1 Samuel 22:1-23
22 Chaymanta pasakuspanmi Davidqa+ Adulam llaqtapi kaq machaypi pakakururqa.+ Chaypi kasqantam wawqinkuna chaynataq lliw ayllunkuna yacharurqaku, hinaspam rirqaku.
2 Davidmanmi hukllawakuykurqaku sasachakuypi kaqkuna, manupi tarikuqkuna hinaspa hukmanyasqa tarikuq runakuna. Chay runakunapa kamachiqninmi David karqa. Davidwanqa karqaku yaqa 400 runakunam.
3 Chaymantam Davidqa pasakurqa Moab allpapi Mizpe llaqtaman, hinaspam Moab runakunapa kamachiqninta nirqa:+ “Tayta-mamaytayá saqipakullasqaykichik ñuqapaq Dios ima ruwananta yachanaykama”, nispa.
4 Chaynapimá Davidqa Moab runakunapa kamachiqninman tayta-mamanta saqiykurqa. Chaypim karqaku pakakusqanmanta David kutimunankama.+
5 Chaymanta qipatam Davidtaqa Diosmanta willakuq* Gad+ nirqa: “Amaña kaypiqa kayñachu. Juda ayllupa allpanmanña pasakuy”, nispa.+ Chaymi Davidqa pasakuspan Heret monteman yaykururqa.
6 Saulmi lanzanta hapispan Guibea llaqtapi kaq muqupi sachapa* sikinpi tiyachkarqa,+ waqtanpitaqmi kachkarqa runankunapas. Chaypi tiyachkaptinmi Saulman willaykurqaku Davidta hinaspa runankunata rikusqankumanta.
7 Hinaptinmi Saulqa waqtanpi kaq runankunata nirqa: “Benjamin ayllumanta runakuna, ama hina kaspayá uyariykuwaychik. ¿Yaqachu Jeseypa churin+ Davidqa allpata hinaspa uvas huertakunata qusunkichikman? ¿Yaqachu payqa 100 hinaspa 1.000 soldadokunapa kamachiqnin kanaykichikpaq churasunkichikman?+
8 ¡Qamkunaqa qipancharuwankichikmi! ¡Manam mayqannikichikpas willawarqankichikchu Davidwan* churiy Jonatan yanapanakunankupaq contrato* ruwasqankumantaqa!+ Yanapawaqniy David qipanchawananpaq churiy Jonatan umachaptinpas manam willawarqankichikchu. Manamá llakipayawarqankichikchu”, nispa.
9 Chaypim kachkarqa Saulpa runankunata yanapaq Edom kasta Doeg.+ Paymi Saulta nirqa:+ “Davidtaqa* Nob llaqtapim rikumurqani Aitubpa churin Aimelecwan kachkaqta.+
10 Davidpaqmi Aimelecqa Jehova Diosta tapurqa, hinaspam mikuyta quykurqa. Quykurqataqmi Goliatpa* espadantapas”, nispa.+
11 Chayllam kamachiq Saulqa qayachirqa Aitubpa churin sacerdote Aimelecta hinaspa Nob llaqtapi taytanpa ayllun sacerdotekunata. Chaymi llapallanku Saulpa kasqanman rirqaku.
12 Chaypim Aimelecta Saul nirqa: “¡Aitubpa churin, uyariykuway!”, nispa. Payñataqmi nirqa: “Niway taytáy”, nispa.
13 Chaymi Saul nirqa: “¿Imanasqataq qanwan Davidqa* qipancharuwankichik? ¿Imanasqataq tantata hinaspa espadata qurqanki chaynataq Diostapas paypaq tapupurqanki? Davidqa chiqniwaspanmi qipanchawachkan”, nispa.
14 Aimelecñataqmi nirqa: “¿Manachu Davidqa wakin runaykikunamantapas allin runa?+ Payqa masaykim,+ waqaychasuqniki soldadoykikunapa kamachiqnintaqmi. Wasikipiqa paymantaqa manam iskayrayankuchu.+
15 Manataqmi chay kutillapichu Diostaqa tapurqani Davidpaqqa.+ ¡Manam ñuqaqa haykapipas qipanchaykimanchu! Taytáy, amayá ñuqatawan aylluykunataqa yanqamantaqa tumpawaykuchu. Manam ñuqaqa chaytaqa yacharqanichu”, nispa.+
16 Chaywanpas Saulqa nirqam: “¡Wañunkipunim+ Aimelec! Wañunqataqmi taytaykipa ayllunkunapas”, nispa.+
17 Hinaspam waqtanpi kaq soldadonkunata* nirqa: “¡Jehova Diospa sacerdotenkunata wañuchiychik! ¡Paykunaqa Davidmanñam hukllawakurunku! ¡Ñuqamanta David ayqikusqanta yachachkaspankupas manam willawarqachu!”, nispa. Soldadokunam ichaqa Jehova Diospa sacerdotenkunataqa wañuchiyta mana munarqakuchu.
18 Chaymi Saulqa Edom kasta+ Doegta nirqa:+ “¡Qamñayá wañuchiy!”, nispa. Hinaptinmi Doegqa chaypunilla wañuchiyta qallaykurqa. Chay punchawmi Doegqa 85 linomanta mandilniyuq* runakunata wañurachirqa.+
19 Espadawantaqmi wañurachirqa sacerdotekunapa yachasqan* Nob llaqtapi+ qarikunatapas, warmikunatapas, warmakunatapas chaynataq wawakunatapas. Wañurachirqataqmi torokunatapas, asnokunatapas hinaspa ovejakunatapas.
20 Abiatarllañam lluptikuspan Davidman hukllawakururqa. Abiatarqa+ karqa Aimelecpa churinmi hinaspa Aitubpa willkanmi.
21 Abiatarmi Davidman willaykurqa: “Saulmi Jehova Diospa sacerdotenkunata wañurachin”, nispa.
22 Chaynata niykuptinmi Davidqa Abiatarta nirqa: “Ñuqaqa yacharqaniñam+ Edom kasta Doegqa Saulman willaykunanta. Ñuqam huchayuq kani taytaykipa lliw ayllunkunata wañuchisqanmanta.
23 Ñuqaykuwanña qipakuy. Ama manchakuychu. Pipas wañuchiyta munasuqnikiqa ñuqatapas wañuchiwachkanman hinam kanqa. Ñuqawan kaptikiqa manam pipas imanasunkichu”, nispa.+
Willakuykuna
^ Utaq: “Profeta”.
^ Hebreo rimaypiqa nichkan: “Tamariscopa”, nispam.
^ Hebreo rimaypiqa nichkan: “Jeseypa churinwan”, nispam.
^ Utaq: “Pacto”. Qaway kay palabrapa ima ninan kasqanta.
^ Hebreo rimaypiqa nichkan: “Jeseypa churintaqa”, nispam.
^ Hebreo rimaypiqa nichkan: “Filistea lawmanta Goliatpa”, nispam.
^ Hebreo rimaypiqa nichkan: “Jeseypa churinqa”, nispam.
^ Hebreo rimaypiqa nichkan: “Kallpaqkunata”, nispam.
^ Utaq: “Efodniyuq”.
^ Utaq: “Tiyasqan”.
