2022 watapim febrero 24 punchawpi Ucrania nacionman Rusia nacionpa militarninkuna yaykururqaku guerrata ruwanankupaq, wakin nacionpi kamachiqkuna guerra kananta mana munachkaptinkupas. Chay guerraqa ¿imaynatam enteron pachapi sasachawachwan? Naciones Unidas organizacionpi secretario Antonio Guterresmi nirqa guerra kaptinqa mana yupay atina runakuna ñakarinankumanta utaq wañunankumanta, chaynataq llaqtakunapas purmachisqa kananmanta.

•   Jesucristom tukupay punchawkunamanta rimaspan nirqa: “Huk nacionmi peleanqa huk law nacionwan chaynataq huk gobiernopas huk law gobiernowan”, nispa (Mateo 24:7). Chay nisqan kay tiemponchikpi imayna cumplikusqanmanta yachanaykipaq leey “¿Cuál es la señal de ‘los últimos días’ o de ‘los tiempos finales’?” niq yachachikuyta.

•   Apocalipsis qillqapim guerrata rikchanachin nina kaqllaña colorniyuq caballopi sillakuspa lluqsimuqwan. Paymi kamachisqa karqa “kay pachamanta hawkayayta chinkachinanpaq” (Apocalipsis 6:4). Chay willakuy imayna cumplikusqanmanta yachanaykipaq leey “¿Imakunawantaq tupan tawa caballopi sillakuqkunaqa?” niq yachachikuyta.

•   Daniel qillqapim nirqa norte lawpi kamachiq hinaspa sur lawpi kamachiq chiqninakuspa peleanankumanta (Daniel 11:25-45). Norte lawmanta kamachiqqa Rusia nacionmi chaynataq sayapakuqnin nacionkunam. Imanasqa chaynata nisqanchikmanta astawan yachanaykipaq qaway Danielpa qillqasqan imayna cumplikusqanmanta niq videota. a

•   Apocalipsis qillqapiqa nintaqmi ‘tukuy atiyniyuq Diospa piñakuynin punchaw guerramantapas’ (Apocalipsis 16:14, 16). Ichaqa chay guerrapiqa manam nacionkunaqa peleanqakuchu. Diospa piñakuynin punchaw guerramanta astawan yachanaykipaq leey “¿Imataq Armagedonqa?” niq yachachikuyta.

•   Bibliapim niwanchik Jehova Diosqa “guerrakunata kay pachapi kuchun-kuchun” chinkachinanmanta (Salmos 46:9). Jehova Dios hamuq tiempopi imakuna ruwananmanta yachanaykipaq leey “Hamuq tiempopiqa kusisqañam kawsakusun” niq yachachikuyta.

•   Jesusmi qatiqninkunaman yachachirqa Diospa gobiernon kamachimunanpaqña mañakunankupaq (Mateo 6:9, 10). Diospa gobiernonqa hanaq pachamanta kamachimuspanmi kusisqa kawsakunanchikpaq yanapawasun. Chaypiqa manañam guerrakunaqa kanqañachu, chayna kawsakunanchiktamá Diosqa munachkan. Diospa gobiernon kamachimuptin imaynaña kawsakunanchikmanta astawan yachanaykipaq qaway ¿Imataq Diospa munaychakuyninqa? niq videota.

 Ucrania nacionpiqa Jehova Diospa testigonkunam 129.000 kachkanku. Paykunaqa enteron pachapi testigokuna hinam Jesusta qatipakuspanku politicapiqa mana chapukunkuchu nitaq guerramanpas rinkuchu (Juan 18:36). Jehova Diospa testigonkunaqa enteron allpa pachapim Diospa gobiernon kamachimuptin allinña kawsakunanchikmanta hinaspa guerrakuna manaña kananmanta willakuchkaniku (Mateo 24:14). Bibliawan chaymanta astawan yachayta munaptikiqa kallpanchaykikum qillqamuwanaykikupaq.