Kimsa punchaw hatun huñunakuyninchikpaq videonchikkunaqa sunqunchikmanmi chayawanchik. Allintam yanapallawanchik bibliata sumaq entiendenapaq. 2020 watapi “Tukuy tiempoyá kusikuychik” niq kimsa punchaw hatun huñunakuyninchikpaqmi kachkan 114 videonchikkuna. Chaymantam kachkan 43 Diospa llaqtanpi punta apaqkunapa chaynataq yanapaqninkunapa yachachisqanku videokuna. ¿Hayka qullqiwantaq ruwarqaku tukuy kay videokunata? Chaymantayá yachaykusun.

 Achka nacionkunapi kaq iñiqmasinchikkunam kay videonchikkunataqa ruwarqaku, yaqa 900 iñiqmasinchikkuna. Yaqa iskay watapim kay videonchikkunataqa ruwarqaku. Astawanqa tiempochakurqaku Nehemiasmanta: Jehova Diosqa kusikuyta quwaspanchikmi kallpanchawanchik niq hatun videonchikta ruwanankupaqmi.

 Kay videota ruwaq iñiqmasinchikkuna mikunankupaq, videota grabanankupaq aparatokuna rantinankupaq chaynataq videonchik sumaq kananpaqmi achka qullqita gastarqanchik.

 Videokuna ruwaypi yanapakuq iñiqmasinchik Jared Gosmanmi nin: “Diospa llaqtanpi yachachikuymanta cuentallikuqkunam niwarqaku atikuptinqa enteron pachapi kaq iñiqmasinchikkuna videonchikkunapi lluqsinankupaq. Chaynapi huk ayllulla kasqanchik sutilla qawakunanpaq. Chaymi 11 nacionkunapi kaq iñiqmasinchikkuna videonchikkunata ruwarqaku, chaypaqqa allintamá chay iñiqmasinchikkunawan llamkaykurqaniku”, nispa.

 Wakin videonchikta ruwanapaqqa tukuytamá ruwana karqa. Nehemiasmanta: Jehova Diosqa kusikuyta quwaspanchikmi kallpanchawanchik niq hatun videonchikta ruwanapaqmi Patterson (Nueva York) lawpi kaq Mount Ebo betel wasinchikpi tukuyta ruwarqaku. Chay videonchikta ruwanapaq qullqichanchikta mana llumpayta gastanapaqmi imapas ruwasqallankunataña servichikurqaku. Ñawpaq Jerusalen llaqtapa pirqankuna kaqlla kananpi 6 metro altoyuq pirqata tabla kaqllawan achkata ruwarqaku. Hinaspam pirqa kaqlla kananpaq huknin uyanta yeso hinawan estokyarurqaku hinaspa pintarurqaku. Hinaspaqa hina chay ruwasqallankutañam suchuchirqaku musuq callekunata ruwanankupaq. Ichaqa, chaynata ruwachkaspapas, chaykunata ruwanapaqmi yaqa 100.000 dolar qullqita gastarqanchik. a

 Kay kimsa punchaw hatun huñunakuyninchikpaq videonchikkunata imayna ruwasqankuta yachaspaqa aswan allinpaqmi videonchikkunata hapinchik. Manamá iskayrayanikuchu kay videonchikkunata qawaspanku Jehova Diosninchikta lliw hatunchanankumantaqa. Kuyasqay wawqi-panillaykuna, anchatam agradecekuykiku sunqumanta qullqichaykichikta donate.pr418.com nisqantakama churasqaykichikmanta utaq maynintapas chayachimuwasqaykichikmanta.