1 Reyes 10:1-29
10 Salomonmi Jehova Diospa sutinrayku ancha riqsisqa rikurirurqa.+ Chayta uyariruspanmi Saba nacionta kamachiq warmi sasa tapukuykunawan Salomonman hamurqa.+
2 Jerusalenmanmi achka runankunapiwan+ chayaramurqa, camellokunawanmi apamurqa miski asnaq aceiteta,+ achka qurita hinaspa alaqa rumikunata. Salomonpa kasqanman yaykuykuspanmi imapas yachay munasqanta tapukurqa.
3 Salomonñataqmi lliw tapukusqanmanta willarqa. Salomonpaqqa manam ima tapukusqanpas llumpay sasaqa karqachu. Tukuy imamantamá yachachirqa.
4 Sabata kamachiq warmim yachaykurqa Salomonqa ancha yachayniyuq kasqanta.+ Qawarqam ruwachisqan wasita,+
5 tukuy rikchaq mikuykunata,+ serviqninkunapa imayna tiyasqankuta, imayna qaramusqankuta, imayna pachakusqankuta hinaspa vino haywaqkunata. Qawarqataqmi Jehova Diospa wasinpi animalkunata sapa kuti kañapusqantapas, chaykunata qawasqanwanmi mana ima niytapas atirqachu.
6 Chaymi kamachiq Salomonta nirqa: “Tukuy ima ruwasqaykimantawan yachaynikimanta llaqtaypi uyarisqayqa chiqapmi kasqa.
7 Ichaqa hamuspa ñawiywan rikuykunaykamam willawasqankumanta iskayrayarqani. Imallaraqsi willawasqankuqa, yachaynikiqa chaynataq tukuy imaykikunaqa uyarisqaymantapas aswanraqmi kasqa.
8 ¡Mayna kusisqam yachaynikita sapa punchaw uyariq runaykikunaqa!+
9 Jehova Diosnikiyá hatunchasqa kachun.+ Payqa kuyasuspaykim Israel runakunata kamachinaykipaq churasurqanki. Israel runakunata wiñaypaq kuyasqanraykum allinta ruwaspa kamachinaykipaq Jehova Diosqa churasurqanki”, nispa.
10 Chaymantam Saba nacionta kamachiq warmiqa Salomonman qurqa 4.104 kilo* qurita, achkallay-achka miski asnaq aceiteta+ hinaspa alaqa rumikunata.+ Pay hinaqa manam pipas chayna achka-achka aceitetaqa Salomonmanqa apamurqachu.
11 Hirampa botenkunam Ofir lawmanta+ apamuq qurita, sandalo sachamanta achkallay-achka qirukunata*+ hinaspa alaqa rumikunata.+
12 Chay qirukunawanmi Salomonqa ruwachirqa Jehova Diospa wasinpiwan kikinpa wasinpi barandakunata. Takiqkunapaqñataqmi ruwachirqa arpakunata hinaspa cuerdayuq huk tocanakunata.+ Chay sandalo sachamanta qirukunataqa manam haykapipas chayna achka-achkataqa rikurqakuchu nitaq apamurqakuchu.
13 Kamachiq Salomonpas Saba nacionta kamachiq warmimanmi tukuy ima munasqanta hinaspa mañakusqanta qurqa, Salomonqa qurqataqmi mana mañakusqankunatapas. Chaymantam kamachiq warmiqa runankunapiwan kutikurqa.+
14 Salomonqa sapa watam chaskiq 22.777 kilo* qurita.+
15 Manam yupasqachu karqa negociantekunamanta, Arabia law kamachiqkunamanta chaynataq Israel nacionta kamachiqkunamanta chaskisqanqa.
