2020 watapim iñiqmasinchikkuna tukuywan sasachakurqaku chaynataq coronavirus unquywan. ¿Imaynatam Diospa llaqtanpi punta apaqkuna sasachakuypi tarikuqkunata yanaparqaku?

 2020 a watapim Diospa llaqtanpi punta apaqkunapa yanapaqninkuna, sasachakuypi tarikuq iñiqmasinchikkunata yanapanankupaq gastarqaku wara-waranqa qullqita (28 millon dolarta). Iñiqmasinchikkunam sasachakurqaku coronavirus unquywan, Africa lawpiñataq llumpay wayra-parawan, Venezuela hinaspa Zimbabue nacionkunapiñataq muchuywan. Chay qullqiwanqa rantirqakutaqmi mikuyta, yakuta, pachata, hampikunata chaynataq ima pisipuqninkutapas. Rantirqakutaqmi iñiqmasinchikkunapa wasinkuta allichanankupaq chaynataq limpianankupaq kaqkunatapas. Qatiqninpim yachasunchik imaynata yanapasqankumanta.

 Coronavirus unquy rikuriruptin. Coronavirus unquywanmi enteron pachapi iñiqmasinchikkuna sasachakuypi tarikuchkanku. Wakintam chay unquy hapirun, wakinñataqmi ayllunku wañukuptin llakisqa tarikunku, wakinpañataqmi qullqinku pisirun. Chayna sasachakuypi tarikuq iñiqmasinchikkunata yanapanankupaqmi sapa nacionpi punta apaqkunata akllarunku. Paykunam Diospa llaqtanpi punta apaqkunaman willanku iñiqmasinchikkuna imayna tarikusqankumanta. Diospa llaqtanpi punta apaqkunañataqmi tantianku imaynata yanapanankupaq.

 2020 watapim chay akllasqa iñiqmasinchikkuna coronavirus unquy kasqanrayku iñiqmasinchikkunata yanaparqaku mikuywan, yakuwan, chaynataq imapas necesitasqankupi. Wakin llaqtakunapiqa iñiqmasinchikkunatam yanaparqaku ima yanapakuytapas gobiernomanta chaskinankupaq.

 Jehova Diosta mana riqsiq runakunapas qawarqakum iñiqmasinchikkunata imayna yanapasqanchikta. Zambia nacionniyuq Field Simwinga sutiyuq policiam nirqa: “Anchatam agradecekuykiku sasachakuypi tarikuqkunata kay llaqtapi yanapasqaykichikmanta”, nispa.

 Angola nacionpim muchuy karqa. Coronavirus kasqanraykum Angola nacionpi kawsaykuna pisilla karqa chaynataq llumpayta wicharirurqa. Hinaptinmi iñiqmasinchikkunaqa mikunankupaq qullqinku mana haypaptin yarqaymanta tarikurqaku.

 Chaymi Diospa llaqtanpi punta apaqkuna Brasil betel wasipi punta apaqkunata nirqaku Angola nacionpi kaq iñiqmasinchikkunaman mikuykunata apachinankupaq. Qusqanchik qullqichata allinta servichikunankupaqmi iñiqmasinchikkunaqa tantiarurqaku imatapas mayoristamanta rantinankupaq. Hinaspam costalkunapi utaq cajakunapi hinarqaku arrozta, frijolta, aceiteta chaynataq imachakunatapas. Chay costalkunapa utaq cajakunapa llasayninmi karqa yaqa 20 kilo, sapakamapim gastarqaku 22 dolar qullqita. Kunankamaqa 33.544 costalkunatam utaq cajakunatam mikuyniyuqta aparachinku. Chaynata apachisqankuwanmi hinaspa Angolapi imakunatawanpas rantisqankuwanmi 50.000 iñiqmasinchikkunata yanaparqaku.

