1 Cronicas 14:1-17
14 Tiro llaqtata kamachiq Hiranmi+ willakuqkunata Davidman kacharqa. Apachirqataqmi cedromanta tablakunatapas, rirqakutaqmi carpinterokunapas, wasi ruwaqkunapas*. Chaynapi Davidpa wasinta pirqanankupaq.+
2 Davidqa chayraqmi yacharurqa Israel runakunapa kamachiqnin kananpaq Jehova Dios yanapasqanta+ hinaspa hatunchasqanta. Diosqa runankunaraykumá kamachiq kananpaq churarqa.+
3 Jerusalen llaqtapim Davidqa achka warmikunawan+ casarakurqa. Chaymi churinkunaqa qaripas warmipas achka karqa.+
4 Jerusalen llaqtapi naceq churinkunam karqa:+ Samua, Sobab, Natan,+ Salomon,+
5 Ibar, Elisua, Elpelet,
6 Noga, Nefeg, Jafia,
7 Elisama, Beeliada hinaspa Elifelet.
8 Filistea runakunam yacharurqaku Israel runakunapa kamachiqnin kananpaq Davidta churarusqankuta,+ hinaspankum llapallanku maskaq hamurqaku.+ Chayta yacharuspanmi Davidqa paykunawan peleaq lluqsirqa.
9 Filistea runakunaqa Refaim pampaman chayaramuspankum chaypi yachaqkunata* wañuchiyta qallaykurqaku.+
10 Hinaptinmi Davidqa Diosta tapukurqa: “¿Risaqchu Filistea runakunawan peleaq? ¿Makiymanchu paykunata churaykunki?”, nispa. Jehova Diosñataqmi nirqa: “Arí, Filistea runakunataqa makikimanmi churasaq”, nispa.+
11 Chaymi Davidqa Baal-perazim lawman+ rispan Filistea runakunata chaypi wañurachirqa. Hinaspam nirqa: “Hatun pirqata lluqlla tuñichichkaq hinam Diosqa chiqniwaqniykunata wañurachin”, nispa. Chaymi chay sitiota suticharqa “Baal-perazin” nispa.
12 Filistea runakunaqa chaypim saqirurqaku taytacha-mamachankuta, hinaptinmi David kamachiptin kañarurqaku.+
13 Chaymanta qipatam Filistea runakunaqa kaqmanta Refaim pampapi yachaqkunaman yaykururqaku.+
14 Chay kutipipas Davidqa Diostam tapurqa, Diosñataqmi nirqa: “Amayá ñawpaqninkutaqa asuykuychu. Aswanqa muyuramuspayá plantakunapa* kasqanpi pakakamuspa qipankumanta wañuchimuy.+
15 Chay plantakunapa saqaqaqasqanta uyarispaykim pawaykunki, chay plantakunaqa soldadokunapa purisqan hinam saqaqaqanqa. Ñuqam yanapasqayki Filistea runakunata wañuchinaykipaq”, nispa.+
16 Diospa kamachisqanman hinam Davidqa ruwarqa,+ chaymi Gabaon llaqtamanta Guezer llaqtakama Filistea runakunata wañurachirqa.+
17 Davidqa enteron nacionpim riqsisqa rikurirurqa. Jehova Dios yanapaptinmi lliw runakuna Davidta manchakurqaku.+
Willakuykuna
^ Utaq: “Rumiwan pirqaqkunapas”.
^ Utaq: “Tiyaqkunata”.
^ Hebreo rimaypiqa nichkan: “Bekja plantakunapa”, nispam.
