Jesús paita catijcunara nica: “Ñucamanda rimajcuna anguichi [...] cai pacha puchucai pundagama” (Hechos 1:8). Cuna punzhaunai, Jehovahuaj testigoguna cai mandashcara ali pactachinchi. Shinajpis, maican atun llactaunai mana tucui runauna Bibliamanda yachachishca anun. Shinallara maican llactaunai ansa testigoguna tianun (Mateo 9:37, 38). Ricushun imara ruraunchi ashca runaunara Bibliamanda yachachingaj.

 Jesús mandashcara pactachisha catingaj, Jehovahuaj testigoguna Comité de Servicio del Cuerpo Gobernante sirvij huauquiuna misionerogunara cachanun intiru mundui ministishca llactaunama. Cuna timpui 3.090 misioneroguna tianun. a Ashcauna ñucanchi escuelai yachachishcara chasquinushca. Chigunamanda shu an, Escuela para Evangelizadores del Reino. Cai huauqui paniuna paiguna huasiuna saquisha caru llactaunama rinushca. Cai ali sirvijcuna paiguna ali yachachishcahua, ali rurashcaunahua, camachishcaunahua, Bibliamanda yachachisha catingaj yanapanun, shina rurasha mushuj Bibliamanda yachachijcunara yanapanun.

 Caran llactai Comité de Sucursal, Sección de Ministros en el Campo del Departamento de Servicio sirvij huauquiuna tarbanun misionerogunara yanapangaj, ricunun huasi charinuchu, doctorma rinuchu shinallara ansa cullqui cunun paiguna ministishca cosasgunara charinuchu. 2020 sirvina huatai, Jehovahuaj testigoguna ñaca 27 millones de dólares misionerogunara cuirangaj gastanuca. Cai yanapaira charisha misioneroguna paiguna tucui timpura utilizanun Bibliamanda yachachingaj, shinallara paiguna sirviushca congregacionda shinzhiyachingaj.

 Misioneroguna Bibliamanda yachachingaj ¿imasnara yanapanun? Malaui llactai Comité de Sucursal sirvij huauqui Frank Madsen nin: “Cai mana manzhaj huauqui paniuna congregaciombi tiaj shinzhi territoriogunai sumaj yanapanun Bibliamanda yachachisha, shinallara shuj shimiunara yachasha. Astaumbas paiguna sirviushca llacta yachanara, shimiras yachangaj ursarisha shujcunara animachinun, paiguna rurashcara ricusha maltauna intiru timpu Diosta sirvingaj munanun. Misioneroguna yanapaira charishcamanda Jehovara pagarachunchi”.

 Shuj llactamanda Comité de Sucursal sirvij huauqui nin: “Misioneroguna rurashcaunahua ricuchinun Jehová llacta pariju ashcara intiru mundui. Astaumbas, mana testigoguna ricuna ushanun caran llacta yachashcaunamanda mana chican chican anchi, maspas Bibliamanda yachachishcauna yanapashca shu aillu cuinta tucungaj”.

 ¿Imasnara misioneroguna congregacionmanda huauquiunara yanapanun? Timor Oriental llactamanda huauqui Paulo paihua congregacionma misioneroguna cachamushcamanda ashca pagarachushca sintirin. Pai nin: “Ñucanchi llactai yapa rupachin. Paiguna chiri llactamanda shamushas, rupai paiguna Bibliamanda yachachinara mana arcashca. Tucui huras Bibliamanda yachachina llucshingaj tandarinaunai tianun. Chaupi punzha indi yapa rupachijpis tucui huras ricuni paiguna cuti runaunara pasiangaj rishcara, shinallara tutai. Ashca runaunara, ñucaras sirtu shimira yachangaj yanapanushca. Cushiyasha intiru shunguhua paiguna causaira utilizanun Jehovara sirvingaj, chita rurasha cai intiru congregacionda animachinun Jehová Diosta mas sirvingaj”.

 Malaui llactamanda shu precursora regular Ketti pani cuintan imasna shu casarashca misioneroguna paihua aillura yanapaca: “Cai misioneroguna ñucanchi congregacionma pactamushcai, ñuca aillumanda ñucalla testigo acani. Cai casarashcaunamanda ali yanapai chasquicani, ñucanchi aillumanda mas ali amigoguna tucunuca. Paiguna ali ejemplo ñucanchi huahuaunara yanapaca ricungaj Jehovallara sirvisha yapa cushi causai charishcara. Cai misioneroguna animachishcamanda, ñuca quinsa ushushiuna precursor regular cuinta sirvinun, shinallara ñuca cari tandarinaunama ringaj callarishca”.

 ¿Maimanda cullquira charinchi misioneroguna ministishcara pagangaj? Intiru mundui Bibliamanda yachachingaj cuyashca cullquihua, maicanguna Internetpi donate.pr418.com nishca puistui cuyanun. Ashcara pagarachunchi canguna cuyaj shunguhua cushcamanda.