1 Cronicas 29:1-30
29 Kamachiq Davidmi llapallan Israel runakunata nirqa: “Diospa akllasqan churiy+ Salomonqa mana ancha yachayniyuq warmallaraqmi,+ ruwananñataqmi kachkan achka-achka. Ruwanan wasiqa* manam runapaqchu, aswanqa Jehova Diospaqmi.+
2 Tukuyta ruwaspaymi Diospa wasinpaq huñuruni qurimanta kaqkunapaq qurita, qullqimanta kaqkunapaq qullqita, broncemanta kaqkunapaq bronceta, fierromanta kaqkunapaq fierrota,+ tablamanta+ kaqkunapaq tablata. Alistarunitaqmi llipipipiq yana* rumichakunatapas, laqanapaq alaqa rumichakunatapas, tukuy rikchaq rumichakunatapas, llipipipiq sumaq rumichakunatapas chaynataq achkallaña yuraq rumikunatapas.
3 Diospa wasinpaq tukuy ima alistasqaymantapas+ chuya wasinta kuyasqayraykum quni kikiypa quriytawan qullqiyta.+
4 Qunim Ofir lawmanta+ apamusqay 102.600 kilo* qurita hinaspa 239.400 kilo* qullqita, tukuy chaykunawan Diospa wasinta llusichinanpaq,
5 qurimantawan qullqimanta kaqkunata ruwachinanpaq hinaspa tukuy ima ruwaqkuna imatapas ruwanankupaq. Kunanqa, ¿pitaq munanman Jehova Diospaq kikinmanta imatapas quyta?”, nispa.+
6 Hinaptinmi qunankupaq nirqaku ayllunkupi kamachiqkuna, 12 Israel ayllukunapi kamachiqkuna, 1.000 runakunata kamachiqkuna, 100 runakunata kamachiqkuna+ hinaspa kamachiqpa tukuy imanmanta nanachikuqkuna.+
7 Paykunam Diospa wasinta ruwachinanpaq qurqaku 171.000 kilo* qurita, qurimanta 10.000 qullqita*, 342.000 kilo* qullqita, 615.600 kilo* bronceta hinaspa 3.420.000 kilo* fierrota.
8 Llipipipiq rumiyuqkunapas qurqakum Jehova Diospa quri-qullqinta waqaychananku cuartopaq, chay cuartomanta nanachikuqmi karqa Guersonpa+ miraynin Jeyel.+
9 Jehova Diosman tukuy sunqunkuwan kikinkumanta qusqanku ofrendawanmi llapallan runakuna kusisqa karqaku,+ ancha kusisqataqmi karqa kamachiq Davidpas.
10 Llapallan huñunasqa runakunapa qayllanpim Davidqa Jehova Diosta hatuncharqa: “Ñawpaq taytayku Israelpa yupaychasqan Jehova Diosllayku, wiña-wiñaypaq hatunchasqayá kay.
11 Hanaq pachapiwan kay pachapi tukuy ima kaqkunapas qampam+ Jehova Dioslláy. Qamqa kanki mayna hatunmi,+ mayna atiyniyuqmi,+ mayna suma-sumaqmi, mayna kanchariqmi hinaspa mayna hatunchanapaqmi.+ Qamllam kamachiqqa kanki Jehova Dioslláy.+ Qamllam tukuy imapa hawanpi kaqqa kanki.
12 Qamllamantam hamun apuyaypas, ancha riqsisqa kaypas.+ Qamllamá lliwta kamachinki.+ Qamllamantam kallpapas+ chaynataq atiypas.+ Qamllam pitapas hatunchawaq+ hinaspa kallpanchawaq.+
13 Chaymi Diosllayku qamta agradecekuspayku suma-sumaq sutikita hatunchaniku.
14 ¿Pimá ñuqallayqa kani tukuy kaykunata qunaypaqqa? ¿Pimá runaykunapas tukuy kaykunata kikinkumanta qusunaykipaqqa? Tukuy ima qusqaykupas qamllapam.
15 Qamqa yachankim ñawpaq abueloyku hina huklaw llaqtayuq kasqaykuta+ hinaspa yachapakuqlla* kasqaykuta. Vidaykupas chinkaruq llantuy hinallam.+
16 Jehova Diosllayku, chuya sutiki hatunchasqa kananpaq wasita ruwanaykupaq tukuy ima huñusqaykupas qanmantam hamun, qamllapam tukuy imapas.
