2 Corintios 5:1-21
5 Yachasqanchikpi hinapas kay pachapi wasinchik utaq carpanchik hina kay cuerponchik chinkachisqa kaptinqa+ hanaq pachapim wiñaypaq takyaq hatun wasita Dios quwasun, chay quwananchik wasiqa manam runapa ruwasqanchu.+
2 Kay wasinchik hina cuerpopiraq* kachkaspaqa llakikuymantam waqanchik, chaymi anchallataña munachkanchik hanaq pachapi kaq wasinchik chaskiyta. Chayqa pachanchik hinam kanqa.+
3 Chaynapi churakuruptinchik pachayuqta hinaña tariwananchikpaq.
4 Kay wasipi kaqkunaqa llakikuymantam waqanchik, ñuqanchikqa manam munanchikchu kay wasita pachata hina hurqukuruytaqa, aswanqa munanchik hanaq pachapi wasi chaskiytam.+ Chaynapi wañuruqlla cuerponchikpa rantinpi wiñay kawsayña kananpaq.+
5 Chayna kanapaq ruwawaqninchikqa Diosmi,+ paymi hamuq punchawpi imakunapas chaskinanchikmanta mana iskayrayanapaq* atiyninta quwarqanchik.+
6 Chayraykum mana iskayrayanchikchu, chaymantapas yachanchikmi aycha cuerponchikpiraq* kawsaspanchikqa manaraq señorwan kuska kananchikta.+
7 Ñuqanchikqa Diospi hapipakuspam kawsanchik, manam ñawinchikpa qawasqan kaqkunapichu.
8 Manataqmi hukmanyanchikchu, cuerponchikta saqispa señorwanña kawsakuytam munachkanchik.+
9 Hinaptinqa, paywan kuska yachananchik* utaq mana yachananchik kaptinpas ñuqanchikqa munanchik paypa chaskisqan kaytam.
10 Ichaqa llapallanchikmi Cristopa* ñawpaqninpi juzgasqa kanapaq rikurinanchik kanqa, chaynapi sapakamaman pagawananchikpaq, chaytaqa ruwanqa aycha cuerponchikpiraq kachkaspa allinta utaq mana allinta ruwasqanchikman hinam.+
11 Ñuqaykuqa yachanikum señor manchakuy ima ninan kasqanta, chaymi runakunataqa mana iskayrayanankupaq hina allinta yachachiniku, Diosqa allintam yachan pikuna kasqaykuta. Ichaqa munanim imayna runa kasqaykuta qamkunapas yachanaykichikta.
12 Ñuqaykuqa manam kaqmantachu pim kasqaykutaqa riqsichikuchkaniku, aswanqa kaykunata nispaykum kallpanchamuchkaykiku ñuqaykumanta alabakunaykichikpaq, chaynapim upallachiyta atinkichik hawallanta qawaspa alabakuqkunata, paykunaqa hawallanta qawaspankum alabakunku,+ manam runapa sunqunpi ima kasqanta qawaspachu.
13 Imatapas mana yuyayniyuq hina+ ruwaspaykuqa Diosraykum ruwarqaniku, yuyaywan ruwaspaykuñataqmi qamkunarayku ruwaniku.
14 Cristopa kuyakuq kasqanqa tukuy ima ruwasqaykupim kallpanchawanku, ñuqaykuqa kaytam yacharuniku: Huk runallam wañurqa llapallan runapa rantinpi,+ chaynaqa karqa lliw runakuna wañurusqankuraykum.
15 Payqa llapallanchikpaqmi wañurqa hinaspa kawsarimurqa, chaynapi kawsaqkuna manaña kikillanchikpaq kawsanapaq+ aswanqa wañupuwaqninchikpaqña kawsananchikpaq.
16 Kunanmantaqa manañam pimantapas qawasqaykuman hinañachu piensaniku,+ Cristomantapas qawasqaykuman hinalla ñawpaqta piensaspaykupas kunanqa manañam chaynatañachu piensaniku.+
17 Chaynaqa, pipas Cristowan huklla kaqqa Diospa musuq unanchasqan runañam,+ ñawpaq kaqkunaqa pasarunñam, musuq kaqkunañam rikuriramun.
18 Ichaqa tukuy imam Diosmanta hamun. Diosmi kikinwan allinyanachiwanchik Cristopa+ ruwasqanwan, hinaspam kamachiwarqaku Dioswan allinyanakunankupaq hukkunatapas yanapanaykupaq.+
19 Diosqa kikinwan allinyanakunankupaqmi Cristopa ruwasqanwan runakunata yanapachkan,+ chaytaqa ruwan huchankumantapas runakunata cuentata mana mañaspanmi,+ chay allinyanakuymanta willakunaykupaqmi Diosqa kamachiwarqaku.+
20 Chayraykum Cristopa rantinpi+ Diosmanta willakuq kaniku,+ ñuqaykuwan runakunata Dios ruegapayachkanmanpas hina. Jesucristopa rantinpi churasqa kaspaykum ruegakuniku: “Dioswan allinyanakuychik”, nispa.
21 Mana huchayuq runatam+ Diosqa ñuqanchikrayku huchayuqta rikurirachirqa, chaynapi paynintakama Diospaq allin ruwaqña kananchikpaq.+
Willakuykuna
^ Utaq: “Kay pacha wasinchikpi”.
^ Utaq: “Garantiata hina”.
^ Griego rimaypiqa nichkan: “Wasinchik kachkaptinraq”, nispam.
^ Utaq: “Tiyananchik”.
^ Utaq: “Diospa akllasqanpa”.
