“¿Manachu kikiypuni nirqayki ‘kallpanchakuspayá qarinchakuy’ nispay? Hinaptinqa amayá manchakuychu nitaq hukmanyaychu, ñuqa Jehova Diosnikim maypiña kaptikipas qanwan kasaq, nispa” (Josuey 1:9, Musuq allpa pachapi kawsaqkunapaq biblia).

 ‘Ñuqam kamachiki kallpanchakunaykipaq chaynataq qarinchakunaykipaq. Amayá manchakuychu nitaq hukmanyaychu, ñuqa Señorniki Tayta Diosmi mayta riptikipas qanwan kasaq, nispa’ (Josuey 1:9, Chuya Qellqa 2012).

 Kaypi nisqanwanmi Jehova Diosqa a serviqnin Josueyta nirqa sasachakuyninkuna llumpay sasapaq rikchakuptinpas ‘kallpanchakuspa qarinchakunanpaq’, chaymi Josueyqa Jehova Diosta kasukuspanqa mana manchakunanchu karqa qipakunaman imapas pasananmantaqa. Jehova Diosqa Josueypaqqa karqa ladonpi kaspan ima sasachakuyninpipas yanapachkanman hinam. Arí, Jehova Diosqa Josueytaqa yanaparqam kamachikuyninkunata quspan chaynataq enemigonkunata vencenanpaq yanapaspan.

 ¿Imaynatataq Josueyqa kallpanchakuspa qarinchakunan karqa? Josueypa tiemponpiqa wakillanpas Diospa palabranqa karqañam, chaychá Josueytaqa anchata yanaparqa, hina chay qillqapitaqmi karqa Josueyman Moisespa qusqan kamachikuykunapas (Josuey 1:7). b Kamachikuykunapa kasqan libromanta rimaspanmi Jehova Diosqa Josueyta nirqa: ‘Tutapas punchawpas leespaykim yuyaymananayki’, nispa (Josuey 1:8). Josueyqa Diospa palabranta leespanmi yuyaymananan karqa, chaymi Josueytaqa yanaparqa tukuy sunqunwan hinaspa tukuy yuyayninwan Diosta servinanpaq. Chaymantapas Josueyqa yachasqanman hinam kawsakunan utaq ruwanan karqa, hinaspapas ‘qillqasqa kasqanman hinam lliwta kasukunan’ karqa. Chaynata ruwaptinqa ima tantiasqankunapas allinmi kanan karqa. ¡Chaynapunimá karqa! Ima sasachakuyninkuna kaptinpas Josueyqa kusisqam hinaspa hawkallam Jehova Diosta servirqa (Josuey 23:14; 24:15).

 Josueyman Jehova Diospa nisqanqa ñuqanchiktapas hinallam yanapawanchik. Chay nisqanwanmi yachanchik Jehova Diosqa lliw serviqninkunamanta preocupakusqanta, aswanraqmi sasachakuykunapi tarikuptinchikqa. Payqa munan Josuey hina allin kawsakunanchiktam. Chaymi ñuqanchikpas Josuey hina kallpanchasqa tarikusun bibliata leespaqa, chaypi yuyaymanaspaqa chaynataq yachasqanchikman hina kawsakuspaqa.

 Moisespa wañukusqan qipatam Jehova Diosqa Josueytaña kamachirqa Israel nacionta pusananpaq (Josuey 1:1, 2). Israel runakunaqa Jehova Diospa qusqan Canaan allpamanmi yaykunankuña kachkarqa, ichaqa enemigonku Canaan runakunawanraqmi peleananku karqa. Paykunaqa karqa maqakuqllañam, mana allinkunallaña ruwaq runakunam (Deuteronomio 9:5; 20:17, 18). c Hinaspapas Canaan runakunaqa Israel runakunamantaqa achkam hinaspa allin peleaqmi karqaku (Josuey 9:1, 2; 17:18). Chaywanpas Josueyqa qarinchakurqam, hinaspam Jehova Diospa kamachisqanta kasukurqa. Arí, Josueywanmi Jehova Diosqa karqa chaymi israelitakunaqa suqta watallapi yaqa llapan enemigonkuta vencerurqaku (Josuey 21:43, 44).