17 Diosnillayku, yachanim runakunapa sunqun qawasqaykita,+ allin ruwayta kuyasqaykita.+ Sunqumantam tukuy kaykunata qanman quyki. Ancha kusisqam kachkani runaykikuna kikinkumanta tukuy imakuna qususqaykita qawaspay.
18 Ñawpaq abueloyku Abrahanpa, Isaacpa hinaspa Israelpa yupaychasqan Jehova Diosnillayku, kay runaykikunatayá yanapay hinalla qukuykuq kanankupaq hinaspa tukuy sunqunkuwan kasukusunaykipaq.+
19 Churiy Salomontayá yanapaykuy kamachikuynikikunatawan yachachikuynikikunata tukuy sunqunwan kasukunanpaq.+ Yanapaykuytaqyá huñusqay kaqkunawan wasikita ruwananpaqpas”, nispa.+
20 Chaymantam Davidqa runakunata nirqa: “Kunanqa Jehova Diostayá hatunchaychik”, nispa. Hinaptinmi llapallan runakuna ñawpaq abuelonkupa yupaychasqan Jehova Diosta hatuncharqaku. Llapallankumá Jehova Diospa qayllanpiwan kamachiq Davidpa qayllanpi qunqurakurqaku.
21 Hinallamá Jehova Diospaq animalkunata nakapurqaku. Paqarintinkamam Jehova Diospaq kañapurqaku+ 1.000 malta torokunata, 1.000 carnerokunata hinaspa 1.000 malta carnerokunata. Chaykunataqa kañarqaku vinota tallispankum.+ Israel runakunapa rantinpim achka-achkata qurqaku.+
22 Chay punchawmi Jehova Diospa qayllanpi kusikuyllawanña saksanankukama mikurqaku.+ Kaqmantam Davidpa churin Salomonta kamachiq kananpaq churarqaku, hinaspankum Jehova Diospa munasqanman hina aceitewan tallirqaku.+ Sadoctañataqmi churarqaku sacerdote kananpaq.+
23 Salomonqa Jehova Diospa munaychakusqan Israel nacionpim kamachiyta qallaykurqa+ taytan Davidpa rantinpi. Manam ima sasachakuyninpas karqachu. Israel runakunam llapallanku kasukurqaku.
24 Kamachiq Salomontam kasukurqaku llapallan kamachiqkuna,+ kallpasapa soldadokuna+ hinaspa Davidpa llapallan churinkuna.+
25 Salomontaqa Jehova Diosmi Israel runakunapa qayllanpi hatuncharqa, hinaspapas kamachisqanpi ancha riqsisqa kananpaqmi yanaparqa. Manam chayna kamachiqqa haykapipas karqachu Israel nacionpiqa.+
26 Jeseypa churin Davidqa Israel naciontam kamachirqa.
27 Payqa 40 watam Israel nacionta kamachirqa. Hebron llaqtamantam kamachirqa qanchis wata,+ Jerusalen llaqtamantañataqmi kamachirqa 33 wata.+
28 Davidqa unay wata kawsakusqanmantam yuyaq kayninpiña wañukurqa.+ Payqa kapuqniyuq ancha riqsisqam karqa. Pay wañukuptinmi churin Salomonña kamachiyta qallaykurqa.+
29 Kamachiq Davidpa imayna kawsakusqanmantaqa lliwmi qillqasqa kachkan qawaq Samuelpa qillqasqanpi, Diosmanta willakuq* Natanpa+ qillqasqanpi, musquypi hina* qawaq Gadpa+ qillqasqanpi.
30 Chaypiqa astawanraqmi willakuchkan kamachisqanpi imakuna pasasqanmanta hinaspa munayniyuq kasqanmanta. Willakuchkantaqmi paywan, Israel runakunawan hinaspa hichpan nacionkunapi kamachiqkunawan imakuna pasasqanmantapas.
Willakuykuna
^ Utaq: “Temploqa”.
^ Utaq: “Onice”.
^ Utaq: “3.000 talento”. Qaway B14 kaq yachachikuyta.
^ Utaq: “7.000 talento”.
^ Kayqa karqa Persia runakunapa qullqinmi. Qaway B14 kaq yachachikuyta.
^ Utaq: “100.000 talento”.
^ Utaq: “18.000 talento”.
^ Utaq: “10.000 talento”.
^ Utaq: “5.000 talento”.
^ Utaq: “Tiyapakuqlla”.
^ Utaq: “Profeta”.
^ Utaq: “Revelacionpi”.
