2022 watapim julio killapa 25 hinaspa 26 punchawninpi Musuq allpa pachapi kawsaqkunapaq biblia 13 idiomakunaman traducinapaq kallpanchakusqanchik qispirurqa. Ñawpaqtaqa huk semanallapiqa 6 idiomakunallapi biblia qispisqantam niwaq kanchik. Kaypim qawasun ima idiomakunapi qispisqanta.

Centroamerica betelpi llamkaq iñiqmasinchik Armando Ochoam Mateomanta Apocalipsiskama Musuq allpa pachapi kawsaqkunapaq biblia qispisqanta hatun huñunakuypi nirqa, chaytam internetninta uyarirqaku 1.400 iñiqmasinchikkuna. Chay bibliaqa karqam celularpi descarganapaqpas chaynataq papelpipas.

Chay bibliata traduciypi yanapakuq huknin iñiqmasinchikmi nirqa: “Ruwasqaykupi Jehova Dios yanapawasqankuraykum kay bibliaqa qispirun. Arí, Diosmá chuya espiritunwan yanapawarqaku”, nispa.

Colombia betelpi llamkaq iñiqmasinchik Carlos Morenom Wayuunaiki idiomapi Mateomanta Hechoskama Musuq allpa pachapi kawsaqkunapaq biblia qispisqanta willakurqa. Chay huñunakuytam internetninta uyarirqaku Colombia hinaspa Venezuela nacionpi 2.000 iñiqmasinchikkuna. Chay bibliaqa lluqsirqa celularpi descarganapaqmi. Qipakunamanñam papelpiqa lluqsinqa.

Costa de Marfil betelpi llamkaq iñiqmasinchik Christophe Coulotmi baule idiomapi Musuq allpa pachapi kawsaqkunapaq biblia qispisqanta willakurqa. Chaytam grabasqataña uyarirqaku 12.000 iñiqmasinchikkuna. Chay bibliam lluqsirqa celularpi descarganapaq. Papelpiqa lluqsinqa 2022 watapa octubre killanpaqmi. Chayllaraqmi chay bibliataqa Costa de Marfil nacionpiqa chay idiomapi ruwarunku.

Chay bibliata traduciypi yanapakuq huknin iñiqmasinchikmi hinalla yanapakunankupaq ima yanapasqanmanta nirqa: “Traducisqaykupi imapas sasa kaptinqa iñiqmasinchikkuna chaynataq huk runakunapas kikinkupa rimayninkupi biblia qispiruptin mayna kusisqa tarikunankupim piensaq kaniku. Chaypi piensaymi hinaspa Jehova Diosmi yanapawarqaku hinalla kallpanchakunaykupaq”, nispa.

Gran Bretaña betelpi llamkaq iñiqmasinchik Peter Bellmi gales idiomapi Mateomanta Apocalipsiskama Musuq allpa pachapi kawsaqkunapaq biblia qispisqanta willakurqa. Chay huñunakuymi karqa Gales nacionpi kaq salonmanta. Galespi hinaspa Argentinapi kaqkunapiwanñam uyarirqaku 2.057 iñiqmasinchikkuna. Chay ratollam celularpiqa descargarqaku. Papelpiñataqmi lluqsinqa 2022 watapa diciembre killanpaq.

Chay bibliata traduciypi yanapakuq huknin iñiqmasinchikmi nirqa: “Manam haykapipas qunqasaqchu Diospa sutinta bibliapi chayllaraq churasqaykutaqa. Ancha kusikunapaqmi maymi kananpi Diospa sutin churasqa kasqanta qawayqa”, nispa.

Mozambique betelpi llamkaq iñiqmasinchik Marcelo Santosmi manyawa hinaspa tewe idiomapi Mateo libro qispisqanta willakurqa. Chaytam grabasqataña uyarirqaku JW Stream nisqapi. Chay huñunakuytaqa uyarirqakutaqmi radiopipas chaynataq televisionpipas. Chay bibliaqa lluqsirqa celularpi descarganapaqwan uyarinapaqmi. Papelpiqa lluqsinqa 2022 watapa septiembre killanpaqmi.

