Wakin runakunam tragota tomanku sasachakuypi tarikuspanku, llakisqa kaspanku utaq trago tomay munaq riqsinakusqankunawan hukllawakuspanku. ¿Trago tomaymanchu qukuchkanki? ¿Imataq yanapasunkiman trago tomayllaman mana qukurunaykipaq? Kay qillqapi nisqankunam yanapasunkiman.

•  ¿Llumpaytachu tomachkanki?

•  ¿Imaynatam musyakuwaq llumpayta tomasqaykimanta?

•  ¿Imakunataq yanapasunkiman manaña tomanaykipaq?

 Bibliapim nin: “Tomakuq runakunawanqa ama hukllawakuychu”, nispa (Proverbios 23:20 a).

 Kaypi yuyaymanay: Bibliaqa ninmi aschalla tomayqa mana hucha kasqanmanta (Eclesiastes 9:7). Nintaqmi sinkanakama tomayqa hucha kasqanta (Lucas 21:34; Efesios 5:18; Tito 2:3). Sinkarunaykikama mana tomaspaykipas sapa kutilla chaynata tomaspaykiqa unquruwaqmi, piwanpas sasachakuypim kawaq, utaq imapaqpas manam allintachu tantiakuwaq (Proverbios 23:29, 30).

 Achka doctorkunam ninku runakunaqa mana chaynalla kasqanchikta. Wakinmi achka copata tomanmanku, wakinñataqmi asllata. b Chaynata tomaspankupas unqurunmankum utaq ima sasachakuypipas tarikunmankum. Aswan allinqa kanman tragota mana tomaymi. Chaymantapas Organizacion Mundial de la Salud nisqankum nin imakunarayku mana tomanankumanta:

 Imakunarayku mana tomanankumanta:

•   Carrota manejananku kaptin utaq ima maquinatapas servichikunanku kaptin.

•   Wiksayuq kaspanku utaq ñuñuq wawanku kaptin.

•   Ima hampitapas tomaspanku.

•   Imawanpas unquspanku.

•   Tragota malliykuspaqa sinkanankukama tomaq kasqankurayku.

 Bibliapim nin: “Imaynam kawsasqanchiktayá allinta qawarikusun”, nispa (Lamentaciones 3:40).

 Kaypi yuyaymanay: Allinmi kanman sapa kuti hayka tomasqaykita qawarikuynikiqa, chaynapi llumpayta tomasqaykimanta musyakuspaqa saqinaykipaq. Qatiqninpi yachachikuymi yanapasunki llumpayta tomasqaykimanta musyakunaykipaq:

•   ¿Hawkalla kanaykipaqchu tomayta munanki? Piensankichu tomaspallayki hawkalla kasqaykita, riqsinakusqaykikunawan kusirikusqaykita, utaq ima llakikitapas qunqasqaykita.

•   ¿Astawanchu tomachkanki? Ichapas sapa kutiña fuerte tragota tomayta munachkanki.

•   ¿Tomasqaykiraykuchu sasachakuypi kachkanki? Ichapas tragopi qullqikita tukusqaykirayku wasikipi utaq llamkapakuynikipi sasachakuypi tarikuchkanki.

•   ¿Tomaruspaykichu mana allinkunata ruwanki? Ichapas carroykiwan kallpayta qallaykunki, nadianaykipaq yakuman pawaykunki, utaq ima maquinatapas manejayta qallaykunki.

•   ¿Pipas nisurqankichu llumpayta tomasqaykimanta? Ichapas pipas “llumpaytam tomachkanki” nisuptikiqa mana riqsikuspayki piñakunki, pakallapi tomanki hinaspa llullakuspayki ninki: “Aschallatam tomarqani”, nispa.

•   ¿Tomaymanchu amañarunki? Aschallata tomanaykipaq utaq manaña tomanaykipaq kallpanchakuspapas, ¿manañachu saqiyta atinki?

 1. Imata ruwanaykipaq tantiay.

 Bibliam nin: ‘Allinta tantiarispa imapas ruwasqaqa apuyachikunmi’ (Proverbios 21:5).

 Kayta ruway: Tantiakuy imay punchawkunallapi chaynataq asllata tomanaykipaq. Kallpanchakuy iskay punchawllapas mana tomanaykipaq.

 Llumpayta mana tomanankupaq yanapaq organizacionmi nin: “Tomayllamanña mana qukurunankupaqqa tantiakunankum wakin kutillapi tomanankupaq”, nispa.

 2. Hinallayá tantiakusqaykiman hina ruway.

 Bibliam nin: “Qallarisqaykichiktayá tukuychik”, nispa (2 Corintios 8:11).

 Kayta ruway: Yachakunaykim hayka copata tomaspayki sinkarisqaykita. Hinaspam chayman hina tantiakunayki asllata tomanaykipaq. Tragota tomanaykimantaqa gustasusqaykitam imatapas tomawaq ichaqa mana sinkachikuqta.

 Estados Unidospi tomayllamanña qukuruqkunata yanapaq organizacionmi nin: “Wakin punchawkunallapi tomanaykipaq tantiakusqaykiqa yanapasunkimanmi trago tomayllapiña mana kakunaykipaq”, nispa.

 3. Ama hikutachikuychu.

 Bibliam nin: “‘Arí’ nispaqa cumpliychikyá, ‘manam’ nispapas manam nisqaykichikman hinayá ruwaychik”, nispa (Santiago 5:12).

 Kayta ruway: Ñawpaqmantaraqmi tantiakunaykiña tomanaykichikpaq pipas nisuptikiqa “manam” ninaykipaq. Ninaykiqa sumaqllatam hinaspa mana iskayrayaspam.

 Estados Unidospi tomayllamanña qukuruqkunata yanapaq organizacionmi nin: “Chaylla ‘manam’ nisqaykiqa wakinpiqa yanapasunkim tomayta mana qallaykunaykipaq”, nispa.

 4. Piensay manaña tomaspaqa imayna tarikunaykipi.

 Bibliam nin: “Ima asuntopapas qallariyninmantaqa chay asuntopa tukupayninmi aswan allinqa”, nispa (Eclesiastes 7:8).

 Kayta ruway: Manaña tomaspaqa imayna tarikusqaykipi piensasqaykitam qillqawaq: Miskitam puñunki, sanollam kanki, qullqikitapas manam usuchinkichu, aylluykiwanpas utaq piwanpas allinllam kawsakunki. Chaymantapas piwanpas rimaspaykiqa willay manaña tomanaykipaq kallpanchakusqaykiqa allinnikipaq kasqanmanta.

 5. Diosta mañakuy yanapasunaykipaq.

 Bibliam nin: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:13).

 Kayta ruway: Trago tomayllamanña qukuruspaykiqa chayta saqinaykipaq Diosta mañakuy. c Tiempochakuytaq bibliata ñawinchaspa Diospa yachachikuyninkunata yachanaykipaq. Diosqa yanapasunkim trago tomaynikita saqinaykipaq utaq controlakunaykipaq.