarmi tucungaj pactaca. Caribe islagunama ricanchi, Puerto Rico llactai ansa timpu ashca huasha, Europa partima tigracanchi. Ñuca, Laurie shu barcura tupana munacanchi chibi causangahua. Quinsa quillaunara mascashcai mascanara saquina acanchi, Alemania llactai cuartelma rina ashcamanda.

Chunga pichca quillauna lamar yacui shuj suldaruunahua acani, chi timpui Laurie huarmihua casaracani. Chi huasha intiru mundura ricsisha catina munacanchi. Manara cuartelma rishcallaira shu barcura randicanchi, cuartelbi ashcai, intiru mundura pasiangaj ringahua cai barcura ansa causana puistura turcachisha caticanchi. Cuartelmanda llucshishcai manara barcura tucuchishcallaira Jehovahuaj testigoguna ñucanchihua cuintarinuca chibi Bibliamanda yachangaj callaricanchi.

Pundaibi mana yachacani ashca turcaigunara ruranara: ñuca causaushca huarmihua casaracani shinallara tabacu tsunganaras saquishca acani (Efesios 5:5). Shinajpis ñuca causaira alira utilizangaj intiru mundura pasiasha Dios sumaj rurashcaunara ricungaj ali ashcara iyacani.

Sirtu pacha chara ñuca causaibi turcarisha catina acani. Chara ahuayarishca, ñucallara rurana munaj acani, ñucallara ahuayarina munacani rurana ushashcamanda. Ñucallai iyaj acani.

Shu punzha Jesús Urcui Yachachishcaunara leacani (Mateo, capítulo 5-7gama). Pundaibi manzharicani Jesús rimashcara cushi anamanda. Pai rimaca cushi ana yarcai, yacura upinayachij runaunajlla nica (Mateo 5:6). Tapuricani imasna yarcaihua yacura upinayachij runa cushi anga nisha. Bibliamanda mas yachasha catiushcai riparacani tucuiguna ministinchi Yaya Diosta ricsingaj shinajpi punda ñucanchillara riparana anchi caita ministishcara. Cai Jesús rimashca cuinta an: “Yaya Diosmanda yachana munai iyaira charijcuna cushiunami” (Mateo 5:3, TNM).

Laurie, ñuca Alemania llactai Bibliamanda yachangaj callaricanchi shinajpis huasha Francia, Italia llactama ricanchi. Maican partiis Jehovahuaj testigoguna tiaca. Ashca gustahuaca paigunamanda tucui huras paiguna huangurishca anuca, huangurishca llaquinunara ricuchinuca. Ricucani intiru mundui huangulla aillu cuinta ashcara (Juan 13:34, 35). Timpu pasashcai Laurie, ñuca bautisaricanchi.

Jehovahuaj testigo ashas turcarisha catina acani. Laurie, ñuca ñucanchi rurana iyaira ajllashca acanchi barcui África costa partira ringaj, Atlántico lamar yacura chimbasha Estados Unidos llactama pactangaj. Chaupi lamar yacui ashcai ñuca huarmillahua shu ichilla barcui ñucanchi mayambi ashca yacuunahua ashcai chibi ñuca riparacani mana imas anchi tucuira Ruraj Dioshua ricusha. Ashca timpura charicani (lamar yacu ucui mana imas charicanchi rurangaj) chiraigu Bibliara leangaj callaricani. Jesús causaimanda cuintashcauna ñucara ashcara iyachihuaca. Jesús ucha illaj ashas ali runa ashas mana paillara ahuayarica. Paihua causaimanda mas valij aca paihua Yaya, mana paillara.

Jesús rurashcaunai iyarisha riparacani ñuca munashca cosasgunara rurana randimanda Diospa Reinora ñuca causaibi pundai churana acani (Mateo 6:33). Estados Unidos llactai barcumanda llucshishcai intiru mundura pasiangaj yacharishcara saquicanchi chibi causangaj shinallara Yaya Diosta sirvingahua.

Ñaupa ñucallai iyarishcai mana ima huras yachacani ima pasangaraushcara ñuca ajllashcahua. Cuna tupashcani sabiru Dios ñuca causaira dirichuchu (Isaías 48:17, 18). Cuna yachani imara rurana ani ñuca causaihua: Diosta aduranara, runauna Diosta ricsingaj yanapanaras.

Ñuca huarmi Lauriehua mas ali causanchi Biblia camachishca yanapaigunahua. Shinallara Jehová shu gustu ushihua bendiciashca, pai Jehovara ricsisha llaquingaj pactashca.

Ñucanchi causai mana ahualla ashca. Shinajpis Jehová mana ima huras saquishca, mana sambayasha tucui huras paibi quirina munanchi (Proverbios 3:5, 6).