¿Ima nintaq bibliapi kay tiempopi muchuy kasqanmanta?
“Manañam kanqachu muchuyqa” nispam ninku enteron pachapi autoridadkuna. Paykunaqa mikuyta aypuspankum muchuyta chinkarachiyta munanku a. Ichaqa, ¿Atinmankuchu enteron pachapi muchuyta chinkarachiyta? ¿Ima nintaq bibliapi?
Bibliapiqa nirqañam muchuy kananmanta
Bibliapiqa nirqañam “tukupay punchawkunapiqa” muchuykuna kananmanta. Chay tiempopimá kachkanchik (2 Timoteo 3:1). Manam Jehova Dioschu huchayuq muchuy kananpaqqa, payqa willawarqanchikñam tiemponchikpi muchuy kananmanta (Santiago 1:13). Bibliapi ima nisqanmantayá qatiqninpi yachaykusun.
‘Kaypi-chaypim kanqa muchuy’ (Mateo 24:7). Bibliapi nisqanman hinam enteron allpa pachapi muchuyqa kachkan. Chaykunamanta estudiaq runakunam ninku: “Llapallan nacionpim manaña ima ruwaytapas atinkuchu yarqay mana kananpaqqa, nitaqmi ima ruwaytapas atinkuchu runakuna allin mikusqa hinaspa sano kanankupaqqa”, nispa. b Achkallay-achka nacionkunapim runakunaqa mana imatapas tarinkuchu mikunankupaq, chaymi llakikuypaq achka runakuna yarqaymanta wañunku.
‘Rikururqanim yana caballota, sillakuqninñataqmi balanzata hapichkasqa’ (Apocalipsis 6:5). Bibliapim yana caballotawan sillakuqninta tupachin kay tukupay tiempopi muchuywan. c Hapisqan balanzaqa kawsaykunata pesananpaqmi. Chay caballo rinkachkaptinmi qayakuy uyarikurqa. Nirqam huk kilo trigo achka qullqipa chanin kananmanta. Nirqataqmi kawsaykunata imapipas allinta guardanankupaq (Apocalipsis 6:6). Bibliapi chayna willakusqanqa kunan tiempopim cumplikuchkan. Wara-waranqantin runakunam mikunankupaq mana imatapas tarinkuchu utaqmi mikuyta rantinankupaq qullqinku mana haypanchu.
¿Imaynatataq muchuy tukunqa?
Estudiaq runakunam ninku enteron pachapiqa lliw runakunapaq hinaspa lliw animalkunapaq mikuykuna kasqanmanta. d Chaynaqa, ¿imanasqataq muchuyqa kan? ¿Imaynatataq Diosninchik chaykunata allichanqa?
¿Imanasqataq muchuyqa kan? Gobiernokunaqa manam ima ruwaytapas atinkuchu llapallan runakuna allinlla kanankupaqqa, chaymi apukuna astawan apuyachkanku, wakchakunañataq astawan wakchayachkanku. Chayraykum wakin runamasinchikkuna yarqaymanta kanku.
¿Imaynatataq Diosninchik chaykunata allichanqa? Paypa gobiernon kamachiyta qallaykuptinmi. Diospa Gobiernonqa runakunapa gobiernontam chinkachinqa (Daniel 2:44; Mateo 6:10). Kunan punchawqa achkallay-achka wakcha runakunam yarqaymanta kachkanku, Diospa gobiernonpim ichaqa manaña pipas yarqaymantaqa kanqachu. Bibliapim willawanchik Diospa gobiernonpi Jesus kamachiptin imayna kananmanta. Kaynatam nin: “Payqa yanapaykunanpaq qayakuq wakchatam yanapaykunqa. Yanapaykunqataqmi mana hatuntukuqtapas, yanapaykunqataqmi mana piyniyuqtapas […]. Kay allpa pachapim kawsaykuna achkallaña qispinqa. Urqukunapa puntankunapipas achkallañam kanqa”, nispa (Salmos 72:12, 16).
¿Imanasqataq muchuy kan? Guerrakunaqa sasachakuyta hinaspa muchuytam rikurichin. Guerra kaptinqa mikuypas sasa tariymi.
¿Imaynatataq Diosninchik chaykunata allichanqa? Bibliapim nin: “[Jehova Diosqa] kay allpapi wañuchinakuytapas chinkachinmi. Flechatapas chaynataq lanzatapas pakipanmi. Peleananku carretakunatapas kañanmi”, nispa (Salmos 46:9). Arí, Jehova Diosmi chinkachinqa guerraman rinankupaq armakuna ruwasqankuta chaynataq guerrakuna qallarichiq runakunata. Hinaptinmi runakunaqa mana sasachakuspanku mikuyta tarinqaku. Bibliapim nin: “Allin ruwaqkunam waytarinqa. Hawka kawsakuymi kanqa”, nispa (Salmos 72:7).
