1 Reyes 4:1-34
4 Salomonmi llapallan Israel runakunapa kamachiqnin karqa.+
2 Churasqan autoridadkunam karqa: Sacerdote Azarias, payqa karqa Sadocpa+ churinmi.
3 Kamachiqpa secretarionñataqmi karqa Elioref hinaspa Aiya, paykunaqa karqaku Sisapa churinkunam.+ Imapas pasasqanmanta qillqaqñataqmi karqa Jeosafat,+ payqa karqa Ailudpa churinmi.
4 Soldadokunapa kamachiqninñataqmi karqa Benaya,+ payqa karqa Jeoyadapa churinmi. Sadocwan Abiatarñataqmi+ karqaku sacerdotekuna.
5 Wakin autoridadkunapa kamachiqninmi karqa Azarias, payqa karqa Natanpa+ churinmi. Sacerdoteñataqmi karqa Zabud, payqa karqa Natanpa churinmi. Zabudqa karqa kamachiq Salomonpa kuyasqan runam.+
6 Kamachiq Salomonpa wasinpi nanachikuqmi karqa Aisar. Salomonpaq llamkaq runakunapa+ kamachiqninñataqmi karqa Adoniram,+ payqa karqa Abdapa churinmi.
7 Salomonmi Israel nacionpi churarurqa 12 autoridadkunata. Paykunam kamachiq Salomonman hinaspa wasinpi kaqkunaman mikuyta quqku. Watapim sapakama huk killanka quqku.+
8 Paykunam kay llaqtakunapi autoridad karqaku: Hurpa churinmi autoridad karqa Efrain ayllupa urqunkunapi.
9 Dekerpa churinñataqmi autoridad karqa Makaz llaqtapi, Saalbim+ llaqtapi, Bet-semes llaqtapi hinaspa Elon-bet-hanan llaqtapi.
10 Hesedpa churinñataqmi autoridad karqa Arubot llaqtapi. Paytaqmi autoridad karqa Soco llaqtapipas chaynataq lliw Hefer allpapipas.
11 Abinadabpa churinñataqmi autoridad karqa Dor llaqtapa waqtankunapi. Paypa warminmi karqa Salomonpa churin Tafat.
12 Ailudpa churin Banañataqmi autoridad karqa Taanac llaqtapi, Meguido llaqtapi+ hinaspa enteron Bet-sean+ llaqtapi. Chayqa kachkan Jezreel llaqtapa urayninmanmi hinaspa Zaretan llaqtapa waqtanmanmi. Bet-sean llaqtamanta qallaykuspa Abel-meola llaqtakama chaynataq Jocmeam lawkama.+
13 Gueberpa churinñataqmi autoridad karqa Ramot-galaad llaqtapi.+ Paytaqmi autoridad karqa Galaad lawpi+ Jairpa carpayuq llaqtachankunapipas,+ Jairqa karqa Manasespa churinmi. Hina paytaqmi autoridad karqa Basan allpapi+ kaq Argob lawpipas.+ Chaypiqa karqa 60 hatun llaqtakunam, chay llaqtakunam karqa murallayuqkama hinaspa punkunkunapas broncemanta trankayuqkama.
14 Idopa churin Ainadabñataqmi autoridad karqa Maanaim llaqtapi.+
15 Aimaazñataqmi autoridad karqa Neftaliy ayllupa allpanpi. Paypa warminmi karqa Salomonpa huknin churin Basemat.
16 Husaipa churin Banañataqmi autoridad karqa Aser ayllupa allpanpi hinaspa Bealot llaqtapi.
17 Paruapa churin Jeosafatñataqmi autoridad karqa Isacar ayllupa allpanpi.
18 Elaapa churin Simeiñataqmi+ autoridad karqa Benjamin ayllupa allpanpi.+
19 Uriypa churin Gueberñataqmi autoridad karqa Galaad allpapi.+ Chayqa karqa Amorreo runakunata kamachiq Seonpa+ allpanmi chaynataq Basan lawta kamachiq Ogpa+ allpanmi. Chay 12 autoridadkunapa kamachiqninpas karqam.
