Ñuca iñacani Los Ángeles llacta pugri barriogunai (California, Estados Unidos), chi barrioguna ricsishca anuca drogaguna pandillerogunas tiashcamanda. Sucta churiunamanda ishqui acani.

Huahua ashcai ñuca mama shu iglesia evangelicama pushaj aca. Shinajpi malta ashcai iglesiai yachachishcara mana catij acani. Domingo punzhauna chi iglesiai cantaj grupohua cantaj acani, shinajpi shuj punzhauna istaunama rij acani, drogagunara upisha, tacarina uchaunara rurasha causacani.

Yapa piñaj ashcamanda imamandas macanungaj munacani. Macanunara ganangaj imahuas apisha macanuj acani. Iglesiai yachashca mana yanapahuaca. Maspas rimaj acani: “Macanuna Señorbaj an, ñuca paita sirvisha yanapani” nisha. 1960 huata tucurishcai 18 huata charisha, Panteras Negras político muntun rurashcara gustangaj callaricani paiguna runauna dirichura difindingaj tarbashcamanda. Paiguna cuinta difindij maltauna muntunma icucani. Ashca cuti paroguna rurashcamanda escuelaguna clasesgunara saquina anuca.

Shinajpi chita rurashas mana cushi sintiricani. Shungüi chijnina charishcamanda yapa manali ruraigunara rurarcani. Ñuca amigogunahua cinema rij acanchi Estados Unidos llactai África esclavogunara llaquichishcamanda peliculagunara ricungaj. Esclavogunara imasna llaquichishcara ricushcamanda yapa piñarisha cinei tiaj yuraj runaunara macangaj callaricanchi, shinallara yuraj runauna tiaj barriogunamas ricanchi paigunara shinzhi macangaj.

Chi timpui, ñuca huauquiuna ñucas ashca manali cosasgunara rurashcamanda policiagunahua problemagunara charicanchi. Ñuca quipa huauqui yapa manali pandillerogunahua tiaca, ñucas paigunahua puricani. Shina ñuca causai caran cuti manali riuca.

Ñuca amigo yayauna Jehovahuaj testigoguna anuca, shu punzha paiguna tandarinaunama cumbirahuanuca. Punda rishcai riparacani chibi tiaj runauna shuj tunu ashcara. Tucuiguna quiquin Bibliagunai leanuca. ¡Huahuaunas ñaupama pasasha rimaj anuca! Manzharishca saquiricani Diospa shuti Jehová ashcara yachasha, chibi ajcuna chi shutira rimashcara uyashas (Salmo 83:18). Ashca runauna shuj llactaunamanda ashas paigunapura llaquishcara ricuchinuca.

Pundallai, mana munacani Bibliamanda yachachihuanuchu, shinajpi tandarinaunama ringaj gustacani. Shu tuta paiguna tandarinai ashcai, huaquin ñuca amigoguna shu cantaj runara uyangaj risha shu maltara huactasha huanchinuca paihua chompahua saquiringaj. Cayandi punzha paiguna rurashcamanda ahuayarisha rimanuca. Juicio huraspi paiguna mana imaras rurashca cuinta anuca. Huaquingunara carcelma huañunagama tiangaj cachanuca. ¡Yapa cushi acani chi tuta paigunahua mana rishcamanda! Cai pasashcai riparacani ñuca causaira turcachina ashcara, chiraigu Bibliara estudiangaj callaricani.

Shuj llactamanda aj runaunara chijnisha iñashcamanda, manzharishca saquiricani Jehovahuaj testigoguna imasna ashcara yachasha. Shu punzha, shu yuraj Jehovahuaj testigo shuj llactama rina ashcai paihua huahuaunara shu yana aillu cuirangaj saquica. Shinallara shu yuraj aillu shu yana huaccha maltara paigunahua causangaj saquinuca. Chi ricuchihuaca Jehovahuaj testigoguna Juan 13:35 Jesús rimashca shimira pactachishcara, chibi nin: “Caimanda tucui runauna canguna ñuca yachachishca runauna ajcunara ricsinaungami, cangunara parijumanda llaquinanaupi”. Chi quirichihuaca sirtu amigoguna tupashcara.

Bibliara estudiasha catiushcai riparacani ña mana piñaj runa asha catina ashcara. Shinzhi ursarina acani mana piñarisha causangaj, ñuca shungumanda piñanaras saquingaj (Romanos 12:2). Ansa ansa turcarisha ricani, huasha enero 1974 huatai bautisarisha Jehovahuaj testigo tucucani.

Bautisarishca huasha ursarisha catina acani mana piñaj angaj. Shu punzha shu barrioi Bibliamanda yachachingaj pasiaushcai shu shuhuaj runa ñuca autumanda radiora apaushcara ricucani. Pai huashalla callpasha caticani. Paita apingaraushcai radiora allpama shitasha callpasha catica. Shuj huauquiunara imasna ñuca radiora quichushcara cuintashcai, shu anciano huauqui nihuaca: “Shuhuaj runara apisha ¿imara ruranguimaca?”. Chi tapui riparachihuaca ñuca piñanara chara saquisha catina ashcara.

Octubre 1974 huatai intiru timpu Diosta sirvinai callaricani. Caran quilla cien horasguna shuj runaunara Bibliamanda yachachisha pasacani. Huasha intiru mundui pushaj oficina Brooklyn (Nueva York) llactai sirvingaj cumbirahuanuca. 1978 huatai Los Ángeles llactama tigracani ñuca ungushca mamara cuirangaj. Ishqui huata huasha Aarhonda huarmihua casaracani. Pai ashcara yanapahuaca ñuca mama huañunagama cuirangaj. Huasha Escuela Bíblica de Galaad de la Watchtower nishcama ringaj cumbirahuanuca. Escuelara tucuchishca huasha, misioneroguna cuinta Panamá llactama sirvingaj cachamunuca, chibi cunagama sirvinchi.

Ñuca bautisarishca hurasmanda maican huras shinzhi ashca ñuca piñarinara arcangaj. Piñanujpi chimanda rini ñuca mana piñaringaj. Ashca runauna, ñuca huarmis felicitahuanushca ganaslla shungura charingaj ushashcamanda, turcana ushashcamanda, ñucas manzharini. Ñuca quiquin ushaimanda mana turcana ushanimaca. Maspas intiru shunguhua quirini ñuca turcana ushacani Biblia runauna causaira turcachingaj ushai charishcamanda (Hebreos 4:12).

Biblia ñucara yanapahuashca cushi causangaj, tucui runaunahua ganaslla causangaj yachachihuashca. Cuna runaunara ña mana macani, chi randimanda paigunara yanapani Yaya Diosta ricsinuchu. Colegiomanda ñucara chijnij runara Bibliamanda yachachingaj callaricani. Pai bautisarishca huasha pariju shu huasillai causacanchi, cuna hurasgama ali amigoguna anchi. Cunagama ñuca huarmi ñucas ochenta yali runaunara yanapashcanchi Jehovahuaj testigoguna tucunuchu.

Jehová Diosta tucui shunguhua pagarachushca sintirini sumaj cushi causaira cushcamanda, sirtu ali amigogunara charina ushashcamandas.