1 Corintios 14:1-40
14 Qamkunaqa hinallayá kuyakuq kaychik, chaywanpas hinallayá kallpanchakuychik Diospa atiyninwan imakunatapas ruwayta yachanaykichikpaq, astawanqa kallpanchakuychik Diospa qusqan willakuykunamanta rimanaykichikpaqyá.+
2 Pipas huk rimayta rimaqqa manam runakunamanchu rimapayan, aswanqa Diosmanmi mana pipas entiendesqanrayku,+ payqa Diospa atiynin yanapaptinmi Diospa kaq pakasqa kaqkunamanta riman.+
3 Diospa qusqan willakuymanta rimaqmi ichaqa runakunata rimasqanwan kallpanchan, yanapan chaynataq sunqunta tiyaykachin.
4 Huk rimayta rimaqqa kikillantam kallpanchakun, Diospa qusqan willakuymanta rimaqmi ichaqa iñiqkunata kallpanchan.
5 Ñuqaqa munaymanmi llapallaykichik huk rimaykunata rimanaykichikta,+ Diospa qusqan willakuymanta rimanaykichiktam ichaqa astawan munayman.+ Diosmanta willakuymi aswan allinqa huk rimaykunapi rimaymantaqa, huk rimaypi rimaspaqa ima ninan kasqanta entiendechichun* iñiqkuna kallpanchasqa kananpaq.
6 Wawqi-panillaykuna, sichu qamkunaman kunan ñuqa hamuyman huk rimaykunapi rimaspay hinaptinqa, ¿imaynataq yanapaykichikman? Yanapanaypaqqa, ¿manachu rimapayanay Diosmanta musquypi hina* chaskisqaywan+ utaq yachaywan+ utaq Diospa qusqan willakuywan utaq ima yachachikuywanpas?
7 Chayqa kanman quenata* utaq arpata tocaptinku waqasqan hinam. Mana allinta* tocaptinkuqa, ¿imaynatataq yachachwan quenawan utaq arpawan ima tocasqankuta?
8 Chaymantapas, imam waqananman hina cornetilla mana waqaptinqa, ¿pitaq peleaq rinanpaq alistakunqa?
9 Chaynallataqmi sasa entiendenata rimaptikichikpas, ¿imaynatataq pipas yachanman imamanta rimasqaykichikta? Yanqapaqchiki rimachkawaqchik.
10 Kay pachapiqa tukuy rikchaq rimaykunam kachkan, ichaqa llapallanmi rimaqkunapaqqa entiendekun.
11 Hukpa rimasqan ima ninan kasqanta mana entiendespayqa rimapayawaqniypaqmi huklaw nacionniyuq hina rikuriruni, rimapayaqniypas ñuqapaqmi huklaw nacionniyuq hina rikurirun.
12 Chaynallataqmi qamkunawanpas kanman, qamkunaqa Diospa atiyninwan imakunatapas ruwaytam anchata munachkankichik, hinaspaqa kallpanchakuychikyá iñiqkuna kallpanchaq kaqkunata chaskinaykichikpaq.+
13 Chaynaqa, huk rimayta rimaqqa Diosta mañakuchun chay rimasqanta uyariqninkunaman entiendechinanpaq*.+
14 Huk rimaypi Diosta mañakuspayqa paypa atiyninwanmi mañakuchkani, ichaqa manam entiendenichu ima nisqaytapas.
15 Hinaptinqa, ¿imatataq ruwasaq? Diospa atiyninpa yanapakuyninwanmi Diosta mañakusaq, mañakusaqtaqmi entiendesqay palabrakunawanpas. Diospa atiyninpa yanapakuyninwanmi takisaq, ichaqa takisaqtaqmi entiendesqay palabrakunawanpas.
16 Chayrayku, sichu Diospa atiyninpa yanapakuyninwan takinki hinaptinqa, ¿imaynatataq nisqaykita mana entiendespanqa pi runapas agradecekuspa rimasqaykimanta “chaynayá kachun*” ninqa?
17 Allintapunimá agradecekuchkanki, ichaqa manam chay uyarisuqniki runaqa kallpanchasqachu tarikun.
18 Diostam agradecekullani llapallaykichikmantapas mastaraq huk rimaykunapi rimasqaymanta.
19 Iñiqkunapa huñunakuyninpim ichaqa huk rimaypi 10.000 palabrakuna rimanaymantaqa munani entiendekusqan pichqa palabrallatapas rimayta, chaynapi hukkunatapas yachachinaypaq.+
20 Wawqi-panillaykuna, amayá warmachakuna hinaqa piensaychikchu,+ aswanqa yuyayniyuq runakuna hinayá piensaychik,+ warmachakuna hinaqa kaychik mana allin ruwaykunapaqyá.+
21 Ñawpaq qillqakunapim nin: “Jehova* Diosmi nin: ‘Huk rimaypim hinaspa mana riqsisqanku runakunapa rimayninpim kay llaqtapi runakunata rimapayasaq, paykunam ichaqa mana uyariwayta munanqakuchu’”, nispa.+
22 Chaynaqa huk rimaykunaqa manam iñiqkunapaqchu, aswanqa mana iñiqkuna chayta qawaspa iñikunankupaqmi,+ Diospa qusqan willakuymanta rimaymi ichaqa iñiqkunata yanapananpaq, manam mana iñiqkunata yanapananpaqchu.
