“Jehova Diosraykuyá kusikuy. Payqa sunquykipa munasqantam qusunki” (Salmos 37:4, Musuq allpa pachapi kawsaqkunapaq biblia).

 ‘Tayta Diospi anchallataña kusikuy, paymi sunquykipa munasqanta qusunki’ (Salmos 37:4, Chuya Qellqa 2012).

 Dios yupaychaqkunatam Salmos qillqaq nin Dioswan kuyachikuspankuqa kusisqa kanankumanta. Pipas Dioswan kuyachikuqqa manam iskayrayanqachu allinninkupaq imapas munasqankuta Jehova a Dios cumplinanmantaqa.

 “Jehova Diosraykuyá kusikuy”. Kay textopa nisqanqa kaynatapas ninmantaqmi “TAYTA Diosmanta anchallataña kusikuykuy” nispa utaq “TAYTA Diospa prometesusqaykiwan kusikuy” nispa. Huk rimaypiqa nichkanmi Jehova Diosta yupaychaspa kusisqa kananchikmanta (Salmos 37:4).

 Diosta serviqkunaqa paypa munasqanman hinam kawsakunku. Chaymi Diostaqa mana riqsiyllachu-riqsinku, aswanqa kasukunkum, hinaspam yachaywan imatapas ruwanku. Chayraykum ima problemakunamanpas mana metekunkuchu, hinaspam hawka kawsakunku (Proverbios 3:5, 6). Chaymi mana piñakunkuchu nitaq envidiakunkuchu mana allin runakunataqa, chay runakuna allin hinaraq kawsakuptinkupas (Salmos 37:1, 7-9). Chaymantapas Diosta serviqkunaqa kusisqaqa kanku Dios mana allinkunata chinkachinantaña yachaspankum, hinaspa paypa munasqanman hina kawsakuptinku bendecinanmanta yachaspankum (Salmos 37:34). Kusikunkutaqmi Jehova Diosta kusichisqankuwanpas (Salmos 5:12; Proverbios 27:11).

 “Payqa sunquykipa munasqantam qusunki”. Kay textopa nisqanqa ninmantaqmi “Payqa qusunkim ima mañakusqaykitapas” nispa utaq “payqa cumplinqam ima munasqaykitapas” nispa. Chaywanqa manam nichkanchu Diosqa imaña mañakusqanchiktapas quwananchikmantapunichu. Payqa kuyakuq tayta kasqanraykum yachan ñuqanchikpaq imam allin kasqanta. Chaymi mañakuspanchikqa mañakunanchik paypa munasqanman hina hinaspa kamachikuyninkunaman hina (Proverbios 28:9; Santiago 4:3; 1 Juan 5:14). Chayta ruwaspanchikqa manam iskayrayasunchu Diosninchik mañakusqanchikta uyariwananchikmantaqa (Salmos 65:2; Mateo 21:22).

 Salmos 37 capitulopi kaq takitaqa Israel nacionta kamachiq Davidmi qillqarqa. Chay takitam qillqarqa chay tiempopi abecedarionkuman hina rakisqata. Sapa rakisqa kaq takim abecedariopi b mayqin letrapa tupasqanman hina qallarirqa.

 Davidqa sasachakuykunapim tarikurqa. Kamachiq Saulwan huk runakunam wañuchiyta munarqaku (2 Samuel 22:1). Chaywanpas Davidqa manam imaniraqllatapas iskayrayarqachu Jehova Diosmantaqa. Payqa yacharqam mana allin ruwaqkunata Diosqa castiganantapuni (Salmos 37:10, 11). Chay mana allin ruwaq runakuna kusisqallaña utaq “chayllaraq ikllimuq qura” hina kaspankupas tiempopa risqanman hinam chinkanqaku (Salmos 37:2, 20, 35, 36).

 Salmos 37 capitulopiqa nintaqmi Diosta kasukuq runakuna imayna kawsakunankumanta hinaspa mana kasukuq runakunatañataq ima pasananmanta (Salmos 37:16, 17, 21, 22, 27, 28). Chaymi kay Salmosqa yanapawanchik imatapas yachaywan ruwanapaq hinaspa Diospa munasqanman hina kawsakunapaq.

 Salmos qillqamanta astawan yachanaykipaqqa kay videota qawaykuy.