2022 watapa abril killanpim Grupo Intergubernamental de Expertos sobre el Cambio Climático nisqanku willakurqa kay allpa pachanchik imayna kasqanmanta. Chaymantam Naciones Unidas organizacionpa secretarion António Guterres kaynata nirqa: “Allpa pachanchikpi tukuy imakunam aswan mana allinman chayarunqa. Cientificokunapa nisqanman hina mana cambiaspanchikqa aswan mana allinmanmi chayasun. Ancha riqsisqa llaqtakunam yakupa wampusqan kanqa, mana haykapipas pasakusqan rupaymi kanqa, llumpay wayra-param kanqa, manañam yakupas haypakunqachu hinaspapas millonnintin plantakunawan animalkunam chinkarunqa”, nispa.

 2022 watapi junio killapa 15 punchawninpim The New York Times periodico Yellowstone sutiyuq parque nacionalta yaku aparuptin kaynata nirqa: “Cientificokunapa nisqanman hinaqa, Yellowstone sutiyuq parque nacionalta ima pasasqanman hinas kay hamuq watakunata Estados Unidos nacionpi 423 parque nacionalkunatapas pasarunqa. Kaykuna pasakusqanqa bibliapa nisqanman hinam kachkan. Montekunam rupachkan, llumpay param kachkan, ritikuna chulluptinmi lamar quchapas yapakuchkan hinaspapas llumpa-llumpay rupaymi kakuchkan”, nispa.

 ¿Allichakunqachu allpa pachanchikpa kayna kasqanqa? Chayna kaptinqa, ¿pitaq allichanqa? Bibliapa nisqanmantayá yachaykusun.

 Bibliapim nin Diosqa ‘kay pacha qanrachaqkunata chinkachinanmanta’ (Apocalipsis 11:18). Bibliapa chayna nisqanwanmi kaykunata yachanchik:

1.  1. Runapa imapas ruwasqanmi kay pachataqa qanrachachkan.

2.  2. Kay pachaqa manañam qanrachasqachu kanqa.

3.  3. Diosmi kay pachataqa allichanqa, manam runakunachu.

 Bibliapim niwanchik kay allpa pachanchikqa ‘wiña-wiñaypaq kananmanta’ (Eclesiastes 1:4). Chaynaqa, hinallam kay allpapiqa runakunaqa kawsakunqaku.

•   Salmos 37:29 versiculopim nin: “Allin ruwaq runakunam allpataqa chaskinqaku. Hinaspam wiña-wiñaypaq chaypi kawsakunqaku”, nispa.

 Allpa pachanchikqa suma-sumaq allichasqam kanqa.

•   Isaias 35:1 versiculopim nin: “Chunniqwan chaki allpapas kusikunqam, chakillaña pampapas kusisqam kanqa, purunpi wiñaq wayta hinam waytarinqa”, nispa.