20 Juda aylluwan Israelpi wakin ayllukunaqa lamar quchapa patanpi aqu hinaña+ mana yupay atinam karqaku. Paykunapaqa mikunankupas manam pisirqachu. Paykunaqa kusisqallañam kawsakurqaku.+
21 Salomonmi munaychakurqa Eufrates mayumanta+ qallaykuspa Filistea runakunapa allpankama hinaspa Egipto nacionwan tupanakuqkama. Tukuy chay llaqtakunamantam Salomonpa mañakusqanta apamuqku, hinaspapas paypa runankunam karqaku wañukunankama.+
22 Kamachiq Salomonpaqmi sapa punchaw apamuqku 66 saco* harinata hinaspa 132 saco* kutata.
23 Apamurqakutaqmi wasillapi uywasqa chunka torokunatapas, michispa uywasqa 20 torokunatapas chaynataq 100 ovejakunatapas. Apamurqakutaqmi luwichukunatapas, tarukakunatapas, chaykunaman rikchakuq kaqkunatapas chaynataq puqusqa kukulikunatapas.
24 Salomonmi munaychakurqa Eufrates mayupa kaylawninpi+ kaq Tifsa llaqtamanta Gaza llaqtakama.+ Munaychakurqataqmi chaypi kamachiqkunatapas. Llapallan munaychakusqan runakunam hawka kawsakurqaku.+
25 Salomon kamachiptinqa Juda aylluwan wakin Israel ayllukunaqa mana pipa imanasqanmi hawka kawsakurqaku. Dan llaqtamanta Beer-seba llaqtakamam sapakama uvas huertankupi hinaspa higos huertankupi hawka kawsakurqaku.
26 Salomonpa caballonkuna sayananpaqmi karqa 4.000* cuartochakuna, chay caballokunaqa carretakunata chutaqmi karqa. Karqataqmi 12.000 sillakuq runankunapas.+
27 Kamachiq Salomonpa churasqan autoridadkunam paypaq chaynataq wasinpi kaqkunapaq mikuyta apamuqku sapakama tupasqan killapi. Manam imamantapas pisichiqkuchu.+
28 Sapakamataqmi tupasqanman hina apamuqku cebadata hinaspa pastota, chaynapi carretata aysaq caballokuna chaynataq wakin caballokuna mikunanpaq.
29 Diosmi Salomonman quykurqa yachaytawan yuyayta. Salomonpa yachayninqa karqa lamar quchapa patanpi aqu hinam.+
30 Salomonpa yachayninqa karqa intipa qispimunan lawpi yachaqkunapamanta hinaspa Egipto runakunapa yachayninmanta aswan masraqmi.+
31 Pi runamantapas aswan yachayniyuqmi Salomonqa karqa. Zerapa miraynin Etanmantapas+ chaynataq Maolpa kimsan churinkunamantapas aswan yachayniyuqmi karqa. Chay kimsan churinkunam karqa Heman,+ Calcol+ hinaspa Darda. Salomonqa muyuriqninpi llaqtakunapa ancha riqsisqanmi karqa.+
32 Paymi qillqarqa 3.000 yachachikuykunata+ hinaspa 1.005 takikunata.+
33 Chaymantapas, Salomonqa yacharqam sachakunamanta. Libano lawpi wiñaq cedro sachamanta qallaykuspa pirqapi wiñaq qurakama*.+ Yacharqataqmi alton pawaqkunamantapas,+ qasqunpa puriqkunamantapas,+ challwakunamantapas chaynataq tukuy rikchaq animalkunamantapas.+
34 Tukuy hinastinpi runakunam chaynataq kamachiqkunam Salomonpa yachayniyuq kasqanta yacharuspanku hamuqku, chaynapi yachayninta uyarinankupaq.+
Willakuykuna
^ Utaq: “30 coro”. Qaway B14 kaq yachachikuyta.
^ Utaq: “60 coro”.
^ Ñawpaq qillqakunapi hinaspa kayman rikchakuq willakuykunapim nin “4.000” nispa. Wakin ñawpaq qillqakunapiñataqmi nin “40.000” nispa.
^ Hebreo rimaypiqa nichkan: “Hisopokama”, nispam. Qaway kay palabrapa ima ninan kasqanta.
