1 Samuel 30:1-31
30 Kimsa punchawmanta Davidwan runankuna Ziclag llaqtaman+ chayaruptinkum Amalec runakunaqa+ Negueb qichwapi llaqtakunaman yaykurusqaku. Ziclag llaqtamanpas yaykuruspankum kañaykusqaku.
2 Manam pitapas wañuchisqakuchu, aswanqa llapallan runakunatam hatuntapas uchuytapas pusakusqaku.+
3 Davidwan runankuna chayaruspankum llaqtataqa tariykurqaku kañasqataña, warminkutawan warmankutapas presocharuspam pusakusqaku.
4 Chaymi Davidwan runankunaqa manaña kallpayuq kanankukama qaparispa waqakurqaku.
5 Davidpa iskaynin warminkunatapas pusakusqakum. Paykunam karqaku Jezreel llaqtayuq Ainoam hinaspa Carmelo llaqtayuq Nabalpa viudan Abigail.+
6 Davidpa runankunaqa hukmanyasqallañam kachkarqaku churinkuta warmitapas qaritapas apakuptinku, chaymi Davidta rumiwan chuqaparunankupaq rimachkarqaku. Davidqa llumpay hukmanyasqa tarikuspanpas Jehova Diostam mañakurqa kallpanchaykunanpaq.+
7 Chaymantam Davidqa Aimelecpa churin sacerdote Abiatarta+ nirqa: “Ama hina kaspayá mandilta* apamuy”, nispa.+ Chaymi Abiatarqa apamurqa.
8 Hinaptinmi Davidqa Jehova Diosta nirqa:+ “¿Qatisaqchu chay suwa runakunata? ¿Hayparusaqchu?”, nispa. Diosñataqmi nirqa: “Qatiypuni, hayparuspam lliwta kutichikamunki”, nispa.+
9 Chaypunillam Davidqa 600 runankunapiwan+ pasarqa, hinaspam Besor mayuman* chayarurqaku. Chaypim wakin runankuna qipakurqaku.
10 Qipakurqakuqa 200 runakunam, paykunaqa llumpay pisipasqa kasqankuraykum Besor mayuta mana chimpayta atirqakuchu. Chaymi Davidqa 400 runankunallawanña rirqa.+
11 Davidpa runankunam Egipto runata tarirurqaku, hinaspam Davidman pusaruspanku mikuyta hinaspa yakuta qurqaku.
12 Qurqakutaqmi uvas pasasmanta iskay tantatapas chaynataq llapisqa higosmanta parten tantatapas. Chaykunata mikuruptinmi kallpan kutiramurqa, chay runaqa kimsa punchaw kimsa tutanmi mana mikurqachu nitaq yakutapas tomarqachu.
13 Chay Egipto runatam David nirqa: “¿Maymantataq kanki? ¿Pipa runantaq kanki?”, nispa. Chay runañataqmi nirqa: “Ñuqaqa kani Egipto nacionmantam hinaspa Amalec runapa sirvientenmi. Unqurusqayraykum yaqa kimsa punchawña patronniy saqiruwan.
14 Ñuqaykum yaykururqaniku Keret runakunapa+ allpanman*, Juda ayllupa allpanman hinaspa Calebpa+ chaskisqan allpaman*. Ziclag llaqtatapas kañaykamurqanikum”, nispa.
15 Chaymi David nirqa: “¿Yaqachu pusaruwankiman chay suwa runakunaman?”, nispa. Chay runañataqmi nirqa: “Mana wañuchiwanaykipaq hinaspa patronniyman mana quykuwanaykipaq Diospa sutinpi niykuwaptikiqa pusarusqaykim”, nispa.
16 Pusaruptinmi chay suwa runakunaqa mikuspanku hinaspa tomaspanku pampapi kakuchkasqaku. Paykunaqa kusisqallañam kachkarqaku Filistea runakunapa hinaspa Juda ayllukunapa tukuy imankuta apakusqankurayku.
17 Hinaptinmi Davidqa paykunata wañurachirqa achikyaqmanta tutaykuqkama.+ 400 runakunallañam camelloman sillakuykuspa lluptikururqaku.
18 Amalec runakunapa tukuy ima apakusqankutam Davidqa kutichikamurqa.+ Kutichikamurqataqmi iskaynin warminkunatapas.
19 Kutichimurqakum qari warmankutapas, warmi warmankutapas chaynataq kapuqninkutapas.+ Davidqa tukuy ima apasqankutamá lliwta kutichikamurqa.
20 Chaymantapas, Davidqa Amalec runakunapa qichusqanku llapallan ovejakunatawan vacakunatam hapikuykurqa. Chay animalkunatam Davidpa runankunaqa animalninkupa ñawpaqninta qatimurqaku. Hinaspam “kayqa Davidpa qichumusqanmi” nistin kutimurqaku.
21 Davidqa 200 runankunapa kasqanmanmi kutimurqa, paykunaqa pisipasqa kasqankuraykum Besor mayupi+ qiparurqaku. Chay 200 runakunañataqmi Davidman hinaspa wakin runankunaman tariparqaku. Chaymi Davidqa asuykuspan tapurqa imayna tarikusqankumanta.
22 Ichaqa Davidwan kutimuq wakin runakunam kikillanpaq munaq hinaspa mana allin runakuna karqaku. Paykunam nirqaku: “Kaypi qipaq runakunaqa warminkutawan churinkuta pusarikuspayá pasakuchunku, paykunamanqa amam imatapas kutichipusunchu”, nispa.
23 Davidmi ichaqa nirqa: “Wawqillaykuna, amayá chaytaqa ruwaychikchu. Jehova Diosmi tukuy kaykunataqa quykuwanchik. Paymi waqaychawaspanchik chay suwa runakunata makinchikman churaykurqa.+
24 ¿Pitaq chayna nisqaykichikta ‘allinmi’ ninman? Llapanchikmi chaynallata chaskisun, peleaq riqpas hinaspa imanchikkunata cuidaspa qipaqkunapas.+ Llapanchikmi hina chaynankalla rakinakusun”, nispa.+
25 Chay punchawmantam Davidpa chayna nisqanqa huk kamachikuyña Israel runakunapaqqa karqa. Chaynam kunankamapas.
26 Davidqa Ziclag llaqtamanmi kutirurqa, hinaspam Juda ayllupi kuyasqan punta apaqkunaman qichumusqanmanta wakinta apachirqa. Willachimurqam: “Jehova Diosta chiqniq runakunamanta qichuramuspaymi qamkunaman wakinta apachimuchkaykichik”, nispa.
27 Chay punta apaqkunam karqaku Betel llaqtapi,+ Negueb qichwapi kaq Ramot llaqtapi, Jatir llaqtapi,+
28 Aroer llaqtapi, Sifmot llaqtapi, Estemoa llaqtapi,+
29 Racal llaqtapi, Jeramelpa mirayninkunapa llaqtankunapi,+ Ken runakunapa llaqtankunapi,+
30 Horma llaqtapi,+ Borasan llaqtapi, Atac llaqtapi,
31 hinaspa Hebron llaqtapi.+ Davidqa apachirqataqmi runankunawan maykunapi kasqanku llaqtakunamanpas.
Willakuykuna
^ Utaq: “Efodta”.
^ Utaq: “Wayquman”.
^ Utaq: “Negueb qichwaman”.
^ Utaq: “Negueb qichwaman”.
