Llumpa-llumpay ñakariy punchawkunapiqa llumpay ñakariypim runakunaqa tarikusun, manamá chayna ñakariyqa haykapipas karqachu. Bibliapa nisqanman hinaqa kay ‘tukupay punchawkunapim’ kanqa (2 Timoteo 3:1; Daniel 12:4). Marcos 13:19 nisqanpim nin: “Chay punchawkunaqa llumpa-llumpay ñakariy punchawkunam kanqa, manam chayna ñakariyqa karqachu runakunata Dios unanchasqanmanta kunankamapas, manataqmi haykapipas kanqachu”, nispa (Daniel 12:1; Mateo 24:21, 22).

¿Imakunataq kanqa llumpa-llumpay ñakariy punchawkunapi?

•   Pantay religionkunam chinkachisqa kanqa. Pantay religionkunaqa chayllam chinkachisqa kanqaku (Apocalipsis 17:1, 5; 18:9, 10, 21). Enteron nacionpi gobiernokunam pantay religionkunataqa chinkachinqaku. Paykunapa sunqunmanmi chay ruway munayta Dios churarunqa. Chaynapimá Diospa nisqan cumplikunqa. Pantay religionkunata chinkachiq nacionkunaqa Naciones Unidas organizacionwanmi riqsisqa kanku (Apocalipsis 17:3, 15-18). a

•   Jehova Dios serviqkunatam chinkachiyta munanqaku. Hukllawasqa achka nacionkunam Jehova Dios serviqkunata chinkachiyta munanqaku. Chay nacionkunatam Ezequiel qillqapi sutichan “Magog lawmanta Gog”, nispa. Ichaqa Jehova Diosqa manamá saqinqachu serviqninkuna chinkachinankutaqa (Ezequiel 38:1, 2, 9-12, 18-23).

•   Kay allpa pachapi llapallan runakunam juzgasqa kanqaku. Jesusmi llapallan kay allpa pachapi yachaqkunata juzganqa hinaspam “runakunata rakinqa imaynam michiqpas cabrakunamanta ovejakunata rakichkaq hina” (Mateo 25:31-33). Sapa runatam juzganqa hanaq pachapaq akllasqakunata yanapasqankuman hina utaq mana yanapasqankuman hina. Hanaq pachapaq akllasqakunatam Jesus sutichan “wawqiykuna” nispa (Mateo 25:34-46).

•   Jesuswan gobiernanankupaq akllasqa kaqkunam huñusqa kanqaku. Jesuswan gobiernanankupaq Diosman sunqu akllasqa kaqkunaqa wañukuspankum hanaq pachapiña kawsarinqaku (Mateo 24:31; 1 Corintios 15:50-53; 1 Tesalonicenses 4:15-17).

•   Armagedon punchawmi chayamunqa. Armagedontaqa bibliapim sutichan ‘tukuy atiyniyuq Diospa piñakuynin punchawpi guerrawanpas’ chaynataq “Jehova Diospa punchawnin” nispapas (Apocalipsis 16:14, 16; Isaias 13:9; 2 Pedro 3:12). Chay armagedon punchawpim wiñaypaq wañuchisqa kanqaku mana allin runakuna. Paykunatam Jesus chayna kanankupaq sentencianqa (Sofonias 1:18; 2 Tesalonicenses 1:6-10). Chaymantapas chinkachisqam kanqaku llapallan nacionpi gobiernokuna, chay gobiernokunatam bibliapi tupachin qanchis umayuq manchakuypaq animalwan (Apocalipsis 19:19-21).

¿Imataq pasanqa llumpa-llumpay ñakariy punchawkuna tukuruptinqa?

•   Satanaspas, demoniokunapas presochasqam kanqaku. Atiyniyuq huk angelmi satanasta hinaspa demoniokunata hapiruspan “uku-uku uchkuman” wischuykunqa (Apocalipsis 20:1-3). Chay uchkupiqa wañusqa hinam kanqaku, chaymi mana ima ruwaytapas atinqakuchu. Chay uchkupi kaspankuqa carcelpipas kachkankuman hinam tarikunqaku. Chaymi satanasqa manaña pitapas pantachiyta atinqachu (Apocalipsis 20:7).

•   Waranqa watam Jesus kamachiyta qallaykunqa. Jesusmi Diospa gobiernonpi waranqa wata kamachiyta qallaykunqa. Hinaptinmi lliw runa kusisqaña, allinña kawsakusunchik (Apocalipsis 5:9, 10; 20:4, 6). ‘Llumpa-llumpay ñakariy’ punchawkunapi mana wañuq ‘achkallay-achka runakunam’ Jesus gobiernayta qallaykuptin kawsakunqaku (Apocalipsis 7:9, 14; Salmos 37:9-11).