Bibliaqa ninmi chay ruwayqa allin kasqanta hinaspapas kikinchik kuyakunanchikpaqmi kallpanchawanchik, ichaqa chayta llumpayta ruwaymi mana allinchu. Kikinchik kuyakuspaqa, sumaqllatam kawsasun, mana valeqpaq hinaqa mamam hapikusunchu (Mateo 10:31). Bibliaqa mana allinpaqmi qawan kikillanpaq munaqta, kuyakuytam ichaqa allinta qawan.

¿Pitataq astawan kuyananchik?

1.   Diostam pimantapas astawanqa kuyananchik. Bibliam yachachin punta kaq kamachikuyqa: “Jehova Diosnikitam kuyanayki tukuy sunquykiwan”, nispa (Marcos 12:28-30; Deuteronomio 6:5).

2.   Iskay kaqñataqmi: “Runamasikitam kuyanayki kikikita hina”, nispa (Marcos 12:31; Levitico 19:18).

3.   Kikinchik kuyakuymanta mana biblia yachachispanpas, ninmi “runamasikitam kuyanayki kikikita hina” nispa. Chaywanqa nichkarqam kikinchikpas respetakuspa kuyakuymanta.

¿Pitataq Jesusqa astawan kuyarqa?

 Jesusmi qawachirqa Diosta kuyay, runamasinta kuyayta hinaspa kikinta kuyakuyta imayna ruwasqanwan. Chaymantapas qatiqninkunatam kamachirqa chaynata ruwanankupaq (Juan 13:34, 35).

1.   Jesuspaqqa, Diosta kuyaymi imamantapas puntapi karqa, chaymi kallpanchakurqa Diospa kamachisqanta kasukuypi. Kikinmi nirqa: “Ichaqa taytay kuyasqayta runakuna yachanankupaqmi taytaypa kamachiwasqanman hina imam kaqta ruwachkani”, nispa (Juan 14:31).

2.   Jesusqa runamasintapas kuyarqam chaytam qawachirqa imayna kasqankumanta llakikuspan hinaspa paykunarayku wañuspan (Mateo 20:28).

3.   Jesusqa kikin kuyakusqantapas qawachirqam, samananpaq tiempochakuspan, mikuspan hinaspa qatiqninkunawan sapallanku kaspanpas (Marcos 6:31, 32; Lucas 5:29; Juan 2:1, 2; 12:2).

Wakinkunata ñuqanchikmanta astawan kuyaspaqa, ¿llakisqachu kasun utaq manañachu kikinchik kuyakusun?

 Manam, Diospa rikchayninman hina unanchasqa kasqanchikrayku, payqa mana imallapaq kuyakuqmi (Genesis 1:27; 1 Juan 4:8). Chaymi ñuqanchikpas hukkunata kuyayta atinchik. Kikinchik kuyakuy allin kaptinpas astawanmi kusisqaqa kasun, imamantapas Jehova Diosta astawan kuyaspa hinaspa runamasinchikpaq allinkunata ruwaspa. Bibliam nin: “Imapas quqmi aswan kusisqaqa imapas chaskiqmantaqa”, nispa (Hechos 20:35).

 Kunanqa, achka runakunam ninku kusisqa kanapaqqa kikinchikpi imatapas puntata ruwanapaq. Chayna runakunaqa manañam runamasinkuta kuyankuchu, astawanqa kikinkupaqraqmi puntata imatapas ruwanku. Ichaqa kusisqa hinaspa mana unquqmi kasun bibliapa kayna nisqanta kasukuspa, ninmi: “Sapakamayá maskachun wakinkunapa allinninta, amayá kikillankupa allinnintachu”, nispa (1 Corintios 10:24).