Enteron pachapim kan huk rimayman qillqanchikkunata ruwanankupaq wasikuna, chay wasikunapim achka iñiqmasinchikkuna yanapakunku. Chaypi llamkaqkunaqa, ¿imakunatam servichikunku llamkanankupaq? Ima rimayman ruwasqankuman hina maylaw llaqtapipas kasqankuqa, ¿imanasqataq allin?

 Ima rimaypi qillqanchikkunata ruwasqankuman hina maylaw llaqtapi chay wasipa kayninqa chaypi yanapakuqkunapaqmi ancha allin. Karin sutiyuq iñiqmasinchikmi bajo alemanta riman, paymi nirqa: “Mexico nacionpa Cuauhtemoc sutiyuq llaqtachanmanmi astakaramuniku. Kaypiqa Diosmanta willakuq rispaykupas, rantipakuq rispaykupas runakunapa imayna rimasqankutam uyariniku, chayqa yanapawankum aleman bajo rimayman qillqanchikkunata astawan allintaraq ruwanaykupaq”, nispa.

 James sutiyuq iñiqmasinchikmi yanapakun Ghana nacionpi frafra rimayman qillqanchikkunata ruwaypi. Paymi nirqa: “Anchatam kusikuni frafra rimaq runakunapa kasqan lawpi qillqanchikkunata ruwanapaq wasi kasqanmanta. Chay rimaypi ruwasqayku qillqakunawanmi Diosmanta willakuni, entiendesqankuta qawaspaymi anchata kusikuni”, nispa.

 ¿Imaynatam tantianku chay wasi maylaw llaqtapi kananpaq? Enteron allpapi huñunakuna wasikunata ruwaypi cuentallikuqkunata yanapaq Joseph sutiyuq iñiqmasinchikmi nin: “Maylaw llaqtapi chay wasi kananpaqqa maskanaykum mayqin llaqtapi chay rimayta astawan rimasqankuta, chay llaqtapiqa kanantaqmi yaku, luz, chaynataq internet”, nispa.

 Huk rimayman qillqanchikkunata ruwanankupaqqa wakinpiqa hatun huñunakuypaq localninchikpim utaq huñunakunanchik wasipim alistanku. Chaymanmi yanapakuyta munaq iñiqmasinchikkunaqa rinku. Wakin llaqtakunapiñataqmi wasita rantinku iñiqmasinchikkuna chaypi yachanankupaq hinaspa llamkanankupaq. Chay rimaypi qillqanchikkunata manaña ruwaptinkuqa utaq huklawman astakuruptinkuqa, chay wasitam huñunakunanchik wasikunata ruwanankupaq cuentallikuqkuna rantikunku hinaspam chay qullqitaqa huk gastokunapaqña servichikunku.

 2020 watapim qillqanchikkunata huk rimaykunaman ruwanankupaq achka qullqita gastarqaku (13 millon dolarta). Huk rimayman ruwaq iñiqmasinchikkunaqa necesitankum computadorata, grabanankupaq kaqkunata, internetta, luzta, hinaspa imakunatapas. Tukuy chaykunaqa qullqipaqmi. Tukuy imayuqtam sapa computadorata rantinku 750 dolar qullqiwan. Chaymantapas, huk rimayman qillqanchikkunata ruwaqkunaqa anchatam servichikunku Watchtower Translation System nisqankuta, chayqa llumpayta mana sasachakuspanku qillqanchikkunata ruwanankupaqmi yanapan.

 Qillqanchikkunata huk rimayman ruwaqkunapaqqa yaqa sapakamapaqmi grabanankupaq kaqkunata rantinku. Chayqa ancha allinmi karqa. Coronavirus unquy qallaykuptinmi chay grabanankupaq kaqkunata wasinkuman apaspanku qillqanchikkunata chaynataq videokunata hinalla grabamurqaku.

 Huk rimayman qillqanchikkunata ruwanankupaq chay wasi maylawpi kasqanman hinam chay lawpi iñiqmasinchikkuna yanapakunku. Wakinkum ruwasqanku qillqakunata ñawinchaspanku ninku imaynata astawan allinta ruwanankupaq. Wakinñataqmi chay wasiman rispanku yanukuypi, pichaypi utaq ima ruwaypipas yanapakunku. Ciudad del Cabo llaqtapi Afrikaans rimayman qillqanchikkunata ruwaypi yanapakuq Cirstin sutiyuq iñiqmasinchikmi nin: “Kay lawpi yachaq iñiqmasinchikkunaqa imatapas ruwayta yachasqankuwanmi allinta yanapakunku”, nispa.

 Chaynata yanapakuq iñiqmasinchikkunaqa ancha kusisqam tarikunku. Huk kaqnin iñiqmasinchikmi nirqa: “Chaypi yanapakusqaywanmi ancha kallpanchasqa tarikuni”, nispa. Wakin iñiqmasinchikkunaqa chaymanmi rinku qillqanchikkunata, videokunata grabanankupaq. Mexico nacionpim totonaco rimayman qillqanchikkunata ruwanankupaq Veracruz llaqtaman astakurqaku. Chaypi yanapakuq iñiqmasinchik Juanam nin: “Kunanqa achka iñiqmasinchikkunañam totonaco rimayman qillqanchikkunata chaynataq videokunata grabanankupaq hamunku hichpallapi yachasqankurayku”, nispa.

 Huk rimayman qillqanchikkunata ruwaqkunataqa, ¿yanapanchu chay rimayta rimasqanku lawman astakusqankuqa? Arí, anchatam yanapan. Congo rimayman qillqanchikkunata ruwaypi yanapakuq Cedric sutiyuq iñiqmasinchikmi nirqa: “Pasaq watakunapiqa iñiqmasinchikkunaqa niwaqkum ruwasqayku qillqanchikkunata entiendenankupaq sasachakusqankumanta, kunanmi ichaqa llaqtanku lawman astakuspayku imayna rimasqankuman hina qillqanchikkunata ruwaptiyku niwanku sunqunkuman chayasqanta”, nispa.

 Sudafricapi xhosa rimaypi qillqanchikkunata ruwaypi yanapakuq Andile sutiyuq iñiqmasinchikmi nirqa: “Achka iñiqmasinchikkunam ninku kunan ruwasqayku qillqanchikkunataqa mana sasachakuspaña entiendesqankumanta. Pasaq watakunapiqa warmachakunam Willakuq qillqata ingles rimaypi leeqku, kunanmi ichaqa xhosa rimaypi leeyta munanku chaylla entiendenapaq kasqanrayku. Chaynatataqmi ruwasqayku bibliamantapas ninku”, nispa.

 Huk rimayman qillqanchikkunata ruwanapaq wasikunata, chaynataq chaypi yanapakuq iñiqmasinchikkunaman mikuyta utaq ima necesitasqankutapas qunankupaqmi huñunakusqanchik wasipi obra mundial niq cajachaman churasqanchik utaq donate.pr418.com nisqanman apachisqanchik qullqichata servichikunku.