1 Reyes 5:1-18
5 Salomonmi taytan Davidpa rantinpi kamachiq kananpaq akllasqa karqa. Chaytam Tiro llaqtata kamachiq+ Hiram yacharurqa, hinaspanmi runankunata Salomonman kachamurqa. Hiramqa Davidpa amistadninmi karqa.+
2 Hinaptinmi Salomonqa Hiranman+ willachimurqa:
3 “Yachasqaykipi hinapas, taytay Davidqa muyuriqninpi yachaqkunawanmi* peleayllapiña karqa. Chaymi Jehova Diosniykupa sutin hatunchasqa kananpaq wasitaqa mana ruwarqachu. Taytayqa peleayllapiñam karqa chiqniqninkunata Jehova Dios chinkachinankama.+
4 Kunanmi ichaqa yupaychasqay Jehova Diosqa tukuy hinastinpi hawka kawsakuyta quykuwan.+ Manam chiqniqniykunapas kanñachu, nitaqmi mana allinpas kanñachu.+
5 Chaymi Jehova Diospa sutin hatunchasqa kananpaq wasi ruwayta tantiachkani. Taytay Davidmanmi Jehova Dios nirqa: ‘Qampa rantikipi kamachinanpaq churasqay churikim sutiy hatunchasqa kananpaq wasita ruwapuwanqa’, nispa.+
6 Chaynaqa, runaykikunatayá kamachiy Libano lawpi cedro sachakunata+ ñuqapaq kuchumunankupaq. Runaykunam qampa runaykikunawan llamkanqa, ñuqam runaykikunapa llamkasqanmantaqa mañakusqaykita qusqayki. Yachasqaykipi hinapas, ñuqayku ukupiqa manam kanchu Sidon runakuna hina sachakunata kuchuy yachaqkunaqa”, nispa.+
7 Salomonpa chayna nisqanta Hiranman willaykuptinkum anchata kusikuspan nirqa: “¡Jehova Diosyá kunan hatunchasqa kachun! Paymi Davidman yachayniyuq churita quykun achkallay-achka runakunata kamachinanpaq”, nispa.+
8 Hinaspanmi Hiramqa Salomonman willachimurqa: “Lliw nimuwasqaykitam uyariykuni. Niwasqaykiman hinam cedromanta hinaspa cipres sachamanta qirukunata* apachimusqayki.+
9 Runaykunam Libano lawmanta qirukunata lamar quchapa patanman apamunqaku, chaypim qirukunawan balsakunata watachispay lamar quchanta apachimusaq nisqayki sitiokama. Chaypi paskaruptinkum qamña apakunki. Hinaptinmi qamñataq wasiypi kaqkunapaq mikuyta quwanki”, nispa.+
10 Chaynapim Hiramqa Salomonman apachimurqa cedromanta hinaspa cipresmanta qirukunata.
11 Sapa watam+ Salomonqa Hiranman qurqa wasinpi kaqkuna mikunanpaq 6.400 taqi* trigota hinaspa 20 maqma* allinnin aceiteta*.
12 Jehova Diosmi nisqanman hina Salomonmanqa yachayta qurqa.+ Hiranwan Salomonqa contratota ruwasqankuraykum hawka kawsakurqaku.
13 Kamachiq Salomonmi llamkachinanpaq huñurachirqa Israel runakunamanta 30.000 qarikunata.+
14 Sapa killam Libano lawpi llamkamunankupaq kamachiq 10.000 runakunata. Chaypi huk killa kaspankum iskay killañataq wasinkupi kaqku. Chay llamkaqkunapa kamachiqninmi karqa Adoniram.+
15 Salomonpam karqa 70.000 llamkapuqninkuna* hinaspa urqukunapi+ rumi pakiq 80.000 runankuna.+
16 Karqataqmi llamkaqkunata qawaq 3.300 runankunapas.+
17 Salomonmi kamachirqa achka qullqipa chanin hatun rumikunata+ hurqumunankupaq. Chaynapi wasipa cimientonman+ llaqllaspa+ churanankupaq.
18 Chaynapim Salomonpa runankunaqa Hirampa runankunapiwan chaynataq Guebal runakunapiwan+ rumikunata pakirqaku. Alistarqakutaqmi qirukunatawan rumikunatapas wasita hatarichinankupaq.
Willakuykuna
^ Utaq: “Tiyaqkunawanmi”.
^ Utaq: “Kaspikunata”.
^ Chay aceiteqa karqa chamchasqa aceitunasmanta ruwasqam.
^ Utaq: “20 coro”.
^ Utaq: “20.000 coro”. Qaway B14 kaq yachachikuyta.
^ Utaq: “Qipiqkuna”.
