2 Corintios 1:1-24
1 Diospa munayninpi Jesucristopa* apostolnin* ñuqa Pablom, iñiqmasinchik Timoteopiwan+ kay cartata qillqamuykichik. Qillqamuykichikqa Corinto llaqtapi huñunakuq Diospi iñiqkunamanmi hinaspa enteron Acaya+ lawpi Diospa llapallan runankunamanmi:
2 Qamkunayá taytanchik Diospa hinaspa señor Jesucristopa ancha kuyasqan* kaychik, paykunataqyá hawkalla kawsakunaykichikpaqpas yanapasunkichik.
3 Hatunchasqayá kachun señorninchik Jesucristopa+ taytan Diosqa, payqa ancha llakipayakuq+ taytam, hinaspapas tukuy imapi sunqunchik tiyaykachiq+ Diosmi,
4 payqa tukuy sasachakuyninchikpi sunqunchikta tiyaykachiqmi*,+ chaynapi ñuqanchikpas tukuy ima sasachakuypi kaqkunata+ Diospa kallpanchawasqanchikman hina sunqunkuta tiyaykachinanchikpaq.+
5 Imaynam Cristopa* qatiqnin kasqanchikrayku tukuy ima ñakariykunapi kanchik,+ chaynallataqmi Cristontakama tukuy imapipas sunqunchik tiyaykachisqa kachkan.
6 Chaynaqa, ñuqaykupa ñakarisqaykuqa kallpanchasqa hinaspa salvasqa kanaykichikpaqmi, llakipi kaspayku kallpanchasqa kasqaykupas qamkuna llakipi kaspa kallpanchasqa kanaykichikpaqmi, chaynapi ñuqayku hina qamkunapas ñakarispaykichik hinalla takyanaykichikpaq.
7 Ñuqaykuqa manam iskayrayanikuchu qamkuna allinta takyanaykichikmantaqa, imaynam ñuqayku hina ñakarichkankichik, chaynataqmi ima llakikichikpipas ñuqayku hina kallpanchasqa kankichik.+
8 Wawqi-panillaykuna, Asia provinciapi ñakarisqaykumanta yachanaykichiktam munaniku.+ Chaypim hatun sasachakuypi karqaniku manaña kallpaykupas kanankama, chaymi nirqaniku “kunanqa wañusaqkuchá” nispayku.+
9 Arí, ñuqaykuqa wañuchiwanankutam piensarqaniku. Chayqa karqa mana kikillaykupi hapipakunaykupaqmi, aswanqa wañuqkuna kawsarichiq Diosllapiña+ hapipakunaykupaqmi.
10 Paymi chayna wañuymanta libraykuwarqaku, qipa punchawtapas librawanqakum, ñuqaykuqa manam iskayrayanikuchu librawanankumantaqa.+
11 Qamkunapas yanapawankikumanmi ñuqaykupaq tukuy sunquykichikwan Diosta mañakuspaykichik,+ chaynapim yanapakuy chaskisqaykumanta achka runakuna Diosta agradecekunqaku, yanapakuy chaskisqaykuqa achka runakuna ñuqaykupaq Diosta mañakusqankuraykum.+
12 Sunquykupim* hawka tarikuniku chuya sunqu kasqaykurayku hinaspa Diospa yachachisqanman hina mana llullakuq kasqaykurayku, chaynam karqaniku runakunawan kaspayku, aswanraqmi qamkunawan kaspaykuqa. Chaymantapas manam runakunapa yachachisqanman hinachu kawsarqaniku, aswanqa Diospa ancha kuyakuyninman hinam*,+ chayna kasqaykumantam kusisqa tarikuniku.
13 Ñuqaykuqa qillqamuchkaykiku yachasqallaykichikmanta hinaspa leey atisqallaykichikmantam, ñuqaqa manam iskayrayanichu kaykunamanta lliwta yachanaykichikmantaqa.
14 Qamkunaqa ñam wakinta yacharunkichikña, yacharunkichikñam ñuqaykuqa qamkuna kusikunaykichikpaq kasqaykuta, chaynallataq qamkunapas señorninchik Jesuspa punchawninpi ñuqaykupa kusikunaykupaq kanaykichikta.
15 Chaymi qamkunamanta mana iskayrayaspay puntata qamkuna watukuq hamuyta munarqani, chaynapi kaqmanta kusikunaykichikpaq*.
16 Arí, Macedonia lawman riq hinam qamkuna watukamuyta munarqani, Macedoniaman chayaruspaypas qamkunamanmi kutimuyta munarqani, chaynapi Judeaman aviawanaykichikpaq.+
17 Yachasqaykichikpi hinapas qamkunaman hamuyta munaspayqa manam yanqallachu nirqaykichik. Icha, ¿kikiypa munasqayman hina tantiaspaychu “arí” nichkaspay “manam” nichkani?
18 Diospi hapipakuychik chiqap rimasqaykumanta, ñuqaykuqa manam “arí” nichkaspaykuqa “manam” niymankuchu.
19 Chaymantapas, Silvanopa*, Timoteopa+ hinaspa ñuqapa qamkunaman willasqayku Diospa churin Jesucristoqa manam “arí” nichkaspanqa ninmanchu “manam” nispanqa. Paypa “arí” nisqanqa chaynapunim.
20 Diospa rimasqankunaqa haykaña kaspanpas lliwmi Jesucristopi cumplikun*, chaymi paynintakama “chaynayá kachun*” ninchik,+ chaynatam Diosta hatunchanchik.+
21 Ichaqa Diosmi garantizawanchik qamkunapas chaynataq ñuqaykupas Cristopa kasqanchikta, Diostaqmi ñuqanchiktaqa sapaqchawarqanchik.+
22 Paytaqmi sellonwan marcawarqanchik,+ quwarqanchiktaqmi atiynintapas sunqunchikpi.+ Chayqa chaskinanchik kaqkunamanta mana iskayrayananchikpaqmi*.
23 Ñuqaqa qamkunata astawan mana llakichinayraykum Corinto llaqtamanqa manaraq hamurqanichu. Diosyá wañuchiwachun imam kaqta mana willakuptiyqa.
24 Ñuqaykuqa manam Diospi iñisqaykichikmanta patronnikichikchu* kaniku,+ aswanqa kusisqa kanaykichikpaq yanapakuqllam, qamkunaqa Diospi hapipakusqaykichikraykum allinta sayachkankichik.
Willakuykuna
^ Utaq: “Kachasqan runa”.
^ Griego rimaypiqa nichkan: “Cristo Jesuspa”, nispam.
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Utaq: “Kallpanchaykuwaqninchikmi”.
^ Utaq: “Diospa akllasqanpa”.
^ Utaq: “Concienciaykupim”.
^ Kaypiqa rimachkan mana kuyana kachkaspa kuyasqa kaymantam.
^ Ichapas kanman: “Yanapasqa kanaykichikpaq”, niqpas.
^ Silvanotaqa Silas nispapas riqsiqkum.
^ Utaq: “Amen”.
^ Griego rimaypiqa nichkan: “Jesucristopi ‘arí’ niqmi rikurirun”, nispam.
^ Utaq: “Kaqkunapa garantianmi”.
^ Utaq: “Munaychakuqchu”.
