Achkaqmi manaraq casado kachkaspa kuska yachanku. Wakinkuqa chaytaqa ruwanku tupasqankuta utaq mana tupasqankuta yachanankupaqmi hinaspa casado kaspa mana rakinakuyman chayanankupaqmi. ¿Allinchu manaraq casado kachkaspa kuska kay?

Kaypim yachasun kaykunamanta

•  ¿Imanintaq bibliapi?

•  ¿Yaqachu kuska kaynikiqa yanapasunki casarakunaykipaq?

•  ¿Yaqachu kuska kaynikiqa yanapasunki qullqichaykichikta huñunaykichikpaq?

•  ¿Kuska kaynikiqa yanapasunkichu allinta akllanaykipaq?

•  ¿Imataraqtaq ruwawaq?

•   Bibliapiqa nin casadokunalla kuska puñunankupaqmi. Kaynatam nin: “Diosqa munan [...] mana huchapakunaykichiktam” (1 Tesalonisenses 4:3; 1 Corintios 6:18). Kayqa manaraq casarakuyta piensaspa uywanakuqkunapaqwanmi. a Bibliapi yachachikuykunaqa yanapanmanmi manaraq casado kachkaspaqa mana wawa-churiyuq kanankupaq ima sasachakuymanpas mana chayarunankupaq.

•   Casado vidataqa Diosmi rikurichirqa. Kaynatam nirqa: “Qariqa tayta-mamanta saqispan warminmanña hukllawakunqa, chaynapim paykunaqa hukllaña kanqaku” (Genesis 2:24). Casarakuyqa allinmi warmi-qari kuyanakuspa kusisqa kawsakunapaq.

 Wakinkunam ninku: “Awriki” nispa. Ninkum kuskanku imapas ruwasqanku allin kasqanta, allinta riqsinakunankupaq yanapasqanta. Ichaqa casado vidankupi allin kawsakunankupaqqa nisqankuman hinam ruwananku.

 ¿Imaynatataq imaña kaptinpas kuska kawsakuyta atinmanku? Ima sasachakuypiña kaspankupas mana karunchanakuspankum, mana saqinakuspankum. Aswanqa nisqankuman hina ruwaspankum ima sasachakuytapas allichananku.

 Chaynaqa: Manaraq casado kachkaspa kuska kaqkunaqa riqsinakunku manam casarakunankupaqchu, aswanqa rakinakunankupaqmi.

 Bibliapim nin: “Runaqa imapas tarpusqantam cosechanqa” (Galatas 6:7).

 Wakinkunam ninku: “Awriki” nispa. Estados Unidospi runakunata tapuspankum yacharunku kayta, chunkamanta tawa runakunas kuskanchakusqaku qullqichankuta huñuyta munaspanku. Ichaqa tiempopa risqanman hinas mana qullqiyuq rikurirusqaku. Chaywansi cuentata qukurusqaku manaraq casarakunankupaq hina kasqankuta.

 Manaraq casado kachkaspa kuska kayqa sasachakuymanmi pitapas aparunman, aswanraqmi warmikunataqa. Qari saqiruptinqa warmikunamiki wawakunataqa uywanku.

 Chaynaqa: Manaraq casado kachkaspa kuska kaqkunaqa aswan sasachakuypim tarikunku casado kaqkunamanta.

 Bibliapim nin: “Ñuqam Jehova Diosnikiqa kani, allinnikipaq yachachiqnikim kani” (Isaias 48:17).

 Wakinkunam ninku: “Awriki” nispa. Huk libropim nin: “Manaraq casarakuchkaspa kuskaña kaspankuqa, imapas mañankumanta cuentata qukuruspankupas manam chayllaqa saqinakuyta atinchu”, nispa. ¿Imaynataq chayqa? Kuska yachaqkuna cuentatam qukunku mana tupasqankuta. Ichaqa manam saqinakunkuchu imapas uywanku kuskankupa kasqanrayku, wasita kuskanku ariendasqankurayku, wiksayuq utaq churiyuq rikurirusqankurayku. Chaymanta yachaq runakunam ninku: “Mana allin kaspapas kuskanchakusqanku hinallam kuska kanku”, nispa. b Hina chay libropim nin: “Casarakunankupaq mana tupasqankuta yachaspankupas ñawpaqllamanñam riku aswan sasachakuypi mana tarikuyta munaspanku”, nispa (Fighting for Your Marriage).

 Chaynaqa: Allinta tantiakunaykipaq kananmantaqa, kuska yachayqa aswan sasachakuymanmi apasunki, imamanta cuentata qukuspaykipas manam chayllachu saqinakunki.

 Bibliapim nin: “Allin tantiuyuq runaqa sasachakuyta qawarispanmi asurikun, mana yuyayniyuq runam ichaqa mana asurikusqanrayku ñakarin” (Proverbios 22:3).

 Atiwaqmi sasachakuykunaman mana chayayta, casado vidaykipi hawka kawsakuyta. ¿Imaynata? Casado vidamanta bibliapi nisqanta kasukuspam. Puntataqa amaraq kuska yachachkaspa suma-sumaqtaraq riqsiykuy. Allintam akllanki imayna kasqanqa yachaspaykiqa, mayqan religion kasqanta yachaspaykiqa, chaykunata yachaymi aswan allin puñuyta munasqaykiraykulla kuskanchakunaykimantaqa.

 Bibliapim kan yanapakuykuna casado vidaykipi kusisqa kanaykipaq, allinta takyanaykipaq. c Chaykunaqa yanapasunkimanmi . . .

•   mana hukwan pierdekunaykipaq

•   casado vidaykipi allin qari utaq allin warmi kanaykipaq

•   riqsinakuchkaspallaraq imayna kasqanmanta cuentata qukunaykipaq

 Kaymanta astawan yachayta munaspaykiqa maskay “Ayllukunapaq” niqta jw.org niqpi.

 Bibliapim nin: “Diospa llapallan palabranqa atiyninwan qillqachisqam kachkan, allinmi runakunata yachachinapaq” (2 Timoteo 3:16).