¿Imaynataq Jesuspa rikchayninqa karqa?
¿Imatam biblia nin?
Manam pipas sumaqtaqa yachanchu Jesus imayna rikchayniyuq kasqantaqa bibliapi Jesuspa rikchayninmanta mana rimasqanrayku. Ichaqa bibliapi Jesuspa imakuna ruwasqanmanta willawasqanchikwanmi yachachwan Jesus imayna kasqanta.
¿Imayna uyayuqtaq karqa? Jesusqa judio kastamanta mamayuqmi karqa, chaynaqa judio kasta runakuna hina uyayuqchá karqa (Hebreos 7:14). Chaychá huk kutipi Galileamanta Jerusalenman chayaruptinku tapukurqakuraq Jesusta tarinankupaq (Juan 7:10, 11). Jesusqa qatiqninkunawanpas kaqkamallam karqa. Chaymi Judas Iscariotepas runakunaman imayna riqsichinanpaq willakurqa (Mateo 26:47-49).
¿Imayna chukchayuqtaq karqa? Jesusqa manachá hatun chukchayuqchu karqa. Bibliam nin “qaripaq hatun chukchayuq kayninqa pinqaypaq kasqanta” (1 Corintios 11:14).
¿Jesusqa barbayuqchu karqa? Arí, payqa judiokuna hina barbayuqmi karqa, judiokunaqa manam barbankutaqa kuchukuqkuchu (Levitico 19:27; Galatas 4:4). Chaymantapas Isaias libropim rimarqaña Jesuspa barbanmanta (Isaias 50:6).
¿Imayna cuerpoyuqtaq karqa? Jesusqa kallpasapa runam karqa. Runakunaman Diosmanta willakunanpaqmi karu-karuta purirqa (Mateo 9:35). Iskay kutikamam templopi rantikuqkunata qarqurqa, waskamanta latigota ruwakuykuspan vacantinta qarqururqa, mesankutapas tikrarurqam (Lucas 19:45, 46; Juan 2:14, 15). Huk qillqapipas willakunmi Jesusqa kallpasapa runa kasqanmanta (Cyclopedia de M’Clintock y Strong, volumen IV, pagina 884).
¿Manchakunapaq runachu karqa? Manam, Jesusqa ancha kuyakuq hinaspa llakipayakuq runam karqa (Mateo 11:28, 29). Jesusqa llapallan maskaqnin runakunapa sunqunta tiyaykachispam yanapaykuq (Lucas 5:12, 13; 7:37, 38). Wawakunapas mana manchakuspankum asuykuqku (Mateo 19:13-15; Marcos 9:35-37).
Jesusmanta llulla willakuykuna
Runakunam ninku: Jesusqa yana runa kasqanta Apocalipsis libropi leesqankuman hina. Chaypim riman Jesuspa chukchan yuraq millwa hina kasqanmanta hinaspa chakinpas ‘llipipipichkaq fino cobre hinaraq’ kasqanmanta utaq yana kasqanmanta (Apocalipsis 1:14, 15).
¿Chaynachu? Apocalipsis libropi willakuykunaqa rikchanachiykunam (Apocalipsis 1:1). Chaymi Jesuspa chukchanmanta hinaspa chakinmanta willakuyqa rikchanachiylla. Jesus kawsarisqan qipaman imayna kasqantam rikchanachichkan, manam kay allpapi kaspa Jesus imayna kasqanmantachu rimachkan. ‘Umanpi chukchanpas yuraq millwa hina chaynataq riti hina’ kasqanmanta rimaspanqa rimachkan una-unay watayuq kaspan yachayniyuq kasqanmantam (Apocalipsis 1:14; 3:14). Chaypiqa manam nichkanchu chukchan yuraq millwa kasqantachu nitaq riti kasqantachu.
Apocalipsis 1:15, 16 nin: ‘Chakinkunapas kasqa hornopi llipipipichkaq fino cobre hinaraqmi, […] uyanpas chawpi punchawpi intipa kanchaynin hinaraqmi’, nispa. Jesusmanta chayna rimasqanqa rikchanachiyllam, manam pi runapas kaypi willakuyman hinaqa kanchu. Kaypiqa willawachkanchik kawsariramuspan Jesus imayna kasqanmantam, payqa “mana asuykuy atina achkipim kawsakun” (1 Timoteo 6:16).
Runakunam ninku: “Jesusqa karqa mana kallpayuq llaki uyayuqmi”, nispa.
¿Chaynachu? Jesusqa kallpayuq hinaspa qarinchakuq runam karqa. Chaymi payqa huk kutipi enemigonkuna wañuchinankupaq maskaptinku mana manchakuspan nirqa: “¿Pitataq maskachkankichik?”, nispan (Juan 18:4-8). Jesusqa carpintero kasqanraykuch kallpasapa runa karqa (Marcos 6:3).
Chaynaqa, ¿imanasqataq yanapachikurqa wañuchinankupaq kullu apaypi? Hinaspapas, ¿imanasqataq wakin warkusqa runakunamanta puntata wañukurqa? (Lucas 23:26; Juan 19:31-33). Jesusqa mana kallpayuqñam karqa wañuchinanku ñawpaq tuta mana puñusqa kasqanrayku hinaspa tukuy imawan llumpay llakisqa tarikusqanrayku (Lucas 22:42-44). Tukuy tutam judio runakuna Jesusta ñakarichirqaku, achikyaymantañataqmi Roma llaqtayuq runakunaña hinalla Jesusta ñakarichirqaku (Mateo 26:67, 68; Juan 19:1-3). Llumpa-llumpayta ñakarichisqankuraykuchá wañukullarqa apurawman.
Runakunam ninku: “Jesusqa tukuy tiempo llaki uyayuq runam karqa”, nispa.
¿Chaynachu? Jesusqa taytan Jehova Dios hinam kusisqa runa karqa, bibliam willakun Jehova Dios ‘kusikuq Dios’ kasqanta (1 Timoteo 1:11; Juan 14:9). Chaymantapas Jesusqa runakunatam yachachirqa imaynata kusisqa kawsakunankupaq (Mateo 5:3-9; Lucas 11:28). Chayraykum ninchik Jesusqa kusisqa runa kasqanmanta.
Kaykunatapas leeykuy
BIBLIAPA ANCHA ALLIN YACHACHIKUYNINKUNA
¿Imanasqataq mana iskayrayachwanchu bibliapa willakuyninmanta?
Sichu Diosmanta biblia kaptinqa manachiki wakin qillqakuna hinachu kanan.
ÑUQAYKUMANTA
Bibliamanta yachachinaykupaq willaykamuwayku
Bibliamanta utaq Jehova Diospa testigonkunamanta astawan yachay.