 Chayna yanapakuyta chaskiq iñiqmasinchikkunaqa, ¿imaynataq tarikunku? Karu llaqtachapi yachaq Alexandre sutiyuq iñiqmasinchikmi nirqa: “Chay yanapakuyta chaskisqaywanmi cuentata qukurqani Jehova Diosqa mana qunqaruwasqanmanta, chaynataq llaqtanpi punta apaqkunapas anchata kuyawasqankumanta”, nispa. Wawanta sapallan uywaq Mariza sutiyuq iñiqmasinchikpas nirqam: “Jehova Diosqa mañakusqaytam uyariykuwarqa, anchatam agradecekuni payta chaynataq llaqtanpi punta apaqkunata”, nispa.

 Zimbabue nacionpim mana pararqachu. 2020 watapim Zimbabue nacionpi mana pararqachu, chaymi wara-waranqantin runakuna yarqaymanta wañuypa patanpi tarikurqaku. Iñiqmasinchikkunapapas mikuyninkum mana karqachu.

 Achka iñiqmasinchikkunatam akllarqaku chayna sasachakuypi kaq iñiqmasinchikkunaman mikuyta chayachinankupaq. Wakin iñiqmasinchikkunapas yanapakurqakum chay mikuykunata costalkunaman, cajakunaman hinaypi, hinaspa camionkunaman cargaypi, wakinñataqmi kikinkupa carronkuwan aparqaku. b Iñiqmasinchikkunata yanapanankupaqmi gastarqaku 691.561 dolar qullqita. Yanaparqakuqa 22.700 iñiqmasinchikkunatam.

 Wakin iñiqmasinchikkunapaqa huñukusqanku kawsaychankum manaña karqachu. Chaymi chay apachisqanku mikuyta chaskikuspanku Jehova Diosta anchata agradecekuspa paypaq takikunata takiyta qallaykurqaku.

 Huk kaqnin llaqtachapim iskay viuda iñiqmasinchikkuna rirqaku yanapakuyta chaskinankupaq huñunakuyman. Ichaqa chay huñunakuypim nirqaku yanapakuyta chaskinankupaqqa mayqin autoridadman sayapakunankumanta. Iñiqmasinchikkunaqa manam munarqakuchu mayqinman sayapakuytapas, chaymi chay huñunakuymanta pasakurqaku. Hinaptinmi llaqtamasinkuna asipayaspanku nirqaku: “Yawkuna, yanqataq mikuyta mañakuwaqniyku kutimuwaqchik”, nispanku. Chaymanta iskay semana pasayllatam paykunaman iñiqmasinchikkuna mikuyta chayarachirqaku. Llaqtamasinku runakunam ichaqa autoridadkunapa yanapakuyninta unay suyarqaku.

 Huklaw llaqtachapi yachaq Prisca sutiyuq iñiqmasinchiksi chayna sasachakuy kaptinpas miercolespi hinaspa viernespi Diosmanta willakuq wasin-wasin riq, payqa tarpuy tiempopipas hinallas willakusqa, chaysi llaqtamasinkuna niqku: “Yaw, chayna purikuspaykiqa wasikipi kaqkunatam yarqaymanta wañurachinki”, nispanku. Iñiqmasinchikñataqsi niq: “Jehova Diosqa manam saqinchu payman sunquyuqkunataqa”, nispa. Chaymanta qipallatas iñiqmasinchikkuna mikuyta chayarachisqaku, hinaptinsi llaqtamasinkunaqa nisqaku: “Jehova Diosqa manamiki qunqasusqankichu, ñuqaykupas paymantam astawan yachayta munaniku”, nispa. Kunanqa 7 llaqtamasinkunam huñunakuykunata radionkuwan uyarichkanku.

 Kay tukupay punchawkunapiqa imapas astawanmi sasachawasun (Mateo 24:3, 7). Chaymi anchata agradecekuykiku donate.pr418.com nisqanman qullqichaykichikta apachimuwasqaykikumanta. Chayqa sasachakuypi kaq iñiqmasinchikkunata yanapanaykupaqmi.