Pagaricani Acul llactai, urcuunai Guatemala partii. Ñuca aillu ixil partimanda anun, anuca shu muntun mayas mirarishca partimanda. Mishu shimira rimanamandas, ñucanchi shimii rimangaj yachacani. Iñacani ñuca llactai guerraguna tiashca timpui, quinsa chunga sucta huatauna rurasha catica. Chi guerragunai ashca ixiles nishca runauna huañunuca.

Chuscu huatara charishcai, ñuca huauqui canzhis huatara charij shu bombahua maquii charisha pujllaushcai tujyaca. Chi tucushca huasha, ñuca ñahui mana ricuna ushacani, ñuca huauqui huañuca. Chi timpumanda shu mana ricujcunaj escuelaibi pasacani Guatemala llactai, chibi leangaj braille shimii yachacani. Mana yachacani imarasha chibi tarbajcuna shuj huahuaunahua rimangaj mana munanuca, ñucara cumpañajcuna mana llutarinuca. Tucui huras sapalla acani, munacani ishqui quillauna pactanuchu ñuca mamahua timpu pasangaj, pai acami yapa llaquij shungura charij ñucahua. Ñuca 10 huatara charishcai huañuca. Ñuca llaqui sintiricani, pai acami shu mama ñucara tucuimanda yapajta llaquij.

Chunga shuj huatara charishcai, tigracani ñuca llactama ñuca yaya churihua paihua ailluhuas causangaj. Ñuca ministishcaunahua yanapanuca shinajpis ñuca iyarishcahua mana pihuas yanapana ushahuanucachu. Huaquimbi huacacani Yaya Diosta rimasha: “¿Imarasha ñuca mama huañuca nisha? ¿Imarasha mana ricuna ushaj saquiricani nisha?”. Huaquin runauna rimanuj aca Yaya Dios caita casna canda rurashca nisha. Chiraigu iyacani Yaya Dios manali ashcara. Ushashca asha, ñucallara huañunimaca.

Mana ricushcamanda ñucallara ñuca iyaihuas cuirarinara mana ushacani. Huahua ashcai, shujcuna ashca cuti ñucara huajlichihuanuca. Mana ima huras cuintacani ñucara pasashcamanda, iyacani mana pitas cai ñuca pasashca valinzhu nisha. Runauna huaquimbi rimanujlla aca. Ashca timpu llaqui acani mana gustacanichu shujcunahua angaj shinajpi maicambis mana quiricani.

Chunga quinsa huatara charishcai, shu Jehovahuaj testigoguna casarashcauna cuintahuaca escuelai chaupi tutamanda samana huraspi. Shu profesora ñucamanda llaquirisha mañashca aca pasianuchu nisha. Paiguna rimahuanuca Biblia ima nishcara ricunara mana ushajcuna ricuna ushanunga shinallara huañushcaunas causarina ashcara (Isaías 35:​5; Juan 5:​28, 29). Uyangaj gustahuaca shinajpi runaunahua mana cuintarij asha chunlla saquiricani. Shina ashas, ñucahua llaquij chapaisiqui shungura ricuchisha catinuca, pasianuca Biblia nishcara yachachingaj. Ashca timpu urcuunara ñuca causashca partima pactamungaj purina anuca.

Ñuca huauqui rimahuaca imasna anushcara, rimahuaca paiguna pugri runaunas ashas sumaj alichirisha rinuj ashcara. Ricurica paiguna llaquishcara shinajpis ichilla cuyanahuara cunuj aca. Ñuca alira yachacani ali Jesusta catijcunalla ashca, sacrificiora ruranunga yanapangaj.

Bibliamanda yachaushcai braille shimii publicaciongunara utilizacani. Yachacani imamanda yachaushcara shinajpis maican yachachishcaunara mana apina ushacani. Shu ejemplo, huaquimbi shinzhi aca quiringajlla Dios ñucara llaquishcara shinallara imasna shujcunas ñucara Yaya Dios ricushca cuinta ricunuchu. Intindicani imarasha cuna turmindusguna tiachu saquin nisha shinajpis shinzhi aca ricungaj llaquishca Yaya cuinta. *

Ansa ansa Biblia ima nishcara yachaushcai, ñuca iyarishca turcarisha catica. Shu ejemplo, yachacani Yaya Dios ashcara llaquirin ñucanchi turmindarinujpi. Maspas paita sirvijcunara shujcuna nanachinujpi, pai nin: “Ricushcani ñuca llacta nanarishcara [...]. Alira ricsini paiguna turmindarishcara” (Éxodo 3:7). Riparacani Jehová Dios llaquij shungura charishcara, chiraigu ñuca causanara paita sirvinama mingana munacani. 1998 huatai bautisaricani Jehovahuaj testigo tucungaj pactacani.

Shu huata bautisarishcaimi, shu curso rurarcani mana ricuj runaunaj Escuintla llactaibi. Shu Tandarijcunara Cuiraj yachangaj pactaca ñuca tandarinaunama ringaj shinzhi ashcara Acul llactai, urcuuna mayangunara rina acani imasna ñucara Bibliamanda yachachishca casarashca Jehovahuaj testigoguna rishca partillaira. Ñucara yanapangahua cai huauqui tupaca shu aillu Jehovahuaj testigoguna paiguna huasii saquiringaj shina rurasha tandarinaunama ringahua. Cuna punzhagama cuirahuanun shu aillumanda parti cuinta.

Cuintana ushaninma ashca ejemplogunara imasna huauqui paniuna llaquishcara ricuchishcara. Sirtu pacha yachani Jehovahuaj testigogunahua asha, sirtu Jesusta catijcuna ucuibi animi (Juan 13:34, 35).

Ña mana sintinichu mana valishca, mana chapaira charina cuinta, cuna ñuca causai ima rurana ashcara charini. Ñuca ungushcaibi iyarina randimanda, cuna ashca timpu shuj runaunara yanapangaj sirtu Biblia nishcara yachachingaj rurani. Shu Tandarijcunara Cuiraj ani, mayanlla congregaciongunaibi shu discursogunara Bibliamanda cuni. Shu atun asambleagunaibi ashca runauna uyashcaibi discursogunara cunamanda pagarachuni.

2010 huatai, graduacani Escuela de Entrenamiento Ministerial (cuna cayashca Escuela para Evangelizadores del Reino nishcai) El Salvador llactai. Cai escuela yanapahuashca sirvingaj mas ali ñuca huauqui paniunara. Shinajpi alira yachachihuashca ali valichishca sintingaj shinallara Jehová Dios llaquishca, pai rurana ushan maicans mingashca tarbanara pactachinuchu.

Jesucristo nica: “Apinamanda yali, cuyana mas valin cushi tucungaj” (Rashcauna [Hechos] 20:35). Shu cushi runa ani, iyacani mana ima huras shina angaj pactashami nisha, cuna sintirini shuj runaunaras yanapana ushashcara.