16 Kamachiq Salomonmi quriwan taqruspa ruwachirqa 200 hatun harkachikunata,+ sapa harkachikunamanmi yaykurqa yaqa qanchis kilo* quri.+
17 Ruwachirqataqmi quriwan taqrusqa 300 taksa harkachikunatapas*, sapa harkachikunamanmi yaykurqa yaqa iskay kilo* quri. Chaykunatam Libano monte sutiyuq wasipi churachirqa.+
18 Chaymantapas, Salomonqa marfilmantam* hatun tiyananta ruwachirqa,+ hinaspam quriwan llusichirqa.+
19 Chay tiyananpa qipanpiñataqmi ruyru tela warkurayarqa. Tiyananpa sapa law waqtanpiñataqmi karqa maki churanan. Chaypa sapa law waqtanpiñataqmi karqa ruwasqa leon.+ Chay tiyananmanmi siqarqa suqta gradaskuna.
20 Chay gradaspa waqtanpim karqa 12 leonkuna, gradaspa sapa law waqtanpim karqa huk leon. Chayna tiyananqa manam mayqan kamachiqpapas karqachu.
21 Kamachiq Salomonpa vasonkunaqa llapallanmi qurimanta karqa, Libano monte sutiyuq wasipi+ serviciokunapas llapallanmi qurimanta karqa. Manam imapas qullqimanta ruwasqaqa karqachu. Salomonpa tiemponpiqa manam qullqitaqa qawariqkupaschu.+
22 Salomonpam karqa Hirampa botenkunawan kuska Tarsis lawman+ riq botenkuna. Chay botekunam sapa kimsa wata apamuq qurita, qullqita, marfilta,+ monokunata hinaspa pavo realkunata.
23 Kamachiq Salomonqa mayqin kamachiqmantapas aswan apu+ hinaspa yachayniyuqmi karqa.+
24 Llapallan runakunam Salomonta rikuykuyta munaspa maymantapas hamuqku, chaynapi Diospa yachay qusqanta uyarinankupaq.+
25 Llapallankum sapa wata apamuqku qullqimantawan qurimanta ruwasqa kaqkunata. Apamuqkutaqmi pachakunata, peleanapaq kaqkunata, miski asnaq aceiteta, caballokunata hinaspa mulakunata.
26 Salomonqa hinallam huñurqa carretakunatawan caballokunata*. Kapurqam 1.400 carretankunawan 12.000 caballonkuna*.+ Chaykunam carretakuna waqaychana llaqtakunapiwan Jerusalenpi karqa Salomonpa hichpallanpi.+
27 Kamachiq Salomonqa Jerusalen llaqtamanmi rumita hinaña qullqita huñurachirqa. Cedro sachakunapas Sefela muqukunapi purun higos sachakuna hinañam kakurqa.+
28 Salomonpaqa karqataqmi Egipto nacionmanta pusachimusqan caballonkunapas, runankunam rantimuqku achkanpi* hayka mañasqankuman hina.+
29 Egiptomantam sapa carretata rantimuqku 600 qullqiwan*, sapa caballotañataqmi rantimuqku 150 qullqiwan. Paykunañataqmi Het runakunapa+ hinaspa Siria runakunapa kamachiqninkunaman rantikuqku*.
Willakuykuna
^ Utaq: “120 talento”. Qaway B14 kaq yachachikuyta.
^ Utaq: “Kaspikunata”.
^ Utaq: “666 talento”.
^ Utaq: “600 siclo”. Qaway B14 kaq yachachikuyta.
^ Utaq: “Kimsa mina”. Qaway B14 kaq yachachikuyta.
^ Kaytaqa flechaqkunam apaqku.
^ Kayqa karqa suma-sumaq alaqam.
^ Utaq: “Sillakuqkunata”.
^ Utaq: “Sillakuqkuna”.
^ Ichapas kanman: “Egipto nacionmanta hinaspa Coamanta pusachimusqan, runankunam rantimuqku Coamanta”, niqpas. Coa nispaqa ichapas rimachkan Ciliciamanta.
^ Utaq: “Rumichakuna hina qullqiwan”.
^ Utaq: “Vendeqku”.
