Tukuy tiemponkuwan Diosta serviq iñiqmasinchikkunam llapa nacionkunamanta rinku galaad escuelaman. Chayqa apakun Estados Unidos nacionpim Patterson Nueva York llaqtapi. a Chay escuelaman riq iñiqmasinchikkunaqa allin yachachisqam kanku, chaynapi Diospa llaqtanpi ima ruwayninkutapas allinta ruwanankupaq. Chaymantapas enteron nacionpi iñiqmasinkunatam allinta yanapanku, chaynallataq betel wasikunapipas.

 Galaad escuelamanqa tukuy nacionkunamantam rinku, chaymi 2019 watapi 147 claseman rirqaku 56 iñiqmasinchikkuna 29 nacionkunamanta. Chay escuelamanqa rinku tukuy tiemponkuwan Diosta serviq iñiqmasinchikkunam, wakin iñiqmasinchikkunam kanku betel wasipi llamkaqkuna, misionerokuna, llaqtan-llaqtan iñiqkunata watukuqkuna hinaspa 130 horata Diosmanta willakuqkuna.

 Chay escuelamanta encargakuq iñiqmasinchikkunaqa, chay escuela manaraq qallarichkaptinmi tukuy imata tiempowan allichanku. Tiempowantaqmi rantinku chay escuelaman riq iñiqmasinchikkunapa pasajentapas. Chaymi chay 147 claseman rinankupaq iñiqmasinchikkunapa pasajenkupi gastarqaku kimsa waranqa masnin qullqita sapakamapi. Chay escuelamanmi islas Salomonmanta iñiqmasinchikkuna avionwan rirqaku achka punchawkuna Estados Unidos Patterson llaqtaman. Chay risqankupim iñiqmasinchikkuna sapakama gastarqaku pusaq waranqa qullqita pasajenkupi. Chaypaqqa chaymanta cuentallikuq iñiqmasinchikkunam maskanku semanantin hinaspa killantin baraton kaq pasajeta rantinankupaq. Wakinpiqa achka kutita viajasqankuraykum as qullqillawanña viajanankupaq tarinku.

 Huklaw nacionmanta hamuq iñiqmasinchikkuna Estados Unidosman yaykunankupaqmi autoridadkuna permisota mañanku. Chaymi betelpi llamkaq iñiqmasinchikkuna yanapanku chay permisokuna hurquypi, chayta hurqunankupaqmi gastanku waranqa pusaq pachak masnin qullqita.

 Galaad escuelapi iñiqmasinchikkuna yachachisqa kasqankuqa llapallanchiktam yanapawanchik. Hendra Gunawan sutiyuq iñiqmasinchikqa iñiqkunapi punta apaqmi, paypa kasqanmanmi kacharqaku galaad escuelaman riq iñiqmasinchikkunata. Chaymi pay kaynata nin: “Paykuna manaraq chayamuptinkuqa, kaypiqa manam karqachu 70 horata Diosmanta willakuqkunaqa, chayaramuptinkum ichaqa kallpanchasqa tarikurqaku Diosta astawan servinankupaq, huknin iñiqmasinchikpas Diospa munaychakuyninmanta willakuqkunapaq escuelamanmi rirqa”, nispa.

 Sergio Panjaitan sutiyuq iñiqmasinchikpas galaad escuelamanta lluqsimuq iñiqmasinchikkunawanmi Asia lawpi betel wasipi llamkan. Paymi nin: “Chay escuelamanta lluqsimuq iñiqmasinchikkunaqa tukuy yachasqankuwan hatun tukunankumantaqa, yachasqankutam willawanku. Chayqa anchatam kallpanchawanku ñuqaykupas hukkunata kallpanchanaykupaq”, nispa.

 Chay escuelapi tukuy ima gastokunapaqqa, ¿ima qullqichawantaq paganku? Enteron pachapi iñiqmasinchikkunapa obra mundial nisqanman qullqichankuta churasqankuwanmi. Wakinñataqmi internetnintakama donate.pr418.com nisqanman apachinku. Anchatam agradecekuykiku chay escuelapi iñiqmasinchikkuna yachachisqa kanankupaq qullqichaykichikwan yanapakusqaykichikmanta.