Warmikunata manaña ñakarichinankumanta | ¿Ima nintaq bibliapiqa?
Enteron pachapim wara-waranqantin warmikuna warmacha kaspanpas utaq yuyayniyuq kaspanpas ñakarichisqa kanku. ¿Qampas chaynachu tarikunki? Kaypim yachanki Diosqa kuyasusqaykimanta chaynataq hamuq tiempopiqa manaña pipas warmikunata ñakarichinanmanta.
India nacionmanta Madunmi a nirqa: “Warmachallaraq kaptiymi turiy sapa punchaw kamiwaspan maqawaq. Casarakuruptiypas suegraymi tukuyta niwaspan sientechiwaq. Suedraypaqwan suedroypaqqa siervientanku hinam karqani. Chaymi wañuchikuytaña munarqani”, nispa.
La Organización Mundial de la Salud nisqankum nin: “Warmikunataqa enteron allpa pachapim tukuywan ñakarichinku”, nispa. Chaymantapas ninmi kimsa warmimanta hukninqa haykapipas maqasqa utaq abusasqa kasqanmanta.
Ichapas qamtapas pipas tukuyta nispa sientechisurqanki, maqasurqanki utaq abusasurqanki, hinaptinqa mayta rispapas piensankichá runakuna imatapas ruwarusunaykimanta. Warmikunata ñakarichisqankuwanqa piensankipaschá warmikunata pipas mana llakipayasqanta. Diospas, ¿manachu warmikunata llakipayan?
Bibliapim nin Diosqa warmikuna allinlla kanankuta munasqanmanta.
¿Diosqa valoranchu warmikunata?
Bibliapim nin: ‘Qaritawan warmitam unancharqa’, nispa (Genesis 1:27).
Ima ninantaq: Diosmi qaritawan warmita unancharqa, payqa munanmi iskayninku respetasqa kanankuta. Chaymantapas qusakunatam nin ‘kikinkuta hina warminkuta kuyananpaq’, arí warminta kuyaq qusaqa manam qaqchanchu nitaq maqanchu (Efesios 5:33; Colosenses 3:19). Diosqa munanmi warmikuna allinlla kawsakunankuta, manamá munanchu ñakarichisqa kanankutaqa.
Argentina nacionmanta Mariam nirqa: “Warmacha kaptiymi aylluymanta kaqkunalla abusawarqa. 17 wataypi kaptiypas patronniymi amenazawarqa paywan puñunaypaq, manachayqa llamkayniymanta qarquwananpaqmi niwarqa. Yuyayniyuq kaptiypas qusaymi, tayta-mamaymi, vecinoykunam tukuyta niwaspanku waqachiwaq. Ichaqa yacharurqanim Jehova b Diosqa warmikunataqa anchata valorasqanta, chaymi manaña iskayrayanichu Diosqa anchata kuyawasqanta hinaspa valorawasqanta”, nispa.
¿Imataq yanapanman ñakarichisqa warmikunata?
Bibliapim nin: “Kantaqmi ayllumantapas aswan kuyakuq amistadpas”, nispa (Proverbios 18:24).
Ima ninantaq: Sunqumanta kuyasuqniki amistadnikiqa yanapaykusunkim. Sunquykipi llakikita willakuruspaqa hawkañam tarikunki. Chay ruway allinnikipaq kasqanta piensaspaqa willakuwaqmi.
Turquia nacionmanta Elianam nirqa: “Abusasqa kasqaymantam 20 watapuni pimanpas mana willakurqanichu, chaymi llakisqallaña karqani, depresion unquywanmi karqani. Ichaqa chay pasawasqanmanta kuyawaqniy amistadniyman willakuruspayqa hawkañam tarikurqani. Payqa sumaqtam uyariykullawarqa”, nispa.
Bibliapim nin: “Ima llakikichiktapas Diospa makinpi saqiychik, payqariki qamkunamantam nanachikun”, nispa (1 Pedro 5:7).
Ima ninantaq: Diosta mañakuptikiqa payqa uyariykusunkim (Salmos 55:22; 65:2). Diosqa anchatam kuyasunki, chaymi payqa yanapasunki ancha valorniyuq kasqaykimanta cuentata qukunaykipaq.
Belice nacionmanta Anam nirqa: “Tukuywan ñakarichiwasqankuraykum piensarqani ñuqaqa mana imapaq valeq kasqayta, ichaqa Jehova Diosmanta yacharuspaymi manaña chaynatañachu piensarqani, allinñam tarikurqani. Kunanqa sunquyta kicharispaymi payman willakuni, chaywanmi hawkaña tarikuni. Payqa yachanmá imayna sientekusqayta”, nispa.
¿Hinallachu warmikunaqa ñakarichisqa kanqaku?
Bibliapim nin: “Qamqa mana taytayuqkunapaqwan ñakariqkunapaqmi allin kaqta ruwaykapunki. Chaynataqa ruwaykunki pipas manaña manchachinanpaqmi”, nispa (Salmos 10:18).
Ima ninantaq: Jehova Diosqa manapas unaymantam mana allin ruwaqkunata chaynataq warmikuna ñakarichiqkunata chinkachinqa.
Mexico nacionmanta Robertam nirqa: “Diosña gobiernawaptinchikqa warmikuna manaña ñakarichisqa kanankumanta yachaspaymi sunquypi hawkaña tarikuni”, nispa.
Hamuq tiempopiqa allinña kawsakunamanta bibliapa willawasqanchikmanta astawan yachayta munaspaykiqa, utaq Jehova Diospa testigonkuna bibliamanta yachachisunaykita munaspaykiqa, kaypi qillqay.
a Manam cierto sutinkuchu.
b Diospa sutinmi Jehova (Salmos 83:18). Qaway “¿Pitaq Jehova Diosqa?” niq yachachikuyta.