“Makiyman churakuspaykichikyá yachaychik Dios kasqayta. Llapallan llaqtapa hatunchasqanmi kasaq. Kay pachapim hatunchasqa kasaq” (Salmos 46:10, Musuq allpa pachapi kawsaqkunapaq biblia).

 ‘¡Qasillalla kaychik, Dios kasqayta riqsiwaychik! ¡Ñuqaqa llapa nacionkunapa hatunchasqanmi kani! ¡Ñuqaqa kay pachapi yupaychasqam kani!’ (Salmos 46:10, Chuya Qellqa 2012).

 Kay versiculopim llapallanchikta Dios niwanchik payta yupaychananchikpaq hinaspa kay allpa pachata paylla kamachiq kasqanta riqsikunanchikpaq. Manam pipas neganmanchu Dioslla tukuy atiyniyuq hinaspa paylla munayniyuq kasqantaqa. Chayna kasqantam riqsikunanchik wiñaypaq kawsayta munaspaqa (Apocalipsis 4:11).

 “Makiyman churakuspaykichikyá yachaychik Dios kasqayta”. Salmos 46:​10 versiculopa qallariyninmi wakin bibliakunapi kaynata nin: “Qasillalla kaychik”, nispa (Chuya Qellqa 2012). Chayraykum achka runakuna chay versiculota entienderunku mana imatapas nispa iglesiankupi qasillalla kanankupaq nisqanta. Ichaqa kay textopim kikin Jehova a Dios llapallanchikta rimapayawanchik kaynata: “Makiyman churakuspaykichikyá yachaychik Dios kasqayta”, nispa. Arí, paymi niwanchik contranpi mana hatarinanchikpaq, niwanchiktaqmi paylla yupaychana kasqanta riqsikunanchikpaq.

 Salmos 2 capitulopipas yaqa chaynatam consejawanchik. Chaypim nin pipas paypa contranpi hatarispaqa wañurunanmanta. Dioslla kamachiq kasqanta riqsikuqkunañataqmi mana iskayrayanchikchu payqa allinninchikpaq yachachiwasqanchikmanta, yanapawasqanchikmanta hinaspa yachayta quwasqanchikmanta. Diospi hapipakuqkunaqa hawkam hinaspa kusisqam kanku, aswanraqmi sasachakuy tiempopi tarikuspankuqa (Salmos 2:9-12).

 “Llapallan llaqtapa hatunchasqanmi kasaq. Kay pachapim hatunchasqa kasaq”. Ñawpaq tiempopim Jehova Diosqa hatunchasqa karqa atiyninwan llaqtanta utaq serviqninkunata salvasqanrayku (Exodo 15:1-3). Llapallan runakuna Jehova Diospa kamachisqanña kaptinchik hinaspa payllataña yupaychaptinchikmi Diosqa astawanraq hatunchasqa kanqa. Chayqa kanqa manapas unaymantam (Salmos 86:9, 10; Isaias 2:11).

 Salmos 46 capitulomanta rimaspanmi huk qillqa nin: “Diosqa atiyniyuq kasqanta hinaspa llaqtanta utaq serviqninkunata imamantapas salvasqantapuni”, nispa. Chaymi Salmos 46 capitulopi nisqanta takispanku serviqninkuna nirqaku Jehova Dios cuidananmanta hinaspa yanapananmanta mana iskayrayasqankuta (Salmos 46:1, 2). Chay capitulopi nisqanqa yuyarichirqam Jehova Diosqa haykapipas mana saqisqanta (Salmos 46:7, 11).

 Salmos 46:8 versiculopim serviqninkunata Diosqa nin admirakuypaq ruwasqankunapi yuyaymananankupaq, chaynapi astawanraq paypi hapipakunankupaq hinaspa manaña iskayrayanankupaq. Salmos 46:9 versiculopi nisqanwanñataqmi piensachirqa Jehova Diosqa guerrata utaq wañuchinakuyta chinkachinanpi. Chaymi ñawpaq tiempopi serviqninkunata chiqniqninkunamanta libraspan Diosqa guerrata utaq wañuchinakuyta chinkachirqa. Ichaqa bibliapim prometewanchik manapas unaymanta enterollan allpa pachapi guerrata chinkachinanmanta (Isaias 2:4).

 ¿Kunanqa Jehova Diosqa serviqninkunata yanapachkanchu? Awriki. Apostol Pablopas iñiqmasinkunatam nirqa Jehova Dios yanapananmanta mana iskayrayanankupaq (Hebreos 13:6). Salmos 46 capitulopa nisqankunam yanapawanchik Diosqa atiyninwan cuidawananchikpi mana iskayrayanapaq. Chaymantapas yuyananchikmi Diosninchikqa pakaykuwaqninchik hinaspa kallpanchawaqninchik taytanchik kasqanta (Salmos 46:1).

 Salmos qillqamanta astawan yachanaykipaqqa kay videota qawaykuy.