Kay watapim enteron allpa pachapi Jehova Diospa testigonkunaqa kimsa punchaw hatun huñunakuyninkuta kuskalla qawachkanmankupas hina grabasqata qawanqaku. Chaytaqa qawanqaku Julio hinaspa Agosto killakunapim. Kay hatun huñunakuyta enteron pachapi qawanankupaqmi 500 masnin rimaykunaman ruwarqaku. Kay hatun huñunakuypi lluqsimuq yachachikuykunata, videokunata, takikunata hinaspa tukuy ima ruwaytaqa huk watapi utaq maspim tukuqku. Kay coronavirus unquyraykum ichaqa 2020 watapaq hatun huñunakuytaqa yaqa tawa killallapi tukunanku karqa.

 Chaypaqmi enteron allpa pachapi imapas rantiypi cuentallikuqkunawan huk rimaykunaman qillqakuna ruwaypi cuentallikuqkuna hatun huñunakuy tiempollanpi lluqsinanpaq tukuypi yanapakurqaku. Qillqakuna ruwaypi cuentallikuqkunam yacharurqaku qillqakunata huk rimayman ruwaqkunapaqqa, videokunata hinaspa yachachikuykunata grabanankupaq allin microfonokuna mana kasqanta. Chayraykum rantiypi cuentallikuqkunaqa 1.000 microfonokunata rantirurqaku hinaspa 200 lawkunaman apachirqaku.

 Mana llumpayta gastanapaqmi microfonokunataqa achkanpi rantirqaku, hinaspam huk hawaqllaman apachirqaku. Chaymantañam sapa nacionman apachirqaku. Achkanpi rantisqankuraykum mana llumpay qullqitaqa gastarqakuchu.

 Chaymantapas rantiypi cuentallikuqkunaqa chay rantisqanku microfonokunatam Abril chaynataq Mayo killakunapi apachirqaku. Chay killakuna coronavirus unquyrayku tukuy ima wichqasqa kaptinpas. Mayo killapiqa chay apachisqanku microfonokunataqa huk rimayman qillqakunata ruwaqkuna hinaspa betelpi llamkaqkunam servichikuchkarqakuña.

 Rantiypi cuentallikuq Jay Swinney sutiyuq runam nin: “Jehova Diospa yanapakuynillanwanmi chay microfonokunataqa rantiyta atirqaniku, microfono rantikuqkunam mañakusqaykuta chaylla quwarqaku hinaspa as qullqillapaq. Arí, Jehova Diosllam tukuy imata tiempollanpi quwanchik”, nispa.

 Huk rimayman qillqakuna ruwaypi cuentallikuq Nicholas Ahladis sutiyuq runam nin: “Huk rimayman qillqakunata ruwaqkunam microfonokunata chaskiruspanku anchata kusikurqaku. Llamkaqmasinkuwan mana kuskalla kaspankupas atirqakum videokunata, yachachikuykunata hinaspa takikuna grabayta. Chaytaqa achka rimaykunapim ruwakurqa”, nispa.

 Kay 2020 watapi hatun huñunakuypaqmi microfonokunata rantirqaku hinaspa tukuy imata ruwarqaku. Chaytaqa rantirqaku internetpi donate.pr418.com nisqantakama qullqi apachisqanchikwanmi.