Kayllaraqmi manyawa idiomapi Mateo libro traducisqa kasqanqa. Tewe idiomapiñataqmi bibliapa wakin libronkunalla kachkan. Kay bibliata leeqkunaqa hinaspa uyariqkunaqa atinqakuñam Diosmanta yachayta.

Peru betelpi llamkaq iñiqmasinchik Marcelo Moyanom Quechua (Ancash), Quechua (Ayacucho) hinaspa Quechua (Cuzco) idiomakunapi Musuq allpa pachapi kawsaqkunapaq biblia qispisqanta willakurqa. Chay kimsan quechuakunatam Peru nacionpiqa astawan rimanku. Chay huñunakuytam internetninta uyarirqaku 7.000 iñiqmasinchikkuna. Papelpi bibliaqa lluqsinqa 2022 watapa octubre killanpaqmi.

Kimsan quechuakuna yaqa chaynalla kaptinpas manam igualtachu entiendenku chaynataq rimanku. Chaymi kimsan quechuapi ruwana karqa. Chay bibliakunataqa quechua rimaqkuna facilta entiendenankupaq hinam traducirqaku.

Diospa llaqtanpi punta apaqkunamanta huknin iñiqmasinchik Kenneth Cookmi endebele hinaspa sesoto (Sudafrica) idiomakunapi Musuq allpa pachapi kawsaqkunapaq biblia qispisqanta willakurqa. Willakurqataqmi sesoto (Lesoto) idiomapi Musuq allpa pachapi kawsaqkunapaq biblia revisasqa qispisqantapas. Chay huñunakuytam grabasqataña uyarirqaku 28.000 masnin iñiqmasinchikkuna. Chay nacionpim uyarirqaku salonkunapi hinaspa wasikunapi. Chay ratollam celularpi descarganapaqqa karqa. Papelpi bibliaqa lluqsinqa 2022 watapa diciembre killanpaqmi. Chayllaraqmi endebele hinaspa sesoto (Sudafrica) idiomapi Musuq allpa pachapi kawsaqkunapaq bibliaqa enteron qispirun.

Endebele idiomapi bibliata traduciypi yanapakuq huk iñiqmasinchikmi nirqa: “Mayna kusisqachá endebele idiomata rimaq runamasinchikkunaqa tarikunqaku bibliapi Diospa sutinta qawaspankuqa. Kikinku leeykuspankumá chayllaraq yachanqaku Diospa sutin ima kasqanta”, nispa.

Zimbabue betelpi llamkaq Shingirai Mapfumo sutiyuq iñiqmasinchikmi endebele (Zimbabue) idiomapi Musuq allpa pachapi kawsaqkunapaq biblia qispisqanta willakurqa. Chayqa karqa celularpi descarganapaqmi. Papelpiqa lluqsinqa 2022 watapa julio killanpaqmi. Chay huñunakuytam enteron Zimbabue nacionpi 8.700 masnin iñiqmasinchikkuna grabasqataña uyarirqaku.

Zimbabue nacionpi endebele idiomapi huk bibliakuna kaptinpas kay bibliam facil entiendenallaqa. Juan 17:3 nisqanpim wakin bibliakunapiqa nin Jesucristo ‘chiqap Dios kasqanta’. Musuq allpa pachapi kawsaqkunapaq bibliapim ichaqa nin Jehova Dioswan Jesucristoqa mana chaynalla kasqanta. Chay bibliata traduciypi yanapakuq iñiqmasinchikmi nirqa: “Kay bibliaqa runakunapa imayna rimasqanman hinam kachkan”, nispa.

Anchatam kusikunchik enteron pachapi Diosmanta yachay munaq runamasinchikkunapaq kay bibliakuna qispisqanmanta. Kayqa kikinkupa idiomankupi ‘kawsay qukuq yakuta mana imallapaq tomay’ hinam (Apocalipsis 22:17).