¿Imanasqataq muchuy kan? Llumpayta rupamusqanraykum utaq llumpayta paramusqanraykum utaq para mana kasqanraykum. Chaykunaraykum kawsayqa manaña sumaqtachu qispin, chaymi animalkunapas wañun.
¿Imaynatataq Diosninchik chaykunata allichanqa? Jehova Diosqa atinqam parata, rupayta, wayrata utaq imatapas controlayta. Chaymi paypa gobiernonpiqa kawsaykunaqa sumaqllataña rurunqa. Bibliapim nin: “[Jehova Diosqa] llumpa-llumpay wayratam sayachin. Lamar quchapa urquchakusqantam hawkayachin. […] Chaki allpatam tikran qurakunapa kanan quchakunaman. Chaki allpakunapim pukyukunata tuqyachin. Chaki allpatam tikran qurakunapa kanan quchakunaman. Chaki allpakunapim pukyukunata tuqyachin. Yarqaymanta kaqkunatam chaypi kawsachin. [...] Paykunaqa chakrapim tarpunku, uvaskunatam plantanku. Tukuy chaykunaqa alli-allinmi qispin”, nispa (Salmos 107:29, 35-37).
¿Imanasqataq muchuy kan? Apu kayta munaq runakunam qullqirayku imaymana mikuyta rantikunku runakuna chayta mikuspanku unqunanku kaptinpas.
¿Imaynatataq Diosninchik chaykunata allichanqa? Diospa gobiernonpiqa manañam kanqañachu runamasinta ñakarichiq runakunaqa (Salmos 37:10, 11; Isaias 61:8). Jehova Dios ima ruwananmantam bibliapi nin: “Payqa ñakarichisqa kaqkunapaqmi allin kaqta ruwapun. Yarqaymanta kaqkunamanmi payqa tantata quykun”, nispa (Salmos 146:7).
¿Imanasqataq muchuy kan? Sapa wata enteron pachapi achkallay-achka mikuy wischusqa kasqanraykum.
¿Imaynatataq Diosninchik chaykunata allichanqa? Jehova Diospa gobiernonpiqa mikuyqa manam usuchisqachu kanqa. Puchuq kawsayqa guardasqam kanqa. Chaytam yachanchik Jesus kay allpa pachapi kachkaspan ima ruwasqanwan. Payqa manam mikuytaqa usuchiqchu. Huk kutipim achkallay-achka runakunaman mikuchirqa, yaqachusmi karqa 5. 000 masnin. Mikuyta tukuruptinkum apostolninkunata Jesus nirqa: “Ama usunanpaqyá puchuqkunata lliwta huqariychik”, nispa (Juan 6:5-13).
Jehova Diosmi allichanqa tukuy imata, chaynapi mana pipas yarqaypi kananpaq. Paypa gobiernonpiqa runakunaqa sanoy-sanoymi kasunchik allin mikuy achkanpi kasqanrayku (Isaias 25:6). ¿Haykapitaq Jehova Diosqa tukuy chaykunata cumplinqa? Chayta yachaykunaykipaq leey “¿Haykapitaq kay allpa pachata Jesus kamachiyta qallaykunqa?” niqta.
a 2015 watapim Naciones Unidas organizacionpi tantiarurqaku 2030 watapaqqa manaña muchuy kananpaq.
b Chaytam ninku Fundación de alimentos de las naciones unidas, Fundación internacional del desarrollo sostenible, la fundación para los niños de las naciones unidas, Programa Mundial de alimentos de las Naciones Unidas hinaspa Organización Mundial de la Salud nispa.
c Apocalipsis libropi rikuriq tawa caballopi sillakuqkunamanta astawan yachanaykipaqqa leey “¿Imakunawantaq tupan tawa caballopi sillakuqkunaqa?” niqta.
d Diospa sutinmi Jehova (Salmos 83:18). Astawan yachaykunaykipaq leeykuy “¿Pitaq Jehova Diosqa?” niqta.
Kaykunatapas leeykuy
WILLAKUQ
¿Imakunawantaq tupan tawa caballopi sillakuqkunaqa?
Yachay kay willakuy imakunawan tupasqanmanta.
BIBLIAPA ANCHA ALLIN YACHACHIKUYNINKUNA
¿Imataq Diospa munaychakuyninqa?
Kay pachapi Jesus kaspanqa astawanmi willakurqa Diospa munaychakuyninmanta. Qatiqninkunapas unay tiempoñam mañakuchkanku Diospa munaychakuynin kay pachaman hamunanpaq.
HUK YACHACHIKUYKUNA
Hamuq tiempopiqa kusisqañam kawsakusun
¿Imanasqataq mana iskayrayananchikchu hamuq tiempopaq Jehova Diospa nisqankunaqmantaqa?
