Kay 2024 watapiqa, yaqa 5.000 millon runakunam qawanqaku pukllaykunata, chay pukllaykunapiqa kanqaku 206 nacionkunamantawan llaqtakunamantam. Kay pukllaykunamanta nanachikuq presidente Thomas Bachmi nirqa: “Kay pukllaykunaqa enteron pachapi runakunatam huñun hawkalla, huklla kanankupaq”, nispa. Nirqaraqmi: “Kay pukllaykunawanqa kusikusunyá, hawkayaytamriki apamun, maymantaña-chaymantaña kaspapas huklla kanapaqmi yanapawanchik”, nispa.

 ¿Yaqachu chay pukllaykuna huklla, hawkalla kawsakunapaq yanapawachwan? ¿Imaynatataq hawkayaypi huk sunqulla kawsakuchwan?

 Kay wata pukllaykunaqa manam pukllayllachu. Kay pukllaykunapiqa rimankum runakunapa vidanmanta, autoridadkunamanta, rimankutaqmi respetanakuymanta, chiqninakuymanta, religionninkurayku chiqninakuymanta, apukunamantawan wakchakunamanta.

 Pukllaykunapiqa ima pukllaypipas runakunaqa allinmi tarikunku. Ichaqa sutillam rikukun imayna piensasqanku, munankum piensasqankuman hina piensanankuta chaynataq ruwasqankuman hina ruwanankuta. Chaykunaqa, runakuna huklla kanankupaq yanapananmantaqa astawanmi rakinachin.

 Bibliapiqa nirqañam runakuna hukniraq kasqanrayku huklla kayqa sasa kananmanta (2 Timoteo 3:1-5). Kaymanta astawan yachayta munaspaykiqa leey “¿Predijo la Biblia cómo sería la gente en nuestros días?” niq yachachikuyta.

 Bibliapiqa rimanmi hawkayaytawan huk sunqulla kayta enteron pachapi haypanamanta. Ninmi llapallan kay allpa pachapi runakuna Dios kamachiptin huklla kanankumanta (Lucas 4:43; Mateo 6:10).

 Kamachiq kananpaq Diospa churasqan Jesucristom enteron pachapi hawkayay kananpaqqa tukuyta ruwanqa. Bibliapim nin:

•   “Allin ruwaqkunam waytarinqa. Hawka kawsakuymi kanqa” (Salmos 72:7).

•   “Payqa yanapaykunanpaq qayakuq wakchatam yanapaykunqa [...]. Sasachakuymantawan ñakariymantam paykunataqa libraykunqa” (Salmos 72:12, 14).

 Kunanpas Jesuspa yachachisqankunaqa waranqantin runakunatam huklla kanankupaq yanapachkan 239 nacionkunapiwan llaqtakunapi. Jesuspa qatiqnin kasqankuraykum testigokunaqa enteron pachapi hawka kawsakuyta yacharunku. Chaymanta astawan yachanaykipaqqa leey “¿Atichwanchu manaña chiqninakuspa kawsakuyta?” sutiyuq Willakuy qillqata.