1 Cronicas 17:1-27
17 Kamachiq Davidqa sumaq wasinpiñam yacharqa*, chaymi Diosmanta willakuq* Natanta nirqa:+ “Ñuqaqa cedromanta ruwasqa sumaq wasipim yachachkani,+ Jehova Diospa baulninñataqmi* carpallapi kachkan”, nispa.+
2 Natanñataqmi Davidta nirqa: “Sunquykipa nisqantayá ruway, Diosmi yanapasunki”, nispa.
3 Chay tutam Natanta Dios nirqa:
4 “Yupaychaqniy Davidtayá nimuy: ‘Jehova Diosmi nisunki: “Baulniyta churanapaq wasitaqa manam qamchu ruwanki.+
5 Egipto nacionmanta Israel runaykunata hurqumusqay punchawmanta kunankamaqa manam baulniyqa wasipichu karqa, aswanqa mayman apasqa kaspanpas carpallapim karqa.+
6 Israel runaykunata yanapasqay punchawkunapiqa juezkunatam churarqani, chaynapi paykunata yanapananpaq. Chay churasqay runakunataqa manam haykapipas nirqanichu wasita ruwapuwanankupaqqa. Manam haykapipas nirqanichu: ‘¿Imanasqataq cedro sachamanta wasita mana ruwapuwankichikchu?’”’, nispaqa.
7 Yupaychawaqniy Davidtaqa nimuytaqyá: ‘Angelkunata kamachiq Jehova Diosmi nisunki: “Oveja michiq kachkaptikim ñuqaqa akllarqayki Israel runaykunapa kamachiqnin kanaykipaq.+
8 Ñuqaqa qanwanmi kasaq mayta riptikipas.+ Qawachkaptikim chiqnisuqniki runakunata chinkachisaq.+ Hinaspaymi yanapasqayki ancha riqsisqa runakuna hina kanaykipaq.+
9 Israel runaykunamanmi sumaq allpata qusaq. Chaypim pipapas manaña imanasqan yachankichik. Manañam chiqnisuqnikichik runakunapas ñawpaqpi hinachu ñakarichisunkichik.+
10 Chay runakunaqa juezkunata churasqay tiempomantaraqmi ñakarichisurqankichik.+ Chiqnisuqniki runakunatam pinqayman churasaq.+ Nikitaqmi: ‘Ñuqa Jehova Diosmi yanapasqayki qampas chaynataq miraynikikunapas kamachiq kanaykichikpaq’, nispa.
11 Wañukuptikipas huknin churikitam kamachiq kananpaq churaspay yanapasaq.+
12 Paymi wasita ruwapuwanqa.+ Ñuqañataqmi yanapasaq kamachikuynin wiñaypaq kananpaq.+
13 Ñuqam taytan kasaq, payñataqmi churiy kanqa.+ Paytaqa manam punta kamachiqta hinachu qipanchasaq*.+
14 Churikitam akllasaq wasiypi wiñaypaq kamachiq kananpaq.+ Payqa wiñaypaqmi kamachinqa”’”, nispa.+
15 Natanqa Diospa kayna nisqankunatawan musquypi hina* qawasqankunatam Davidman willarqa.
16 Chaymi kamachiq Davidqa tiyaykuspan Jehova Diosta mañakurqa: “Jehova Dioslláy, ¿pitaq ñuqaqa kallani? ¿Pitaq aylluypas kunankama yanapawanaykikupaqqa?+
17 Manataqmi chayllachu. Dioslláy, qamqa niwankiraqmi mirayniykuna unay kamachinanmantapas.+ Jehova Dioslláy, aswan hatunchasqa kanaytaraqmi munanki.
18 ¿Imataraqtaq ñuqallayqa nikiman hatunchawasqaykimanta? Qamqa allintapunim riqsiwanki.+
19 Jehova Dioslláy, kuyawaspaykim atiynikiwan tukuyta ruwarqanki, chaytam qawaykachiwanki. Chayqa karqa munasqaykiman hinam.+
20 Jehova Dioslláy, manam qam hinaqa pipas kanchu,+ uyarisqaykupi hinapas qamllam Diosqa kanki.+
21 ¿Yaqachu Israel runaykikuna hina kanman huk runakuna?+ Diosnilláy, qanmi paykunataqa runaykikuna kananpaq Egipto nacionpi ñakarichisqa kasqankumanta hurqumurqanki.+ Runaykikunapa qayllanmanta huklaw llaqtayuq runakunata qarqusqaykiwanmi riqsichikurqanki,+ manchakuypaq kaqkunata ruwasqaykiwanmi riqsichikurqanki.+
22 Qanmi Israel runakunata wiñaypaq runaykikuna kananpaq akllaykurqanki.+ Jehova Dioslláy, qanmá paykunapa Diosninqa kanki.+
23 Chaynaqa Jehova Diosnilláy, ñuqamanta hinaspa mirayniykunamanta rimasqaykiman hinayá imapas nisqaykiqa wiñaypaq kachun.+
24 Sutikimantaqa amayá pipas iskayrayachunchu, wiñaypaq hatunchasqayá kachun,+ runakunapas nichunkuyá: ‘Angelkunata kamachiq Jehova Diosqa Israel runakunapa Diosninmi, payqa Israel runakunapa kamachiqninmi’, nispa. Kay yupaychaqnikipa mirayninkunaqa qampa yanapakuynikiwanyá wiñaypaq kachun.+
25 Dioslláy, qanmi niwarqanki ñuqapas chaynataq mirayniykunapas kamachiq kanaykumanta. Chayraykum mana iskayrayaspay mañakamullayki.
26 Jehova Dioslláy, qamllam Diosqa kanki. Kay yupaychaqnikimanmi allin kaqkunata willaykuwanki.
27 Chaynaqa, qampa bendicionnikiwanyá mirayniykunaqa wiñaypaq kachun. Jehova Dioslláy, qamqa bendeciykunkim, wiñaypaqmi bendecinki”, nispa.
Willakuykuna
^ Hebreo rimaypiqa nichkan: “Dioswan pacto ruwasqanku baulñataqmi”, nispam.
^ Utaq: “Profeta”.
^ Utaq: “Tiyarqa”.
^ Kaypiqa rimachkan imaña kaptinpas hinalla kuyananmantam.
^ Utaq: “Revelacionninpi”.
