Huk iñiqmasinchikmi ancha kusisqa tarikurqa Bengali rimayninpi Musuq pachapi kawsaqkunapaq Diospa palabran Mateo-Apocalipsis bibliata ruwaruptinku, chaytaqa 19 watañam suyarqa. Llapallan runakunam chayna kusisqa tarikunku bibliata rimayninkupi chaskispanku. ¿Imaynatam chay bibliata ruwanku?

 Diospa llaqtanpi punta apaqkunapa yanapaqninkuna nisqankuman hinam chayna bibliata ruwanankupaq iñiqmasinchikkunata akllanku. ¿Hayka watapitaq ruwanku? Estados Unidos Warwick betel wasipi kaq iñiqmasinchik Nicolas Ahladismi nin: “Bibliataqa wakinpim unaypi ruwanku wakinpiñataq mana, chayqa ima rimaypi ruwasqankuman hinam. Chaymi musuq testamentotaqa watallapi utaq kimsa watapi ruwanku. Ñawpa testamentotawan musuq testamentotañataqmi tawa watapi utaq maspipas ruwanku. Chaymantapas achka iñiqmasinchikkuna yanapakuptinkuqa chayllam tukurunku”, nispa.

 Rimayninkuman bibliata ruwaqkuna kaptinpas kanantaqmi chay ruwasqankuta ñawinchaqkunapas, paykunaqa kananku manam huk llaqtallamantachu nitaq wiñaypurallachu. Ñawinchasqankuman hina ima nisqankum biblia ruwaqkunata yanapan imam kaqta chaynataq endiendekuqta ruwanankupaq. Bibliata imaynata ruwanankupaq yachachiq Africa lawpi kaq iñiqmasinchikmi nin: “Bibliata ruwaqkunaqa anchatam kallpanchakunku imam kaqta ruwanankupaq chaynataq runakunapa sunqunman chayaqta ruwanankupaqpas”, nispa.

 Bibliata ruwayta tukuruspankuñataqmi papelpiña kananpaq maquinakunawan ruwanku. Chaypaqmi servichikunku papelta, qarachanankupaq kaqta, tintata, laqanachinankupaq gomata, patanpi llipipipiqta, cintata, qipanpi laqanapaq cartonta chaynataq telata. Chaykunata rantinankupaqmi 2019 watapi gastarqaku achka-achka qullqita (20 millon dolarta). Hina chay watapitaqmi achka iñiqmasinchikkuna tuta punchaw (300.000 masnin horata) llamkarqaku bibliata maquinakunawan ruwaspanku, hinaspa huklaw llaqtapi iñiqkunaman apachirqaku.

 ¿Imanasqam bibliataqa sumaqchata chaynataq achka qullqipa chaninta ruwanku? Estados Unidospi betel wasipi yanapakuq Joel Blue iñiqmasinchikmi nin: “Bibliataqa suma-sumaqtam ruwaniku Jehova Diosmanta willakuspa payta hatunchanapaq”, nispa.

 Bibliataqa ruwankutaqmi ñawsa kaqkunapaqpas. Kachkanñam 10 rimaykunapi. Chay bibliakunaqa rakta-rakta kasqanraykum sasa ruway, huk bibliallatam maquinawan tukuy punchaw ruwanku. Ruwankutaqmi carcelpi kaqkunapaqpas, chay bibliataqa llaspa papelwanmi qarachanku.

 Musuq pachapi kawsaqkunapaq bibliam runakunapa sunqunkuman chayan. Africa lawpi kiluba rimayniyuq iñiqkunam karu-karu llaqtapi kanku, paykunapam kapurqa kiluba rimaypi sasa entiendey chullalla biblianku, chay bibliatam huñunakuspankuqa ñawinchanankupaq hukninman-hukninmanraq haywanakuqku. Ichaqa agosto 2018 watapaqmi Musuq pachapi kawsaqkunapaq bibliata kiluba rimaypi ruwarurqaku, kunanqa sapakamañam bibliayuq kachkanku, mana sasachakuspataqmi entiendenkupas.

 Alemanta rimaq iñiqmasinchikmi Musuq pachapi kawsakunapaq bibliamanta nirqa: “Ñawpaqtaqa niqmi kani ‘haykapiraq tiempochakusaq bibliata ñawinchanaypaq’ nispa. Kunanñataqmi nini ‘amalaya mana ima ruwayniyuq kayman bibliata hinalla ñawinchanaypaq’”, nispa. Carcelpi kaq runapas nirqam: “Musuq pachapi kawsaqkunapaq bibliatam quykuwarqaku, chayta ñawinchasqaymi imayna kayniyta cambianaypaq yanapawachkan. Munachkanim Jehova Diospa testigonkuna riqsiykuyta, ñuqapas munaymanmi testigo kayta”, nispa.

 Chayna bibliata ñawinchaqkunam anchata agradecekunku chayta ruwanankupaq qullqichankuwan yanapakuqkunata. Qullqichaykiwan yanapakuyta munaspaykiqa apachiwaqmi internetpi donate.pr418.com nisqanman yaykuspa. Anchatam agradecekuykiku chaynata yanapakusqaykichikmanta.