Quinsa punzha asambleagunamanda videoguna shunguma pactanun, Bibliara intindingaj yanapanun. ¡Tucui huras cushiyaichi! 2020 quinsa punzha asambleai 114 videoguna tian, 43 videoguna Jehovahuaj Testigogunara Cuiraj Muntun huauquiunamanda, paiguna yanapajcunamanda yachachishcara uyanauna anun. ¿Can yachangui masna cullqui valin cai videogunara rurangaj?

 Intiru mundui ñaca 900 huauquiuna yanapanuca paiguna timpuhua, yachashcaunahua cai asambleara rurangaj. Tucuchingaj ministinuca ishqui huatauna, ñaca 100.000 horas tarbanuca. Caimanda Nehemías: Jehovamanda shamuj cushiyana ñucanchira shinzhiyachin nishca Bibliamanda cuintashca videogunara grabangaj 70.000 horas tarbanuca, cai ishqui videoguna 76 minutos duran.

 Yachanchi yanapajcunara ministishcara cungaj, grabana aparatogunara, shinallara grabangahua alichingaj ashca cullqui ministirica.

 Jared Gossman, Servicios de Audio y Video nishcamanda huauqui nin: “Jehovahuaj Testigogunara Cuiraj Muntunmanda Yachachingaj Comisión munan shuj llactauna causanamanda tunuuna ñucanchi videogunai tiachu. Cai tunu rurasha ricuchin intiru mundui imasna ñucanchi huauquiuna causanun. Caita rurangaj 11 llactaunamanda 24 muntun huauquiuna gunlla tarbanuca cai proyecto internacional rurangaj, caita tucuchingaj ashca tarbanauna, ashca cullqui ministica”.

 Ashca videogunara rurangaj ministinuca valij aparatoguna shinallara ashca lugargunara alichingaj. Nehemías: Jehovamanda shamuj cushiyana ñucanchira shinzhiyachin Bibliamanda cuintashca videogunara grabangahua, Patterson (Nueva York) mayambi tiaj Mount Ebo nishca grabangaj lugar alichingaj ministinuca. Cuyashca cullquira mana yapa gastangahua shinallara ñaupa Jerusalén llacta imasna ashcara ricuchingaj huauquiuna pangalla quinzhaunara ruranuca Jerusalembi ricurij cuintallara. Caran quinzha 6 metros tupu charica shinallara tablagunahua llutashca, pintashca aca rumiunahua rurashca cuinta ricuringaj. Cai quinzhaunara cuyuchina ushanuca ashca tunu grabangahua. Caita rurasha mana ashca quinzhaunara rurana ministinuca. Shina ajpi cai quinzhaunara rurangaj 100.000 dólares gastarica. a

 Cai tucui rurashcaunara yachasha cai huata quinsa punzha asambleara ashcara valichingaj yanapan. Sierto pacha quirinchi cai ashca ursarishcauna intiru mundui Jehová Diosta ahuayachin. Pagarachuna munanchi intiru mundui Bibliamanda yachachingaj cuyashca cullquira cushcamanda, maicanguna Internetpi donate.pr418.com nishca puistui cuyanun shinallara shuj tunuunai.