2020 huatai shinzhi turmindusguna tianuca shinallara intiru mundui coronavirus pasachij ungüi tiai callarica. ¿Imasnara Jehovahuaj testigoguna turmindus pasaujcunara yanapanchi?

 2020 sirvinamanda pasaushca huatai, a Cuerpo Gobernantemanda Comité de Coordinadores sirvij huauquiuna ajllanuca 28 millones de dólares b utilizanuchu shinzhi turmindus pasaushcai yanapangaj. Cai cullquihua 200 yali turmindusgunamanda llaqui pasaujcunara yanapana ushacanchi, caigunamanda anun: coronavirus pasachij ungüi, ashca manzhanaita shinzhi huairauna, África llactai yacu undanauna, Venezuela llactai micuna pishijpi, Zimbabue llactai yapa chaquishca tucujpi. Cai cushca cullquihua yanapana ushacanchi micuna, yacu, maibi causangaj, churana, ambiunara charinuchu. Shinallara runauna ministishcaunara charingaj, huasiunara alichingaj, cutillara shayachingaj. Llaqui pasaujcunara yanapashcamanda huaquin ejemplogunara ricui.

 Coronavirus ungüi. Intiru mundui cai pasachij ungüi ñucanchi huauqui paniunara paiguna causanara, sintinaras, charishcaunaras llaquichica. Paigunara yanapangaj intiru mundui 800 Comités de Socorro ruranuca. Cai comitegunamanda huauquiuna ñucanchi huauqui paniuna ministishcara yachanun, dsaslla cuintanun Comité de Coordinadores sirvij huauquiunara paiguna ministijcunara alira yanapanuchu.

 Pasashca huatai, Comités de Socorro sirvij huauquiuna, ashca runaunara micuna, yacu, ministishca ambiuna shuj ministishcauna cunuca. Shuj lugargunai, tandarijcunara cuirajcunahua pariju tarbanuca huauquiuna gobiernomanda yanapaira charinuchu.

 Mana Testigo runauna ñucanchi imasna yanapaushcara ricunushca. Nakonde (Zambia) llactai, Field Simwinga policiamanda apu runa ñucanchi huauquiunara nica: “Mas ministishca huraspi turmindus pasaj ailluunara canguna yanapashcamanda dibiyuj sintirinchi”.

 Angola llactai micuna pishishcai. Cai llactai coronavirus pasachij ungüimanda micuna pishingaj, yapa valingaj callarica. Ñucanchi huauqui paniuna micunara randingaj caran cuti mas shinzhi tucuca.

 Chimanda Brasil sucursalmanda huauquiunara mañanuca micunara cachanuchu Angolamanda huauquiunara ministishcai yanapangaj. Cushca cullquira ali utilizangaj huauquiuna alira ricunuca micunaunara imasna randisha cachangaj, chimanda ashca quintalguna micunaunara randinuca. Caran shu 44 librasguna charij bolsara randisha cachangaj 22 dólares valica, charica arroz, purutuguna, aceitegunas. Cunagama 35.544 cachamushca, tucui 654 toneladas charica. Caran llactai tiaj micunaunahua 50.000 yali runaunara micuna charingaj yanapanuca.

 ¿Imasnara ñucanchi huauqui paniuna sintirinun cai yanapaira chasquishcamanda? Alexandre, Angola llactai caru partii causaj nin: “Cai yanapaihua Jehová ricuchihuashca paihua llaquinara, mana sapalla saquihuashca shinallara paihua organización ñucara valichihuan”. Mariza cari illaj mama nin. “Jehová ñuca mañashcara uyaca paita pagarachuni paihua organizaciondas”.

 Zimbabue llactai yapa chaquishca tucushcai. 2020 sirvinamanda huatai cai llacta shinzhi chaquishca tucuca, huaranga runauna shinzhi yarcai charinuca. Ashca huaranga huauqui paniuna ansa micuna charinuca.

 Pichca Comités de Socorro ruranuca ñucanchi huauqui paniuna micuna charinuchu yanapangaj. Ashca Bibliamanda yachachijcuna micunara undachingaj, apangaj yanapanuca, shujcuna paiguna autuunara mañachisha yanapanuca. c 2020 sirvinamanda huatai, 691.561 dólares utilizanuca 22.700 yali runauna micuna charinuchu yanapangaj.

 Maican huauquiuna, paiguna charishca micunara ña tucuchica yanapaira pactashcai. Micunara apisha Jehová Diosta pagarachunuca. Maicanguna Reinomanda canciongunara cantangaj callarinuca.

 Shu partii, ishqui huaccha Jehovahuaj testigo huarmiuna, paiguna comunidad shu tandarinama rinuca, shu organización no gubernamental nishcamanda (ONG) yanapaira apinamanda cuintaringaj. Shinajpi, cai tandarinai politicamanda cuintangaj callarinuca chimanda ñucanchi paniuna ajllanuca paiguna mañashcara mana rurangaj chi yanapaira apingahua. Paiguna chi tandarinamanda llucshishcai tucuiguna paigunara burlarinuca casna nisha: “Cutillara mana shamunguichichu micunara mañangaj”. Shinajpi, ishqui semana huashallai ñucanchi huauquiuna chima pactanuca micunara cusha yanapangaj, mana gobiernomanda organización yanapaira manara cushcallaira.

 Zimbabue llactai shinzhi turmindus pasaushcai yanapai chasquishcara yapa alimi ashca. Prisca huarmi shu ichilla llactai causan. Chaquirishcamanda turmindusgunara charishcallaira, caran miércoles, viernes Bibliamanda yachachingaj llucshica, tarpuna timpu ajllaira. Pai llactamanda runauna paimanda burlasha rimaj anuca: “Bibliamanda yachachingaj llucshishcamanda camba aillura yarcaimanda huañunuchu saquingaraungui”. Prisca cutipaca: “Jehová paihua sirvijcunara mana ima huras saquishcachu”. Chita tucushca huasha ñucanchi organizacionmanda yanapaira chasquica. Maican vecinoguna chita ricusha manzharinuca, paiguna Prisca huarmira ninuca: “Dios canda ima huraspas mana saquishcachu paimanda mas yachangaj munanchi”. Cuna Prisca canzhis vecinoguna radiomanda tandarinaunara uyanun.

 Puchucai punzhaunai causashcamanda ashca shinzhi turmindusgunara charisha causangaraunchi (Mateo 24:3, 7). Internetpi donate.pr418.com puistui canguna yanapangaj shungumanda cushca cullqui ashca valishca an, shungumanda ashca pagarachu ninchi. Cai cushca cullquihua shinzhi turmindus pasaujcunara ministishcaunara cusha yanapana ushanchi.