“Manchakuypaq wayquntaña purispaypas manam imatapas manchakusaqchu. Qanmi ñuqawan kachkanki. Tawnaykiwanmi kallpanchaykuwanki” (Salmos 23:4, Musuq allpa pachapi kawsaqkunapaq biblia).

 “Tutay-tutay wayqupiña purillaspaypas manañamriki manchakuniñachu. Ñuqawanqa kikikiraq kasqaykiraykum manapuniña manchakuniñachu. Qamqariki ñuqallaytam kallpanchawanki varaykiwanpas tawnallaykiwanpas” (Salmos 23:4, Chuya Qellqa 1987).

 Jehova Diosqa serviqninkunataqa cuidanmi hinaspa yanapanmi, astawanraqmi sasachakuykunapi kaptinqa. Chaymi Salmos 23:4 nin Jehova Dios serviqninkunata imaynata cuidasqanmanta, chaytam tupachin ovejakunata kuyakuywan michiqwan. b Diosta serviqkunaqa ima sasachakuyña kaptinpas manam sapallankuchu tarikunku, sasachakuyninku tutayay chunniq wayqu utaq vidanku peligropi kaptinpas. Chaymantapas hawkam tarikunku Jehova Dios paykunapa waqtanpi kachkanmanpas hina.

 Ñawpaq tiempopi oveja michiqkunaqa kaspinkuwan utaq varankuwanmi ovejankunataqa sumaqta cuidaqku atuqmanta utaq ima peligromantapas. Chaymantapas ovejanku michinankupaqqa servichikuqkutaqmi tawnankutapas, chaynapi ovejankuna maymi rinanman rinanpaq utaq qaqamanpas mana wichiykunanpaq. Chaynam kuyakuq Diosninchikpas serviqninkunata allin ñanninta pusawanchik hinaspa ima peligromantapas harkawanchik, sasachakuypiña tarikuptinchikpas tukuywanmi yanapawanchik.

•   Diosqa allin ñannintam pusawanchik, llakisqa kaptinchikpas bibliawanmi sunqunchikta tiyaykachin (Romanos 15:4).

•   Mañakusqanchiktam uyariwanchik, sunqunchiktapas hinaspa yuyayninchiktapas hawkayaykachinmi (Filipenses 4:6, 7).

•   Iñiqmasinchikkunawanmi kallpanchaykuwanchik (Hebreos 10:24, 25).

•   Hamuq punchawpi mana allinkunata chinkachispa hawkaña kawsakunanchikpaqmi prometewanchik (Salmos 37:29; Apocalipsis 21:3-5).

 Salmos 23 capitulotaqa Davidmi qillqarqa. Payqa warmallaraq kachkaspanmi oveja michiq karqa, chaymantam Israel nacionpa kamachiqninña karqa (1 Samuel 17:34, 35; 2 Samuel 7:8). 23 capitulopa qallariyninpim riman Jehova Diosqa michiq hina serviqninkunata yanapasqanmanta, mikuchisqanmanta hinaspa kallpanchasqanmanta (Salmos 23:1-3).

 Salmos 23:4 versiculom nin Jehova Diosqa cuidawaqninchik kasqanta, chaypiqa Jehova Dioswan parlachkanmanpas hinam Davidqa qillqarqa. 1-3 versiculokunapiñataqmi qillqarqa Jehova Diosmanta hukkunaman willachkanmanpas hina. Salmos 23:4 nisqanwanmi sutillata qawanchik Davidqa Jehova Diosta anchata kuyasqanta chaynallataq Jehova Diospas Davidta anchata kuyasqanta. Davidqa yacharqam sasachakuypi tarikuptin Dios yachasqanta chaynataq paymanta llakikusqanta. Chaymi Davidqa ima pasananmantapas mana manchakurqachu.

 Salmos 23:5 hinaspa 6 versiculopiñataqmi Davidqa qillqarqa wasiyuq qukuykuq runa kasqanmanta hinaspa invitasqan runakunamanta. Chay wasiyuq runa hinam Jehova Diospas Davidta sumaqta chaskiykurqa utaq cuidaykurqa. Manataqmi saqirqachu Davidta chiqniqnin runakuna imatapas ruwarunantaqa. Davidqa kaynata nispam Salmos 23 capitulota tukurqa, nirqam: “Qamqa wañukunay punchawkama kuyawaspam llakipayawanki. Wañukunay punchawkamam Jehova Diospa wasinpi yachasaq”, nispa.

 Salmos 23 capitulopim willawanchik Jehova Dios serviqninkunata kuyakuywan cuidawasqanchikta (1 Pedro 2:25).