23 Chayrayku huñunakusqaykichikpi llapallaykichik huk rimaykunapi rimaptikichikqa, ¿manachu mana iñiq runapas utaq pi runapas yaykuramuspan ninqa: “Kay runakunaqa locoyarunkum”, nispan?
24 Ichaqa sichu Diospa qusqan willakuymanta llapaykichik rimachkaptikichik mana iñiq runa utaq pi runapas yaykuramunqa hinaspanqa llapallaykichikpa rimasqaykichikta uyarispanmi huchayuqpaq hapikunqa hinaspam imayna kasqanta sumaqta qawakunqa.
25 Chaynapim yachanqa sunqunpi pakasqa kaqkunamanta, chaymi qunqurakuykuspa kumuykunqa, hinaspam Diosta yupaychanqa: “Chiqaptapunim Diosqa qamkunawan kachkan”, nispan.+
26 Chaynaqa wawqi-panillaykuna, ¿imatam ruwana kanqa? Huñunakuspaykichikqa huknikichikmi Diospaq takinkichik, huknikichikñataq yachachinkichik, huknikichikñataqmi musquypi hina Diosmanta willakuykunata chaskinkichik, chaymantapas huknikichikmi huk rimayta rimankichik, huknikichikñataq rimasqankupa ima ninan kasqanta entiendechinkichik.+ Tukuy imatayá ruwaychik hukkunata kallpanchanaykichikpaq.
27 Huk rimaypi hukkaqnin rimaptinqa iskay-kimsallayá chullachinakuspa rimachun hinaptin hukninñataq imam ninan kasqanta entiendechichun*.+
28 Huk rimaypi rimasqanta entiendechiq* mana kaptinqa amayá huñunakuypiqa rimachunchu, rimaspaqa-rimachun kikillanpaq hinaspa Diosllapaqyá.
29 Chaymantapas Diospa nisqankunamanta willakuqkuna iskay utaq kimsa rimachunku,+ wakinñataq ima ninan kasqanta entiendechunku.
30 Chaypi tiyaqkunamanta mayqinpas musquypi hina Diosmanta willakuykunata chaskiptinqa punta rimaqyá upallalla kachun.
31 Qamkunaqa llapallaykichikmi chulla-chullallamanta Diospa qusqan willakuymanta rimawaqchik, chaynapi llapallanku yachanankupaq hinaspa kallpanchasqa kanankupaq.+
32 Diosmanta willakuq runakuna Diospa atiyninwan imakunatapas ruwayta atispankuqa amayá chaqwa-chaqwataqa rimachunkuchu.
33 Diosqa manam chaqwa ruwaqchu, aswanqa hawka kananchikta munaqmi.+
Diospa runankunapa llapallan huñunakuyninkunapi hinam
34 warmikunaqa upallalla kananku huñunakuypiqa, manam paykunaqa rimanankuchu,+ aswanqa kasukuqmi kananku,+ chaynatam Diospa kamachikuyninpipas willakun.
35 Imatapas yachayta munaspankuqa wasinkupiyá qusankuta tapukuchunku, huñunakuypi warmipa rimayninqa pinqaypaqmi.
36 ¿Qamkunawanchu Diospa palabranqa qallarirqa? ¿Qamkunallachu chaskirqankichik?
37 Sichu pipas ninman Diospa nisqankunamanta willakuq* kasqanta utaq Diospa atiyninwan imakunapas ruway atisqanta, hinaspanqa yachananmi qamkunaman qillqamusqaykunaqa señorninchikpa kamachikuynin kasqanta.
38 Pipas kaykunata mana kasukuqqa* hina chaynallayá kachun.
39 Chayraykuyá wawqi-panillaykuna hinalla kallpanchakuychik Diospa qusqan willakuymanta rimanaykichikpaq,+ ichaqa amayá harkakuychikchu huk rimaykunapi rimanankutaqa.+
40 Tukuy imayá allin ruwasqa kachun, amayá chaqwa-chaqwachu.+
Willakuykuna
^ Utaq: “Rimayninkupi willachun”.
^ Utaq: “Revelacionpi”.
^ Utaq: “Flautata”.
^ Utaq: “Mana huk tonollapi”.
^ Utaq: “Rimayninkupi willananpaq”.
^ Utaq: “Amen”.
^ Qaway A5 kaq yachachikuyta.
^ Utaq: “Rimayninpi willachun”.
^ Utaq: “Rimayninpi willaq”.
^ Utaq: “Profeta”.
^ Ichapas kanman: “Mana yachaqqa”, niqpas.
