Jehova Diospa testigonkunaqa 200 masnin nacionkunapim Diosmanta willakuchkanku chaynataq iñiqmasinkuta tukuypi yanapachkanku. Sapa nacionpi iñiqkunapa qullqi qusqankutam ima gastopaqpas servichikunku. Ichaqa wakin nacionpi iñiqkunapa qullqi qusqankuqa manam haypanchu chay nacionninpi gastokunapaqqa, hinaptinqa ¿pitaq paykunata yanapan?

 2 Corintios 8:14 nin: “Munanim qamkunapa imapas puchusuqnikichik paykunapa imanpas pisipuqninpi yanapananta, [...] chaynapi llapallaykichikpa imaykichikpas kananpaq”, nispa. Chayna nisqantam ñawpaq tiempopi iñiqkunaqa kasukurqaku. Chaytam Diospa llaqtanpipas ruwanku iñiqkunata yanapanankupaq. Chaymi hukkaqnin betel wasipi gastonkumanta qullqi puchuptinqa huklaw nacionpi kaq betel wasiman apachinku. Chay apachisqanku qullqiqa anchatam yanapakun.

 Tanzania nacionpiqa mikunallankupaqmi qullqichata tarinku. Chaymi qullqinku mana karqachu Mafinga llaqtapi huñunakusqanku wasita allichanankupaq. Huklaw nacionmanta apachisqanku qullqiwanmi chay wasita suma-sumaqta allicharurqaku, chay allichasqankumantapacham achka runakunaña huñunakuyta qallaykurqaku. Chaypi kaq testigokunam Jehova Diosta chaynataq qullqichankuwan yanapakuqkunata anchata agradecekunku. Kunanqa suma-sumaq wasipiñam Jehova Diosta yupaychachkanku.

 Coronavirus unquy rikuriramuptinmi Sri Lanka nacionpi achka iñiqmasinchikkuna mana mikuyniyuq qiparurqaku. Chaynam qiparullarqa Imara sutiyuq iñiqmasinchik Enosh sutiyuq warmachanpiwan. Ichaqa huklaw nacionniyuq iñiqmasinchikkunapa qullqicha qusqankuwanmi yanapayta atirqaku. Paymi nirqa: “Anchatamá agradecekuniku taytanchik Jehova Diosta chaynallataq iñiqmasinchikkunatapas qullqichankuwan yanapaykuwasqankumanta, mañakuchkanikutaqmi ñuqaykuta hina wakin iñiqmasinchikkunatapas yanapaykunankupaq”, nispa.

 Jehova Diospa testigonkunaqa maymantaña kaspankupas tukuy sunqunkuwanmi imapas kapuqninkuwan yanapanakunku. Chaytam ruwarqa Enosh warmachapas, payqa huk cajachapim qullqichanta huñuyta qallaykurqa chaywan hukkunata yanapananpaq. Mexico nacionniyuq Guadalupem wakcha kachkaspanpas hukkunata yanapayta munasqanrayku qullqichanwan yanapakun. Paymi nin: “Jehova Diosta tukuy sunquymanta agradecekusqayraykum qullqichaywan yanapakuyta munani, aschalla kaspanpas imachallapaqpas kanqam”, nispa.

 Jehova Diospa testigonkunaqa anchatamá kusikunku iñiqmasinkuta yanapanankupaq qullqita apachispankuqa. Brasil nacionpi betel wasimanta cuentallikuqmi nin: “Ñuqaykutapas achka watakunam yanapawarqaku huklaw nacionpi betel wasimanta, chayna yanapamuwasqankuraykum kay nacionniykupi Diosmanta astawan willakuyta atirqaniku, kunanqa ñuqaykuñam qullqichaykuwan yanapaniku huklaw nacionpi kaqkunata. Chaymantapas iñiqmasinchikkunaqa Diosmanta tukuy hinastinpi hinalla willakunanchikpaqmi qullqichankuwan yanapakunku”, nispa.

 ¿Imaynatataq Jehova Diospa testigonkunaqa huklaw nacionpi sasachakuypi tarikuq iñiqmasinkuta yanapanmanku? Yanapanmankuqa huñunakunanku wasipi qullqi huñunanku cajachaman obra mundial nisqanman qullqichankuta churaspankum, utaq internetpi donate.pr418.com nisqapi hina obra mundialman apachispankum. Qullqicha qusqanchikqa anchatamá hukkunata yanapanqa.